ល្បែងប្រជាប្រិយបាត់បង់បន្តិចម្តងៗ

បទវិភាគ

ល្បែងប្រជាប្រិយបាត់បង់បន្តិចម្តងៗ

15, Apr 2017 , 8:00 am

រូបភាព

ដោយ:

ភ្នំពេញ៖ ក្នុងពិធីបុណ្យចូលឆ្នាំថ្មីម្ដងៗ តែងតែមានការលេងល្បែងប្រជាប្រិយនៅតាមវត្តអារាម ឬទីសាធារណៈដែលរៀបចំពីអាជ្ញាធរមូលដ្ឋាន។ តាំងពីយូរលង់មកហើយ ល្បែងប្រជាប្រិយ ត្រូវបានគេលេងក្នុងពិធីបុណ្យចូលឆ្នាំខ្មែរ ដែលធ្លាប់មានរយៈពេលមួយសប្ដាហ៍ឬច្រើនជាងនេះ និងមានរយៈពេលបីថៃ្ងក្នុងសម័យបច្ចុប្បន្ន។ ទោះបីជាយ៉ាងនេះក៏ដោយ ក៏ជាទូទៅយើងបានសង្កេតឃើញថាការលេងល្បែងប្រជាប្រិយខ្មែរក្នុងទិវាបុណ្យចូលឆ្នាំថ្មីក្នុងសម័យបច្ចុប្បន្នបានថយចុះគួរកត់សម្គាល់។

តើមានមូលហេតុអ្វីខ្លះដែលបណ្ដាលឱ្យការលេងល្បែងប្រជាប្រិយខ្មែរ ក្នុងទិវាចូលឆ្នាំថ្មី មានការថយចុះដូច្នេះ?

យោងតាមការពិនិត្យសង្កេត និងការវិភាគរបស់យើង យើងអាចសន្និដ្ឋានបានថា មូលហេតុធំៗ ដែលនាំឱ្យការលេងល្បែងប្រជាប្រិយខ្មែរក្នុងទិវាចូលឆ្នាំថ្មី មានការថយចុះ មានដូចតទៅ៖

1.    ខ្វះការផ្ដួចផ្ដើមគំនិតនិងការរៀបចំពីភាគីពាក់ព័ន្ធ ដូចជា ចាស់ទុំក្នុងស្រុក ព្រះសង្ឃនិងគណៈកម្មការវត្ត
2.    ខ្វះការលើកទឹកចិត្ត ការជំរុញ និងការបង្កលក្ខខណ្ឌងាយស្រួលពីអាជ្ញាធរពាក់ព័ន្ធ ក្នុងការរៀបចំការលេងល្បែងប្រជាប្រិយ
3.    វត្តមួយចំនួនមិនមានទីធ្លាសមស្របសម្រាប់លេងល្បែងប្រជាប្រិយ ជាពិសេស វត្តនៅទីក្រុង និងទីប្រជុំជន ដោយសារតែ ទីធ្លាទាំងនោះត្រូវគេសង់កុដិ និងចេតិយស្អេកស្កះ។ ចំពោះវត្តនៅជនបទវិញ ថ្វីបើនៅមានទីលានអាចលេងបាន ប៉ុន្តែក៏មិនមានប្រជាជនច្រើនទៅលេងទេ ដោយសារតែ អ្នកស្រុក ជាពិសេស យុវជនបានធ្វើចំណាកស្រុកទៅរការងារធ្វើនៅក្រៅប្រទេស។ ម្យ៉ាងទៀត ព្រះសង្ឃនិងគណៈកម្មការវត្តក៏មិនយល់ថា ខ្លួនមានកាតព្វកិច្ចត្រូវតែរៀបចំវត្តអារាមដើម្បីត្រៀមឱ្យប្រជាជនមកលេងល្បែងប្រជាប្រិយដែរ។
4.    ប្រជាជនមួយចំនួន ជាពិសេស អ្នកមានលទ្ធភាពតែងតែធ្វើដំណើរទៅកម្សាន្តតាមតំបន់ទេសចរណ៍នានា នាឱកាសចូលឆ្នាំថ្មី ដោយមិនបាននៅចូលរួមលេងល្បែងប្រជាប្រិយនៅតាមវត្តអារ៉ាម ឬស្រុកភូមិរបស់ខ្លួន។ ឯនៅតំបន់ទេសចរណ៍ទៀតសោត ភាគច្រើនក៏មិនមានការលេងល្បែងប្រជាប្រិយដែរ មានតែការបរិភោគជុំគ្នា ការទិញវត្ថុអនុស្សាវរីយ៍ ការជះទឹក ការប៉ាតម្សៅ និងអាចមានការរាំកម្សាន្តខ្លះដែរ ប៉ុន្តែ ភាគច្រើនគេចូលចិត្តរាំចង្វាក់បរទេសច្រើនជាង។
5.    ប្រជាពលរដ្ឋខ្មែរបច្ចុប្បន្ន មានមធ្យោបាយធ្វើដំណើរបានឆាប់រហ័ស និងបានឆ្ងាយជាងមុន ដែលផ្ដល់លទ្ធភាពឱ្យពួកគេធ្វើដំណើរកម្សាន្តទៅកាន់កន្លែងឆ្ងាយៗពីស្រុកកំណើត ជាហេតុដែលនាំឱ្យពួកគេមិនសូវបានចូលរួមលេងល្បែងប្រជាប្រិយនៅតំបន់របស់ខ្លួន
6.    ប្រជាពលរដ្ឋខ្មែរមួយចំនួន ជាពិសេសយុវវ័យ ទទួលយកឥទ្ធិពលនៃវប្បធម៌របស់ប្រទេសជិតខាង ដូចជា ការបាញ់ទឹក ការគប់ទឹក ការជះទឹក និងការប៉ាតម្សៅជាដើម ដែលពួកគេយល់ថាសប្បាយជាងការលេងល្បែងប្រជាប្រិយខ្មែរ
7.    ប្រជាជនមួយចំនួន ចូលចិត្តលេងល្បែងស៊ីសង ដូចជា បៀ អាប៉ោង ខ្លាឃ្លោក ប្រជល់មាន់...ជាងល្បែងប្រជាប្រិយ។
តាមពិតនៅមានកត្តាជាច្រើនទៀត ដែលយើងមិនអាចរៀបរាប់អស់នៅទីនេះ។ ជាការឆ្លើយតបនឹងបញ្ហានេះ តើយើងត្រូវធ្វើដូចម្ដេចដើម្បីដោះស្រាយ? ក្នុងនាមអ្នកតាមដានបញ្ហានេះ

យើងគិតថា ដើម្បីលើកកម្ពស់ការស្រុតចុះនៃការលេងល្បែងប្រជាប្រិយខ្មែរក្នុងពិធីបុណ្យចូលឆ្នាំថ្មី យើងគួរធ្វើដូចខាងក្រោម៖
1.    ចាស់ទុំក្នុងស្រុក ព្រះសង្ឃ និងគណៈកម្មការវត្ត ត្រូវផ្ដួចផ្ដើមគំនិតក្នុងការរៀបចំឱ្យមានការលែងល្បែងប្រជាប្រិយឱ្យបានកុះករ អធិកអធមក្នុងមូលដ្ឋានរបស់ខ្លួន
2.    ក្រសួង មន្ទីរ ការិយាល័យពាក់ព័ន្ធ និងអាជ្ញាធរមូលដ្ឋាន ត្រូវលើកទឹកចិត្ត ជំរុញ បង្កលក្ខខណ្ឌងាយស្រួល និងផ្ដល់លទ្ធភាពដើម្បីឱ្យមានការរៀបចំលេងល្បែងប្រជាប្រិយនៅគ្រប់វត្តអារាម និងទីសាធារណៈផ្សេងៗ ដូចដែលគេបានធ្វើជារូបភាពអង្គរសង្ក្រាននៅខេត្តសៀមរាប និងពិធីបុណ្យចូលឆ្នាំថ្មីនៅវត្តភ្នំរៀងរាល់ឆ្នាំជាដើម។
3.    គួរបំផុសឱ្យមានការចូលរួមពីពលរដ្ឋគ្រប់ស្រទាប់ ទាំងអ្នកមានទាំងអ្នកក្រ ជាពិសេស គួរលើកទឹកចិត្តឱ្យអ្នកមានផ្ដល់លទ្ធភាពក្នុងការទិញសម្ភារៈ និងមធ្យោបាយផ្សេងៗដើម្បីសម្រួលដល់ការលេងល្បែងប្រជាប្រិយក្នុងវត្តអារាម ឬមូលដ្ឋានរបស់ខ្លួន
4.    ទាំងអាជ្ញាធរពាក់ព័ន្ធ ព្រះសង្ឃ គណៈកម្មការវត្ត និងពលរដ្ឋគ្រប់ស្រទាប់វណ្ណៈ ត្រូវតែយល់ថា ពួកគេមានកាតព្វកិច្ចសង្គម ក្នុងការចូលរួមរៀបចំឱ្យមានការលែងល្បែងប្រជាប្រិយ ដើម្បីការសប្បាយរីករាយផងនិងដើម្បីជួយរក្សាមរតកវប្បធម៌របស់យើងក៏ដូចជាការជួយទាក់ទាញទេសចរណ៍ផងដែរ។