អន្តរជាតិ
×![]()
ដោយ: ថ្មីៗ
យោងតាមការសិក្សាថ្មីមួយរបស់សេវាពិគ្រោះយោបល់ផ្នែកអចលនទ្រព្យជាសកល Knight Frank with Fragomenដែលជាអ្នកជំនាញផ្នែកការធ្វើចំណាកស្រុករបស់មហាសេដ្ឋីបានរកឃើញថាមានមហាសេដ្ឋីជាច្រើបានចាកចេញពីប្រទេសកំណើតរបស់ខ្លួន ទៅរស់នៅនិងរកស៊ីនៅក្នុងប្រទេសផ្សេងទៀត។
យោងលទ្ធផលនៃការសិក្សា ដែលបានចុះផ្សាយក្នុងកាសែត Telegraph ក្រុមអ្នកស្រាវជ្រាវបានរកឃើញថា ចាប់ពីឆ្នាំ ២០០៣ ដល់ឆ្នាំ ២០១៣ មហាសេដ្ឋីជនជាតិចិន ប្រមាណជា ៧៦ ២០០ នាក់ស្មើនឹង ១៥ ភាគរយនៃចំនួនមហាសេដ្ឋីនៅក្នុងប្រទេសនេះ ដែលជាចំនួនមួយច្រើនជាងគេបំផុត បានចាកចេញពីប្រទេសចិន ទៅរស់នៅប្រទេសផ្សេងៗនៅជុំវិញពិភពលោក។
ការស្រាវជ្រាវដដែលក៏បានរកឃើញថា ក្នុងរយៈពេល ១០ កន្លងទៅ ឥណ្ឌាគឺជាប្រទេសទី២ ដែលបានបាត់បង់ចំនួនមហាសេដ្ឋីរបស់ខ្លួន ប្រមាណជា ៤៣ ៣០០ នាក់ឬស្មើនឹង ២៧ភាគរយនៃមហាសេដ្ឋីរបស់ប្រទេស ខណៈពេលដែលប្រទេសបារាំង បានស្ថិតនៅលំដាប់ទីបី ដោយបានបាត់បង់ចំនួនមហាសេដ្ឋីប្រមាណជា ៣១ ៧០០ នាក់ឬ ១៣ ភាគរយនៃចំនួនមហាសេដ្ឋីសរុបនៅក្នុងប្រទេស។
បើតាមរបាយការណ៍ខាងលើនេះ កន្លែងដ៏ពេញនិយមបំផុតសម្រាប់មហាសេដ្ឋី មករស់នៅគឺចក្រភពអង់គ្លេស ដោយសារតែប្រទេសនេះទទួលបានចំនួនមហាសេដ្ឋីមកពីក្រៅប្រទេស ក្នុងរយៈពេល ១០ ឆ្នាំនេះសរុបប្រហែល ១១៤ ១០០ដោយបានកើនឡើង ១៤ ភាគរយនៃចំនួនមហាសេដ្ឋីសរុបនៅក្នុងប្រទេសអឺរ៉ុបមួយនេះ។
ចំណែកឯប្រទេសសិង្ហបុរីក៏ជាទឹកដីដែលទទួលមហាសេដ្ឋីមករស់នៅច្រើនជាងគេលំដាប់ទី២ ផងដែរ ដោយក្នុងរយៈពេលដូចគ្នាប្រទេសនេះទទួលបានមហាសេដ្ឋី៤៥ ០០០ នាក់មករស់នៅខណៈពេលដែលសហរដ្ឋអាមេរិក បានទទួលមហាសេដ្ឋីមកពីក្រៅប្រទេសប្រមាណជា ៤២ ៤០០ ស្មើនឹង ១ ភាគរយនៃមហាសេដ្ឋីសរុបរបស់ខ្លួន។
ដោយឡែក មហាសេដ្ឋីជនជាតិអូស្ត្រាលី ជាមហាសេដ្ឋីដែលមានកភាពសប្បាយរីករាយបំផុតនៅលើពិភពលោកនៅពេលដែលវាមកដល់ប្រទេសកំណើតរបស់ពួកគេហើយរបាយការណ៍ខាងលើបានរកឃើញថា មានមហាសេដ្ឋីអូស្ត្រាលីតែ ៤ ភាគរយប៉ុណ្ណោះ បាននិយាយថាពួកគេធ្លាប់ចង់ចាកចេញពីប្រទេសកំណើត និងមានមហាសេដ្ឋីតិចតួចណាស់ដែលកូនរបស់គេទៅរៀននៅបរទេស៕
© រក្សាសិទ្ធិដោយ thmeythmey.com
