អន្តរជាតិ
នយោបាយអន្តរជាតិ
ក្រុមជីហាតយកកុមារធ្វើឃាតករ ទាក់ចំណាប់អារម្មណ៍សារព័ត៌មាន
× ការដែលក្រុមជីហាតរដ្ឋអ៊ីស្លាមអាចឡើងឥទ្ធិពល ស្រូបទាញយុវជនគ្រប់ទិសទី ក្នុងពិភពលោកអោយមកជួយប្រយុទ្ធ នៅស៊ីរីនិងអ៊ីរ៉ាក់ មិនមែនជាការធម្មតាឡើយ។ វាសបញ្ជាក់ថា ក្រុមនេះមានល្បិចនិងមធ្យោបាយពិសេស ទើបអាចធ្វើបានដូចសព្វថ្ងៃនេះ។ ក្នុងកលល្បិចទាំងនេះ គេឃើញថា ក្រុមជីហាតបានប្រើសកម្មជនដែលមានវ័យកាន់តែក្មេង អោយធ្វើជាឃាតករ ដើម្បីទាក់ទាញចំណាប់អារម្មណ៍សារព័ត៌មាន។
សូមស្តាប់ការបកស្រាយរបស់ ព្រំសឿន សូលីណា ពីទីក្រុងប៉ារីស
រូបភាពវីដេអូចុងក្រោយរបស់ក្រុមជីហាត ដែលទាក់ចំណាប់អារម្មណ៍ខ្លាំង គឺវីដេអូដែលក្រុមជីហាតបានចុះផ្សាយ កាលពីថ្ងៃអង្គារ។ ក្នុងវីដេអូនេះ គេឃើញកុមារម្នាក់ ស្លៀកសម្លៀកបំពាក់ទាហាន បាញ់សម្លាប់បុរសម្នាក់ មួយគ្រាប់ចំក្បាលតែម្តង។ ក្រុមជីហាតប្រាប់ថា បុរសនេះជាជនជាតិប៉ាឡេស្ទីន និងជាភ្នាក់ងារស៊ើបការណ៍របស់អ៊ីស្រាអែល។ រូបភាពវីដេអូនេះ កាត់តបានល្អណាស់ ហើយជាវីដេអូទី១ដែលនិយាយជាភាសាបារាំង។
យោងតាមរូបភាពវីដេអូ ក្មេងប្រុសជាឃាតករអាចត្រូវជាក្មួយប្រុសរបស់ភេរវជនបារាំង Mohamed Merah ដែលបានបង្កភេរវកម្មចំនួន៣ កាលពីខែមិនា ឆ្នាំ២០១២ នៅភាគខាងត្បូងប្រទេសបារាំង ក្នុងនោះ មានការបាញ់សម្លាប់ក្មេងៗនៅសាលារៀនជនជាតិជីហ្វមួយកន្លែង។ រីឯបុរសដែលឈរនៅជិតកុមាររូបនេះ ត្រូវគេសង្ស័យថា ជាសមាជិកក្នុងគ្រួសាររបស់ភេរវជនបារាំងរូបនោះដែរ។ រូបភាពវីដេអូនេះ បានចុះផ្សាយតែមួយថ្ងៃប៉ុណ្ណោះ មុនថ្ងៃខួប៣ឆ្នាំ នៃអំពើភេរវកម្មដែលបង្កឡើងដោយភេរវជនបារាំងMohamed Merah។ ក្រុមជីហាតទំនងជាចង់ផ្ញើសារទៅរដ្ឋាភិបាលបារាំង ថាក្រុមខ្លួនបានជួយអោយសមាជិកគ្រួសារភេរវជន សងសឹកអ៊ីស្រាអែលដោយផ្ទាល់ដៃ ដើម្បីរំលឹកដល់ភេរវជនMerah ដែលប៉ូលិសបារាំងបានបាញ់សម្លាប់ កាលពីឆ្នាំ២០១២ ។
ដោយឡែក វាមិនមែនជាលើកទី១ទេ ដែលក្រុមជីហាតប្រើកុមារអោយសំដែងឈុតឆាក សាច់រឿងដូចក្នុងភាពយន្តហូលីវូត ដើម្បីទទួលបានចំណាប់អារម្មណ៍ពីសារព័ត៌មាន។ កាលពីពាក់កណ្តាលខែមករា ដើមឆ្នាំ ក្រុមជីហាតក៏បានបង្ហោះវីដេអូមួយដែរ ជាភាសាអង់គ្លេស ដែលគេឃើញមានក្មេងប្រុសម្នាក់ផ្សេងទៀត បាញ់សម្លាប់ឈ្លើយសឹករុស្ស៊ី២នាក់។ បុរសទាំង២នេះបានសារភាពថា ចូលមកបង្កប់ខ្លួន ស៊ើបការណ៍ក្រុមជីហាត។ កុមារជាឃាតករប្រហែលជាជនជាតិកាហ្សាក់ស្ថាន។ កាលពីខែវិច្ឆិកា ក្រុមជីហាតក៏បានចុះផ្សាយរូបភាពវីដេអូ បង្ហាញពីក្មេងប្រុសបារាំង២នាក់ អាយុប្រហែលជាង១០ឆ្នាំ ស្ពាយកាំភ្លើងវែងយ៉ាងសង្ហា នៅផ្លូវរ៉ាក់កា ក្នុងទឹកដីស៊ីរីផងដែរ។
កុមារប្រៀបបាននឹងទំពាំងស្នងឫស្សី ប្រៀបដូចក្រដាសសបរិសុទ្ធ ដែលត្រូវតែលាបពណ៌អោយល្អ។ ក្រុមជីហាតបែរជាយកក្មេងៗ មកបណ្តុះបណ្តាលក្នុងផ្លូវអាក្រក់ អោយរៀនបាញ់កាំភ្លើង ធ្វើជាឃាតករសម្លាប់មនុស្សឥតញញើតដៃទៅវិញ។ វាជារឿងដែលពិបាកនឹងទទួលយកណាស់។ តាមរយៈរូបភាពកុមារបាញ់សម្លាប់ឥតញញើតដៃនេះហើយ ដែលសារព័ត៌មាន បណ្តាញសង្គមនានា មិនអាចនៅស្ងៀម ហើយបាននាំគ្នាចុះផ្សាយទង្វើដ៏ព្រៃផ្សៃនេះ អោយមនុស្សគ្រប់ទិសទីបានដឹង។ ត្រង់ចំណុចនេះហើយ ដែលអ្នកជំនាញមើលឃើញថា ការឃោសនារូបភាពឃាតកម្មរបស់ក្រុមជីហាត គឺជាអន្ទាក់ទាក់បណ្តាសារព័ត៌មាន បណ្តាជនគ្រប់ទិសទីអោយជួយផ្សព្វផ្សាយដំណឹង ផ្ញើសារទៅសកម្មជនជីហាតក្នុងសមរភូមិ។ សារព័ត៌មាននិងបណ្តាញសង្គម ដោយប្រយោល បានក្លាយជាឧបករណ៍របស់ក្រុមជីហាត ក្នុងការជំរុញយុវជននិងកុមារមិនអោយញញើតដៃនឹងប្រព្រឹត្ត អំពើអមនុស្សធម៌ក្នុងការចំអកមេដឹកនាំគ្រប់ប្រទេស ដែលអសមត្ថភាពជួយជនរងគ្រោះ។ វីដេអូរបស់ក្រុមជីហាត មានរូបភាពកុមារជាឃាតករ ចុះផ្សាយកាលពីថ្ងៃអង្គារកន្លងទៅ ត្រូវបានគេចាប់អារម្មណ៍មើលច្រើនជាង រូបភាពបង្ហាញពីកុមារធ្វើទាហាននៅតំបន់អាហ្វ្រិកខាងកើតទៅទៀត។
មិនថាតែវីដេអូមានរូបភាពក្មេងៗជាឃាតករ រឺក្មេងៗហ្វឹកហាត់សង្គ្រាមអ្វីឡើយ រាល់រូបភាពវីដេអូរបស់ក្រុមជីហាតរដ្ឋអ៊ីស្លាម សុទ្ធតែបង្កប់ខ្លឹមសារជ្រាលជ្រៅ ក្រៅពីអូសទាញយុវជនឈាមរាវ វាក៏ជាសារលើកទឹកចិត្តសកម្មជនក្រុមជីហាតដែលកំពុងប្រយុទ្ធក្នុងសមរភូមិ កុំអោយពួកគេអស់សង្ឃឹមនៅស្ងៀមដាច់ខាត ព្រោះថា ពេលនេះ កងទ័ពសម្ព័ន្ធមិត្តបានវាយលុកទៅមុខ នឹងហាក់មានប្រៀបឈ្នះលើក្រុមជីហាតបន្តិចវិញហើយ។ ក្រុមជីហាតប្រហែលចង់ប្រាប់សកម្មជនខ្លួនថា ក្មេងៗក្នុងក្រុមក៏កំពុងតែក្លាយជាទំពាំងស្នងពួកគេ ក្នុងសមរភូមិ ក្នុងពេលខាងមុខដែរ ដូច្នេះ ពួកគេមិនចាំបាច់ភ័យខ្លាចអ្វីឡើយ។
ដោយឡែក វីដេអូមានរូបភាពព្រៃផ្សៃក៏ជាអាវុធបំបាក់ទឹកចិត្តអ្នកទស្សនា រឺអ្នកដឹកនាំ ដែលទន់ខ្សោយផងដែរ ព្រោះពួកគេអាចនៅស្ងៀមទ្រឹង ដោយសារឈឺចាប់ជំនួសជនរងគ្រោះ ដូច្នេះ ពួកគេក៏អាចនឹងមិនធ្វើសកម្មភាពអ្វីទាំងអស់ដើម្បីកំទេចក្រុមជីហាតដែរ៕
© រក្សាសិទ្ធិដោយ thmeythmey.com