អន្តរជាតិ
ស្ត្រីជនជាតិអាមេរិកវ័យ ៣៨ ឆ្នាំម្នាក់យកប្ដី ៨ នាក់នៅក្នុងពេលតែមួយ
×
ឯកសារមួយរបស់តុលាការក្នុងតំបន់ Bronx ក្នុងទីក្រុងញូវយ៉ក បានបញ្ជាក់ថា មានស្ត្រីវ័យ ៣៨ ឆ្នាំបានរៀបការយកប្ដី ៨ នាក់នៅក្នុងពេលតែមួយ។ នេះបើយោងតាមការចុះផ្សាយរបស់កាសែត New York Post ។
កាសែតខាងលើក៏បានរាយការន៍ថា អ្នកស្រី Liana Barrientos ធ្លាប់បានរៀបការចំនួន ១០ ដងរួចមកហើយ ចាប់តាំងពីឆ្នាំ ១៩៩៩ ។ស្ត្រីវ័យ ៣៨ ឆ្នាំរូបនេះ ធ្លាប់រស់នៅជាមួយមនុស្សដែលបានរៀបការជាមួយនាង ៦ នាក់ក្នុងពេលតែមួយ បន្ទាប់មកនៅឆ្នាំ ២០០២ មានបុរសម្នាក់បានដាក់ពាក្យលែងលះជាមួយនាង ប៉ុន្តែមកដល់ឆ្នាំ ២០០៣ រៀបការជាមួយមនុស្សប្រុស ៣ នាក់បន្ថែមទៀត។
បន្ទាប់ពីបុរសម្នាក់ក្នុងចំណោមបីនាក់ដែលនាងបានរៀបការជាមួយ កាលពីឆ្នាំ២០០៣ នោះ បានបោះបង់នាងចោល រួចហើយនាងក៏បានរៀបការជាលើកចុងក្រោយម្ដងទៀត ជាមួយបុរសម្នាក់នៅថ្ងៃទី ៤ ខែមីនា ឆ្នាំ២០១០ ។
ព្រះរាជអាជ្ញាតុលាការមិនបានបញ្ជាក់ពី មូលហេតុដែលនាំឲ្យអ្នកស្រី Barrientos រៀបការយ៉ាងច្រើនដូច្នេះនោះទេ ប៉ុន្តែប្រភពមួយបានឱ្យដឹងថា នេះគឺដោយសារតែភាពមិនចេះស្រលាញ់គ្នា។
បន្ទាប់ពីបែកធ្លាយរឿងរ៉ាវនេះ អ្នកស្រី Barrientos ត្រូវបានតុលាការចោទប្រកាន់ពីបទក្លែងបន្លំឯកសារគតិយុត្តិ ដោយនាងត្រូវបានចោទប្រកាន់ ពីបទបន្លំឯកសារដើម្បីយកទៅរៀបចំពិធី អាពាហ៍ពិពាហ៍ របស់នាងកាលពីឆ្នាំ ២០១០ ដើម្បីបញ្ជាក់ថា នាងមិនដែលបានរៀបការមុនមកនោះទេ។អ្នកស្រី Barrientos ក៏ត្រូវបានគេចោទប្រកាន់ ពីបទប្ដូរឈ្មោះផ្សេងជាច្រើនដង នៅក្នុងឯកសារអាពាហ៍ពិពាហ៍ផងដែរ៕
© រក្សាសិទ្ធិដោយ thmeythmey.com