អន្តរជាតិ
អង់គ្លេសរកឃើញរ៉ែប្រេងកាតតម្លៃ ៤៤២ ពាន់លានដុល្លារនៅក្រោមព្រលានយន្តហោះមួយ
× ក្រុមហ៊ុនវិនិយោគប្រេង និងឧស្ម័ន(UKOG) របស់ចក្រភពអង់គ្លេស បានអះអាងថា ពួកគេបានរកឃើញអណ្ដូងប្រេងមួយ ដែលអាចមានរ៉េប្រេងកាតរហូតជាង ១០០ ពាន់លានបារ៉ែល នៅក្រោមអាកាសយានដ្ឋាន Gatwick ទីក្រុងឡុងដ៍ ដែលមានតម្លៃគិតជាទឹកប្រាក់ប្រមាណជា៤៤២ ពាន់លានដុល្លារ។ នេះបើយោងតាមសារព័ត៌មាន RT ។
ប្រភពដដែលក៏បានឲ្យដឹងថា ទោះជាយ៉ាងណារហូតមកដល់ពេលនេះ ការរកឃើញអណ្ដូងប្រេងដ៏មហាសាសនេះ គឺមិនទាន់មានការអះអាងពីសំណាក់ក្រុមអ្នកជំនាញឯករាជ្យនៅឡើយទេ។ ខណៈពេលដែល ក្រុមហ៊ុន UKOG បានឱ្យដឹងថា ខ្លួនបានសាកល្បងខួងរករ៉ែនៅតំបន់នោះ ហើយបានរកឃើញថាមានប្រេង ១៥៨ លានធុង ក្នុងទំហំដី ២,៦ គីឡូម៉ែត្រការ៉េ។
ក្រុមហ៊ុនរុករករ៉ែមួយ ដែលមានមូលដ្ឋាននៅសហរដ្ឋអាមេរិក ធ្លាប់បានសិក្សាពីរ៉ែប្រងនៅក្នុងប្លុកនេះ បានប៉ាន់ប្រមាណថា រ៉ែប្រេងនៅទីនេះគឺគេអាចខួងយកវាបានតែចន្លោះពី ៥ ទៅ ១៥ ភាគរយ នៃចំនួនរ៉ែប្រេងសរុប។ នៅឆ្នាំ ២០៣០ ប្រេងក្នុងដីនៅតំបន់នេះ នឹងត្រូវគេផលិតបានពី ១០ ទៅ ៣០ ភាគរយ នៃតម្រូវការប្រេងសរុបរបស់អង់គ្លេស។
លោក Stephen Sanderson នាយកប្រតិបត្តិ ក្រុមហ៊ុន KONG ដែលមានអណ្ដូងប្រេងកាតមួយស្ថិតនៅតំបន់ខាងលើនេះ បានអះអាងថា ការរកឃើញរ៉ែប្រេងកាតនេះ គឺប្រហែលជាការរកឃើញរ៉ែប្រេង ធំជាងគេបំផុតនៅលើពិភពលោក ក្នុងរយៈពេល ៣០ ឆ្នាំចុងក្រោយនេះ៕
© រក្សាសិទ្ធិដោយ thmeythmey.com