អន្តរជាតិ
ស្ថានភាពសុខភាពលោកលីខ្វាន់យូរ កាន់តែធ្ងន់ធ្ងរទៅ
× រដ្ឋាភិបាលសឹង្ហបុរីបានអោយដឹងថាស្ថានភាពសុខភាពនាយករដ្ឋមន្ត្រីទីមួយរបស់សឹង្ហបុរីលោក លី ខ្វាន់យូរ កាន់តែធ្ងន់ធ្ងរជាងមុន។ ស្ថាបនិកសឹង្ហបុរីរូបនេះ ត្រូវបានគេបញ្ជូនទៅកាន់មន្ទីរពេទ្យដើម្បីព្យាបាលតាំងពីដើមខែកុម្ភៈមកម្ល៉េះ ដែលគេដឹងថាលោកមានបញ្ហាសួត។
ថ្ងៃសៅរ៍នេះរដ្ឋាភិបាលសិង្ហបុរីបានអោយប្រកាសអោយដឹងថា សុខភាពលោក លីខ្វាន់យូរ កាន់តែធ្ងន់ធ្ងរទៅហើយនៅពេលនេះ។ មន្ត្រីរដ្ឋាភិបាលសឹង្ហបុរីបានអោយដឹងនៅថ្ងៃពុធនេះថា ស្ថានភាពសុខភាពរបស់មន្ត្រីកំពូលសឹង្ហបុរីនេះកាន់តែវិវត្តនៅរកភាពធ្ងន់ធ្ងរ បើទោះបីជាលោកទទួលការព្យាបាលយ៉ាងយកចិត្តទុកដាក់បំផុតពីពេទ្យជំនាញក៏ដោយ។ លោក លី ខ្វាន់យូរ ត្រូវបានគេបញ្ជូនមកសម្រាកព្យាបាលនៅក្នុងមន្ទីរពេទ្យតាំងពីថ្ងៃ ៥កុម្ភៈមកម្ល៉េះ ប៉ុន្តែគេមិនឃើញសញ្ញាណាមួយបញ្ជាក់ថាសុខភាពលោកកាន់តែល្អប្រសើរនោះឡើយ។
លោក លីខ្វាន់យូរ មានបញ្ហាសួតធ្ងន់ធ្ងរ និងកំពុងស្ថិតក្នុងការសង្គ្រោះបន្ទាន់នៅឡើយ ប៉ុន្តែដោយសារលោកមានវ័យចំណាស់ ទើបបានជាស្ថានភាពសុខភាពលោកមិនមានភាពធូរស្រាលសោះ។ លោក លីខ្វាន់យូរ កើតនៅក្នុងឆ្នាំ១៩២៣ ដែលគិតមកទល់ពេលបច្ចុប្បន្នមានវ័យ ៩១ ឆ្នាំហើយ។ លោកមានឈ្មោះល្បីរន្ទឺខ្លាំងដោយសារតែក្នុងឆ្នាំ ១៩៦៥ លោកបានសម្រេចបង្កើតរដ្ឋដ៏តូចមួយដោយខ្លួនឯង ដោយប្រកាសឯករាជ្យចេញពីម៉ាឡេស៊ី។ លោកបានកាន់កាប់តំណែងជានាយករដ្ឋមន្ត្រីអស់ពេលបីទសវត្សន៍ ដែលលោកបានផ្លាស់ប្តូរប្រទេសគ្មានធនធានធម្មជាតិអ្វីដែលអាចពឹងផ្អែកបាននោះទៅជារដ្ឋមួយដែលអភវឌ្ឍខ្លាំងបំផុតមួយ និងមានផលិតផលក្នុងស្រុកសរុបរបស់ប្រជាជនម្នាក់ៗច្រើនជាងបណ្តាប្រទេសអឺរ៉ុបខ្លះផង។
គួរបញ្ជាក់ថា នៅក្នុងឆ្នាំ ១៩៩០ លោក Goh Chok Tong បានឡើងកាន់តំណែងជំនួសលោក លី ខ្វាន់យូរ ហើយរហូតដល់ក្នុងឆ្នាំ ២០០៤ ទើបានកូនប្រុសរបស់លោកគឺ លោក លី សៀនឡុង ឡើងកាន់តំណែងវិញម្តង។ បើទោះបីជាលោកមិនកាន់កាប់តំណែងកំពូលរបស់រដ្ឋក្តី លោក លី ខ្វាន់យូរ នៅតែបន្តធ្វើជាទីប្រឹក្សាពិសេសរបស់អ្នកនយោបាយសឹង្ហបុរីរហូតមកទល់បច្ចុប្បន្ននេះ។ ប៉ុន្តែយ៉ាងណាក៏ដោយ លោកក៏តែងតែរងការរិះគន់ដោយសារលោកមានផ្នត់គំនិតផ្តាច់ការ រឹតត្បិតសិទ្ធិសេរីភាពសារព័ត៌មាន និងធ្វើទុក្ខបុកម្នេញរាល់ដៃគូប្រជែងផ្នែកនយោបាយថែមទៀតផង៕
© រក្សាសិទ្ធិដោយ thmeythmey.com