អន្តរជាតិ
បុរសម្នាក់ធ្វើការជាសន្តិសុខតែបរិច្ចាគប្រាក់ខែជាង៧០ភាគរយជួយកុមារក្រីក្រ
×
បុរសជនជាតិចិនម្នាក់ ធ្វើការជាសន្តិសុខយាមទីតាំងមួយកន្លែង នៅក្នុងទីក្រុង Weihai ភាគខាងកើតខេត្ត Shandong ប្រទេសចិន បានបរិច្ចាគជាង ៧០ ភាគរយនៃប្រាក់ខែសរុបរបស់គាត់ ដើម្បីជួយដល់កុមារក្រីក្រដែលត្រូវការជំនួយ។ នេះបើយោងតាមការផ្សាយរបស់ទូរទស្សន៍មជ្ឈឹម CCTV ។
ប្រភពដដែលបានឲ្យដឹងទៀតថា លោក Ma Yongដែលបច្ចុប្បន្នធ្វើការជាសន្តិសុខ ហើយទទួលបានប្រាក់ខែ ៣៥២ ដុល្លារក្នុងមួយខែ ប៉ុន្តែជារៀងរាល់ខែលោកបានបរិច្ចាគប្រាក់ ២៧២ ដុល្លារប្រហែលជាង ៧០ ភាគរយនៃប្រាក់ខែរបស់គាត់ ដើម្បីជួយដល់កុមារក្រីក្រ ១៧ នាក់ដែលកំពុងសិក្សា។
លោក Ma Yongបានចំណាយប្រាក់តិចតួចប៉ុណ្ណោះទៅលើថ្លៃម្ហូបអាហារនិងសម្លៀកបំពាក់សម្រាប់ខ្លួនគាត់ដោយសារតែក្រុមហ៊ុនដែលគាត់ធ្វើការ គេផ្តល់អាហារដោយឥតគិតថ្លៃនិងឯកសណ្ឋានផងដែរ។ចំណែកឯប្រាក់ដែលនៅសល់ពីការបរិច្ចាគ គឺគាត់ទុកប្រើប្រាស់សម្រាប់ការចំណាយចាំបាច់មួយចំនួន ដូចជាមធ្យោបាយដឹកជញ្ជូននិងទូរសព្ទប្រចាំថ្ងៃ។
លោក Ma បានប្រាក់កាសែតក្នុងស្រុកមួយថា ក្នុងរយៈពេល ១៩ ឆ្នាំកន្លងមកនេះ លោកបានបរិច្ចាគថវិកាសរុបប្រមាណជាង ៧៥ ម៉ឺនដុល្លារ ទៅឲ្យមនុស្សផ្សេងៗគ្នាជាច្រើននាក់។
ទោះបីជាលោក Maបានបង្ហាញនូវភាពមនុស្សធម៌របស់លោកក៏ដោយ ប៉ុន្តែទង្វើនេះបានធ្វើឲ្យប៉ះពាល់ដល់គ្រួសាររបស់លោកផងដែរ ព្រោះថាបច្ចុប្បន្ននេះលោករស់នៅជាមួយឪពុកម្តាយដែលមានអាយុប្រហែល៧០ ឆ្នាំដូចគ្នា ហើយពួកគាត់ធ្វើជាកម្មករអនាម័យ។
ម្តាយរបស់លោក Ma បានដឹងព័ត៌មានថាលោកបានផ្ដល់ប្រាក់ជាច្រើន ជួយដល់សិស្សទាំងនោះហើយគាត់ក៏បានសុំឱ្យលោកឈប់បរិច្ចាគប្រាក់តទៅទៀត ដើម្បីសន្សំប្រាក់ខ្លះសម្រាប់ថ្ងៃអនាគតប៉ុន្តែលោកMa បានបដិសេធ៕
© រក្សាសិទ្ធិដោយ thmeythmey.com