អន្តរជាតិ
នយោបាយអន្តរជាតិ
ចិនព្រមានចាត់វិធានការឆ្លើយតបនឹងមីយ៉ាន់ម៉ារឿងបញ្ហានៅតាមព្រំដែន
×
នាយករដ្ឋមន្ត្រីចិនលោកLi Keqiangបានព្រមាននឹងចាត់វិធានការដើម្បីឆ្លើយតបទៅនឹងបញ្ហានៅតាមបណ្តោយព្រំដែនជាមួយនឹងមីយ៉ាន់ម៉ា។សេចក្តីថ្លែងការណ៍នេះធ្វើឡើងក្រោយពីមានការបំផ្ទុះគ្រាប់បែកពីយន្តហោះរបស់មីយ៉ាន់ម៉ានៅក្នុងដែនអធិបតេយ្យរបស់ចិនហើយបានបណ្តាលឲ្យជនស្លូតត្រង់បួននាក់សា្លប់។
ក្រោយពីមានការបំផ្ទុះគ្រាប់បែកដោយយន្តហោះមីយ៉ាន់ម៉ានៅក្នុងដែនអធិបតេយ្យរបស់ចិននិងបានបណ្តាលឲ្យប្រជាជនស្លូតត្រង់ស្លាប់បួននាក់លោកនាយករដ្ឋមន្ត្រីចិនLi Keqiangបានប្រតិកម្មយ៉ាងខ្លាំងហើយបានព្រមានថានឹងចាត់វិធានការដើម្បីឆ្លើយតបទៅនឹងការបំពាននេះកាលពីថ្ងៃម្សិលមិញនេះ។
នៅក្នុងរយៈពេលមួយខែចុងក្រោយនេះបញ្ហាសន្តិសុខនៅតាមព្រំដែនចិននិងមីយ៉ាន់ម៉ាបានក្លាយជាចំណុចចម្រោងចម្រាស់រវាងរដ្ឋាភិបាលទាំងពីរ។ក្នុងនោះរដ្ឋាភិបាលមីយ៉ាន់ម៉ាបានចោទរដ្ឋាភិបាលចិនដែលបានជួយផ្គត់ផ្គង់នូវក្រុមឧទ្ទាមដែលកំពុងតែផ្ទុះជម្លោះជាមួយនឹងរដ្ឋាភិបាលមីយ៉ាន់ម៉ា។ក៏ប៉ុន្តែចិនបានបដិសេធមិនទទួលស្គាល់លើការចោទប្រកាន់នេះ។
យ៉ាងណាមិញក្រោយពីប្រជាជនចិនបួននាក់បានស្លាប់និងជាច្រើននាក់បានរបួសដោយសារការបំផ្ទុះដោយយន្តហោះនៅព្រំដែនចិននោះរដ្ឋាភិបាលទីក្រុងបេកាំងបានប្រតិកម្មយ៉ាងខ្លាំងទៅនឹងការឈ្លានពាននេះ។ក្នុងនោះលោកនាយករដ្ឋមន្ត្រីLi Keqiangបានបញ្ជាក់នៅក្នុងសន្និសីទប្រចាំឆ្នាំរបស់សភាថារដ្ឋាភិបាលនឹងធ្វើការទទួលខុសនិងមានសមត្ថភាពក្នុងការធានាសន្តិសុខនិងការពារប្រជាជនដែលរស់នៅតាមបណ្តាយព្រំដែន។
លោកនាយករដ្ឋមន្ត្រីក៏បានព្រមានទៀតថារដ្ឋាភិបាលនឹងបញ្ជូនកងទ័ពទៅតាមព្រំដែនប្រទេសទាំងពីរប្រសិនបើទាហានមីយ៉ាន់ម៉ានៅតែបំពានអធិបតេយ្យរបស់ខ្លួន។
ទាក់ទិននឹងការបំផ្ទុះគ្រាប់បែកនេះដែររដ្ឋាភិបាលមីយ៉ាន់ម៉ា បានធ្វើការសុំអភ័យទោសទៅកាន់រដ្ឋាភិបាលចិនលើការស្លាប់នោះ តែបានបដិសេធចោលនូវការទទួលខុសត្រូវលើឧបទ្ទវហេតុនោះ។ក្នុងនោះបើយោងតាមអ្នកនាំពាក្យរបស់ប្រធានាធិបតីមីយ៉ាន់ម៉ាការផ្ទុះគ្រាប់បែកនោះគឺស្ថិតនៅក្នុងអធិបតេយ្យរបស់មីយ៉ាន់ម៉ានោះទេ។លោកបន្ថែមទៀតថាប្រសិនបើមានការបាញ់ប្រហារណាមួយនោះរដ្ឋាភិបាលមីយ៉ាន់ម៉ានឹងផ្តល់ដំណឹងទៅកាន់រដ្ឋាភិបាលចិនជាមុន។
គួរបញ្ជាក់ផងដែរគិតចាប់ពីខែកុម្ភៈមកដល់ពេលនេះការបាញ់ប្រហាររវាងកងកម្លាំងរដ្ឋាភិបាលមីយ៉ាន់ម៉ានិងក្រុមឧទ្ទាមនៅភាគខាងជើងនៃប្រទេសដែលជាប់ព្រំប្រទល់ជាមួយនឹងចិននៅមិនទាន់មានកិច្ចព្រមព្រៀងស្តីបទឈប់បាញ់ណាមួយត្រូវបានធ្វើឡើងឡើយ។ដូច្នេះការចោទប្រកាន់គ្នារវាងចិននិងមីយ៉ាន់ម៉ាក៏មិនផងអាចបញ្ចប់ផងដែរ៕
© រក្សាសិទ្ធិដោយ thmeythmey.com