អន្តរជាតិ
អគារខ្ពស់ទាំង ១០ ក្នុងពិភពលោក ដែលចំណាយប្រាក់សាងសង់ច្រើនជាងគេបំផុត
× ការសាងសង់អគារខ្ពស់ៗកប់ពពក ត្រូវគេសាងសង់ឡើង និងមានអគារខ្លះទៀតកំពុងត្រូវបានគេសាងសង់នៅក្នុងបណ្ដាប្រទេសជាច្រើននៅក្នុងពិភពលោក ដើម្បីជាការប្រកួតប្រជែងពីកម្រិតរីកចម្រើនរបស់ប្រទេសនីមួយៗ ។ មិនត្រឹមតែអគារកាន់តែខ្ពស់នោះទេ ប៉ុន្តែអគារទាំងនោះត្រូវបានគេសាងសង់ឡើងដោយមានបំពាក់បច្ចេកវិទ្យាទំនើបៗ ដែលជាសម្ភារៈចុងក្រោយបង្អស់ និងធ្វើយ៉ាងណាដើម្បីប្រើប្រាស់ឲ្យបានយូរឆ្នាំ។
កាលពីពេលថ្មីនេះ ប្រព័ន្ធផ្ទុកទិន្នន័យផ្នែកអគារ និងគម្រោងសាងសង់ មានឈ្មោះថា Emporis មានមូលដ្ឋាននៅប្រទេសអាឡឺម៉ង់ បានចាត់ថ្នាក់អគារខ្ពស់ៗចំនួន ១០ គឺជាអគារកប់ពពកដែលគេចំណាយទឹកប្រាក់សម្រាប់សាងសង់ ច្រើនជាងគេបំផុត ក្នុងចំណោមអគារខ្ពស់ៗជាច្រើននៅលើពិភពលោក។
យោងតាមទិន្នន័យនោះ អគារ One World Trade Center នៅក្នុងទីក្រុង New York សហរដ្ឋអាមេរិក គឺជាអគារដែលបានចំណាយប្រាក់ច្រើនជាងគេក្នុងការសាងសង់ ដោយត្រូវចំណាយអស់ថវិកាសរុបចំនួន ៣,៩ ពាន់លានដុល្លារ។ អគារនេះ គឺជាអគារថ្មីមួយ ដែលត្រូវបានសាងសង់ឡើង ដើម្បីជំនួសឲ្យអគារភ្លោះ World Trade Center ចាស់ត្រូវបានក្រុមភេវរកម្ម ប្រើយន្តហោះដើម្បីបុកកម្ទេចកាលពីថ្ងៃទី ៩ ខែ កញ្ញា ឆ្នាំ ២០០១ កន្លងទៅនោះ។
ខាងក្រោមនេះគឺជាអគារខ្ពស់ៗទាំង ១០ ដែលចំណាយប្រាក់សាងសង់អស់ច្រើនជាងគេ៖
ទី១៖ អគារ One World Trade Center នៅក្នុងទីក្រុង New York សហរដ្ឋអាមេរិក អគារនេះត្រូវបានសាងសង់ឡើងដោយ ចំណាយអស់ថវិកាសរុបចំនួន ៣,៩ ពាន់លានដុល្លារ ជាមួយនឹងកម្ពស់ ១៧៧៦ ហ្វីត(ប្រហែល ៥៤១ ម៉ែត្រ) គឺជាលេខនៃឆ្នាំដែលអាមេរិកទទួលបានឯករាជ្យពីអង់គ្លេស។
ទី២៖ អគារ The Palazzo ក្នុងទីក្រុង Las Vegas សហរដ្ឋអាមេរិក ត្រូវចំណាយប្រាក់សាងសង់អស់ ១,៩ ពាន់លានដុល្លារ ជាមួយនឹងកម្ពស់ ១៩៥ ម៉ែត្រ។
ទី៣៖ អគារ The Shard ស្ថិតក្នុងទីក្រុងឡុងដ៍ប្រទេសអង់គ្លេស ត្រូវចំណាយប្រាក់ ១,៩ ពាន់លានដុល្លារ ដើម្បីសាងសង់ ជាមួយនឹងកម្ពស់ ៣០៦ ម៉ែត្រ។
ទី៤៖ អគារ Taipei 101ក្នុងទីក្រុង Taipei កោះតៃវ៉ាន់ ដែលបានចំណាយប្រាក់សាងសង់អស់ចំនួន ១,៧៦ ពាន់លានដុល្លារ ជាមួយនឹងកម្ពស់ ៥០៩ ម៉ែត្រ។
ទី៥៖ អគារ BurjKhalifa ក្នុងទីក្រុង Dubai ប្រទេសអារ៉ាប់រួម ត្រូវចំណាយថវិកាសាងសង់អស់ចំនួន ១,៥ ពាន់លានដុល្លារ ហើយមានកម្ពស់ ៨២៩ ម៉ែត្រ។
ទី៦៖ អគារ Sheraton Huzhou Hot Spring Resort មានរាងដូចខែរះ ក្នុងទីក្រុងHuzhou ប្រទេសចិន ត្រូវគេសាងសង់ឡើងអស់ទឹកប្រាក់ចំនួន ១,៥ ពាន់លានដុល្លារ កម្ពស់ ១០០ ម៉ែត្រ។
ទី៧៖ អគារ CapitaGreen ក្នុងប្រទេសសិង្ហបុរី ដែលអគារនេះត្រូវសាងសង់ឡើងដោយចំណាយទឹកប្រាក់ ១,៤ ពាន់លានដុល្លារ មានកម្ពស់ ២៤២ ម៉ែត្រ។
ទី៨៖ អគារ Elbphilharmonie ក្នុងទីក្រុង Hamburg ប្រទេសអាឡឺម៉ង់ អគារនេះត្រូវចំណាយប្រាក់សាងសង់អស់ចំនួន ១,០៣ ពាន់លានដុល្លារ ហើយមានកម្ពស់ ១១០ ម៉ែត្រ។
ទី៩៖ អគារ ធនគារជាតិអាមេរិក Bank of America Tower ស្ថិតក្នុងទីក្រុង New York អគារនេះត្រូវចំណាយប្រាក់សាងសង់អស់ចំនួនប្រហែល ១ ពាន់លានដុល្លារ មានកម្ពស់ ៣៦៥,៧ ម៉ែត្រ។
ទី១០៖ អគារ Chifley Tower ក្នុងទីក្រុង Sydney ប្រទេសអូស្ត្រាលី អគារនេះត្រូវចំណាយប្រាក់សាងសង់អស់ចំនួន ១ ពាន់លានដុល្លារ មានកម្ពស់ ២៤៤ ម៉ែត្រ៕
© រក្សាសិទ្ធិដោយ thmeythmey.com