អន្តរជាតិ
នយោបាយអន្តរជាតិ
×![]()
បច្ចុប្បន្ននេះចិន បានបន្តផលិតសព្វាវុធល្អៗ និងទំនើបៗ ដោយនាំចេញទៅ កាន់ទីផ្សារ អន្តរជាតិឥតដាច់។ សព្វាវុធរបស់ចិនច្រើនសន្ធឹកសន្ធាប់នៅលើទីផ្សារអន្តរជាតិ អាចគំរាមកំហែងដល់ អំណាចនិងឥទ្ធិពលរបស់ក្រុងវ៉ាស៊ីនតោនដែលធ្លាប់មានក្នុងពិភពលោក។ ហើយ ក្នុងរយៈពេល១០ឆ្នាំទៀតសព្វាវុធចិនកាន់កាប់ទីផ្សារពិភពលោក បង្កអោយមានអស្ថិរភាព ទៀតផងក៏មាន។
កញ្ញា ខនចំប៉ា លម្អិតព័ត៌មាននេះ
ការកើនឡើងនៃតួនាទីរបស់ក្រុងប៉េកាំងក្នុងទីផ្សារសព្វាវុធអន្តរជាតិ អាចថាជាសញ្ញាល្អក៏បាន ឬអាចថាជារឿងគួរអោយបារម្ភក៏ថាបាន។ អ្នកវិភាគចាប់ផ្តើមផ្តោតលើផលប៉ះពាល់ ដែលកើត ចេញពីការកើនឡើងនៃនាំចេញសព្វាវុធទំនើបរបស់ចិន ទៅកាន់កាន់បណ្តាប្រទេសនានាទូទាំងពិភពលោក។
កាលមុនចិនធ្លាប់នាំចេញតែសព្វាវុធធុនស្រាលៗប៉ុណ្ណោះ ប៉ុន្តែត្រឹមប៉ុន្មានឆ្នាំប៉ុណ្ណោះ ក្រុងប៉េ កាំង អាចអភិវឌ្ឍន៍សមត្ថភាពផលិតសព្វាវុធបានយ៉ាងរហ័ស រហូតហ៊ាននាំចេញអាវុធយុទ្ធភ័ណ្ឌធុនធំទៀត។ គេសង្កេតឃើញចិនព្យាយាម ចំណាយលុយច្រើនសន្ធឹកសន្ធាប់ដើម្បី ពង្រឹងវិស័យយោធា ធ្វើទំនើបកម្មការផលិតអាវុធ ដោយបង្កើនការស្រាវជ្រាវលើការផលិតសព្វាវុធជំនាន់ថ្មីក្នុងស្រុក និងចំណាយតិច។ សព្វាវុធចិនមានគុណភាពល្អ ហើយបើនិយាយពីតម្លៃវិញ គឺថោកជាងសព្វាវុធដែលផលិតដោយបណ្តាប្រទេសលោកខាងលិច។
ដូចដែលបានឃើញស្រាប់ហើយ ចិនស្រាប់តែសម្រេចលក់ប្រភេទយន្តហោះឈ្លបយកការណ៍គ្មានមនុស្សបើក ទៅកាន់អាហ្រិ្វក និងមជ្ឈិមបូព៌ាថែមទៀត។ មិនត្រឹមតែប៉ុណ្ណោះនៅក្នុងឆ្នាំ ២០១២ ចិនបានចុះហត្ថលេខាលក់នាវាចម្បាំងទៅអោយប្រទេសនីហ្សេនៅអាហ្វ្រិកខាងលិចនិងបន្ទាប់មកស្រាប់តែសុខចិត្តលក់ប្រព័ន្ធមីស៊ីលការពារដែនអាកាស ទៅអោយរដ្ឋាភិបាលក្រុងអង់ការ៉ាថែមទៀត។ លោកខាងលិចជាពិសេសសហភាពអឺរ៉ុប ភ្ញាក់ផ្អើលជាខ្លាំងនៅពេលឃើញតួកគីរត់ទៅទិញសព្វាវុធពីចិន ហើយចិនអាចផលិតនិងហ៊ានលក់ចេញសព្វាវុធទំនើបៗបែបនេះទៀត។
យ៉ាងណាក៏ដោយ គេអះអាងថា សព្វាវុធទំនើបៗច្រើនបែបដែលផលិតក្នុងប្រទេសចិន ដែលបញ្ជូនទៅលក់ក្នុងទីផ្សារអន្តរជាតិ អាចបង្កអោយមានការព្រួយបារម្ភច្រើនជាងសញ្ញាវិជ្ជមាន។ អត្ថបទវិភាគមួយដែលចុះផ្សាយក្នុងទស្សនាវដ្តីគោលនយោបាយអន្តរជាតិ បានអះអាងថា តួនាទីដ៏ធំរបស់ចិន ក្នុងការនាំចេញសព្វាវុធគ្រប់ធុន ពីធុនតូចដល់ធុនធំ នឹងធ្វើអោយប៉ះពាល់ដល់ឥទ្ធិពល និងអំណាចរបស់សហរដ្ឋអាមេរិក ក្នុងនយោបាយអន្តរជាតិ។
ប្រទេសតូចៗនៅអាហ្វ្រិក មជ្ឈិមបូព៌ា ឬនៅអាស៊ី មានលទ្ធភាពទិញសព្វាវុធទំនើបដែលមានតម្លៃសមរម្យពីក្រុងប៉េកាំងដើម្បីពង្រឹងសមត្ថភាពយោធារបស់ខ្លួន។ ដូច្នេះសហរដ្ឋអាមេរិកដែលតែងអន្តរាគមន៍នៅក្នុងជម្លោះនៅក្នុងប្រទេសនានាទូទាំងពិភពលោកនោះ ច្បាស់ជាមិនអាចធ្វើតាមចិត្តដូចមុនបានឡើយ។ មិនត្រឹមតែប៉ុណ្ណោះទេ សព្វាវុធដែលមានតម្លៃថោក និងមានគុណភាពរបស់ចិន និងឥណ្ឌា អាចនឹងធ្វើអោយប៉ះពាល់ដល់ការនាំចេញរបស់បណ្តាប្រទេសនាំសពា្វវុធចេញដូចជាសហភាពអឺរ៉ុប អាមេរិក និងរុស្ស៊ីផងដែរ៕
© រក្សាសិទ្ធិដោយ thmeythmey.com
