អន្តរជាតិ
មហន្តរាយជនអន្តោប្រវេសន៍៖អ៊ីតាលីខឹងសហភាពអឺរ៉ុបដែលទំលាក់ថ្មបាក់លើខ្លួន
× ការលិចទូក លិចទាំងជនអន្តោប្រវេសន៍រាប់រយនាក់ នៅសមុទ្រមេឌីទែរ៉ាណេ កាលពីថ្ងៃអាទិត្យចុងសប្តាហ៍មុន បានធ្វើអោយរដ្ឋាភិបាលអ៊ីតាលីខឹងសម្បារសហភាពអឺរ៉ុបកាន់តែខ្លាំង។ រដ្ឋាភិបាលក្រុងរ៉ូមបានចោទអឺរ៉ុបថា ទុកអោយខ្លួនដោះស្រាយបញ្ហាទាំងនេះតែម្នាក់ឯង។ កាលពីថ្ងៃព្រហស្បតិ៍ ទូកដឹកមនុស្សជាង៤០នាក់ផ្សេងទៀត ក៏បានលិចនៅសមុទ្រមេឌីទែររ៉ាណេដែរ ធ្វើអោយមនុស្ស៤១នាក់បាត់ខ្លួន។
នៅថ្ងៃអាទិត្យសប្តាហ៍មុន ជនភៀសខ្លួនជាង៥០០នាក់បានជិះទូកចេញមកពីលីប៊ី ដើម្បីចូលទៅអ៊ីតាលី។ ជាអកុសល ទូកបានលិចនៅសមុទ្រមេឌីទែររ៉ាណេ។ ក្រុមសង្គ្រោះស្រង់បានតែមនុស្សប្រមាណ១៥០នាក់ រីឯ៤០០នាក់ទៀត បានបាត់ដំណឹងសូន្យឈឹង។ តួលេខនេះមិនគិតពីជនភៀសខ្លួន៥០០នាក់ដែលបានស្លាប់ ដោយការលិចទូក តាំងពីដើមឆ្នាំ២០១៥ផង។ ប្រៀបនឹងឆ្នាំមុន ក្នុងពេលដូចគ្នានេះ ជនអន្តោប្រវេសន៍រងគ្រោះដោយការលិចទូក មានមិនដល់៥០នាក់ឡើយ។ រដ្ឋាភិបាលអ៊ីតាលីខឹងសម្បារយ៉ាងខ្លាំងចំពោះសហភាពអឺរ៉ុប ដែលហាក់គ្មានសមត្ថភាពដោះស្រាយមហន្តរាយជនភៀសខ្លួន ទុកអោយអ៊ីតាលីរ៉ាប់បញ្ហាតែម្នាក់ឯង។
អ៊ីតាលីស្ថិតនៅភាគខាងត្បូងទ្វីបអឺរ៉ុប ចេញពីអ៊ីតាលី ឆ្លងតែសមុទ្រមេឌីទែររ៉ាណេបន្តិច គឺទៅដល់ទ្វីបអាហ្វ្រិកហើយ។ ជនអន្តោប្រវេសន៍ភៀសខ្លួនពីសង្គ្រាមនិងអសន្តិសុខ នៅអាហ្វ្រិកតែងប្រថុយជីវិត រត់តាមទូក ចូលទៅអ៊ីតាលី រឺប្រទេសផ្សេងទៀត នៅអឺរ៉ុបខាងត្បូងបែបយ៉ាងអេស្ប៉ាញ។ សង្គ្រាមមួយរយៈចុងក្រោយនៅលីប៊ី បានធ្វើអោយមនុស្សភៀសខ្លួនទៅអឺរ៉ុបកាន់តែច្រើន។ ភាគខាងត្បូងអ៊ីតាលីរងថ្មបាក់មុនគេ ព្រោះនៅក្បែរអាហ្វ្រិកបំផុត។ ក្រុងអ៊ីតាលីមួយចំនួនដែលទទួលជួយជនភៀសខ្លួន បែបយ៉ាងក្រុងReggio ដែលជួបបញ្ហាសេដ្ឋកិច្ចស្រាប់ហើយនោះ ឥឡូវត្រូវប្រឈមជនភៀសខ្លួន ត្រូវជួួយព្យាបាលជំងឺឆ្លងរបស់ពួកគេ ជួយដោះស្រាយបញ្ហាផ្លូវចិត្តពួកគេទៀត។ រដ្ឋាភិបាលបានសុំរដ្ឋអំណាចឃុំសង្កាត់អោយជួយរកកន្លែងរាប់ពាន់ ជាបន្ទាន់ សម្រាប់ជនភៀសខ្លួន។ បើយោងតាមសារព័ត៌មានក្នុងស្រុក ក្រសួងមហាផ្ទៃប្រហែលជាត្រូវយកបន្ទាយទាហានច្រើនកន្លែង អោយជនអន្តោប្រវេសន៍ស្នាក់នៅផងដែរ។
ខណៈនៅអឺរ៉ុបខាងត្បូង អ៊ីតាលីទប់នឹងលំហូរជនភៀសខ្លួនស្ទើរប្រកាច់ប្រកិន បណ្តាប្រទេសភាគខាងជើងអឺរ៉ុបវិញបានរឹតបន្តឹងការត្រួតពិនិត្យ អន្តោប្រវេសន៍ខុសច្បាប់ តែនៅតាមអាកាសយានដ្ឋានប៉ុណ្ណោះ។ ពួកអឺរ៉ុបខាងជើងគិតថា ដោះស្រាយរឿងនេះរួចគឺរួចហើយ ភ្លេចគិតជួួយមើលអ៊ីតាលីនៅខាងត្បូង ដែលទប់ជនអន្តោប្រវេសន៍ខុសច្បាប់តែម្នាក់ឯង។ ប្រាកដណាស់ដែលអ៊ីតាលីខឹងនឹងភាពមិនចេះជួយគ្នានៅអឺរ៉ុបនេះ។ ពេលនេះ អន្តោប្រវេសន៍ខុសច្បាប់មិនមែនជាបញ្ហាចោទទេសម្រាប់អ៊ីតាលី។ បញ្ហាចោទគឺថា សហភាពអឺរ៉ុបគ្មានដំណោះស្រាយអ្វីមានប្រសិទ្ធភាព។ រឿងធ្ងន់គឺថា បើទូកជនអន្តោប្រវេសន៍នៅតែបន្តចូលមកអឺរ៉ុបនិងបន្តលិចនៅសមុទ្រ មហន្តរាយគឺអាយុជីវិតអ្នករត់គេចពីសង្គ្រាមទាំងនោះឯង។
ជនភៀសខ្លួន ទាំងនោះភាគច្រើនត្រូវបង់លុយមេខ្យល់ ដើម្បីបានឡើងជិះទូកឈើកញ្ចាស់មកអឺរ៉ុប។ ក្រោយរបបកាដាហ្វុីនៅលីប៊ីដួលរលំមក ការកេងចំណេញលុយពីជនភៀសខ្លួនបានក្លាយជារបររបស់ក្រុមឧក្រិដ្ឋ និងក្រុមម៉ាហ្វុីយ៉ា។ បើទោះជាមនុស្សស្លាប់លិចទូករាប់រយនាក់ ជនឧក្រិដ្ឋមិនខ្លាចនឹងគំរាមវាយតប់កងល្បាតឆ្នេរ ដណ្តើមយកទូកកញ្ចាស់របស់ពួកគេ យកទៅរកស៊ីបន្តទៀតឡើយ។ មិនមែនថាអឺរ៉ុបគ្មានវិធានការឡើយ តែជាវិធានការទន់ខ្សោយ។ អឺរ៉ុបធ្លាប់ដាក់ចេញប្រតិបត្តិការមួយឈ្មោះMare Nostrum ប្រយុទ្ធនឹងក្រុមឧក្រិដ្ឋ និងបានជួយសង្គ្រោះជីវិតជនភៀសខ្លួន។ ប៉ុន្តែ តាំងពីខែវិច្ឆិកាឆ្នាំមុនមក ប្រតិបត្តិការនេះបានបញ្ឈប់ និងជំនួសដោយប្រតិបត្តិការថ្មីមួយទៀត ឈ្មោះTriton មានទិសដៅប្រឆាំងតែក្រុមល្មើសប៉ុណ្ណោះ គ្មានទិសដៅសង្គ្រោះជីវិតជនរងគ្រោះដូចមុនឡើយ។
ពាក្យថា អន្តោប្រវេសន៍ខុសច្បាប់គ្មានន័យល្អប៉ុន្មានឡើយសម្រាប់អឺរ៉ុប។ ទោះយ៉ាងនេះក្តី អ៊ីតាលីមិនអាចបើកភ្នែក ទុកអោយជនភៀសខ្លួនបន្តលង់ទឹកស្លាប់ឡើយ អ៊ីតាលីត្រូវតែទទួលពួកគេអោយស្នាក់នៅ។ អ៊ីតាលីបានទាមទារអោយសហភាពអឺរ៉ុបជួយជាថវិកាក្នុងប្រតិបត្តិការសង្គ្រោះ និងជួយដោះស្រាយបញ្ហានៅតំបន់សង្គ្រាមនិងអសន្តិសុខដូចជាស៊ីរី អ៊ីរ៉ាក់ នីហ្សេ រឺក៏ម៉ាលី ព្រោះវាជាប្រភពអន្តោប្រវេសន៍ខុសច្បាប់ ប្រភពមហន្តរាយជីវិតជនភៀសខ្លួន៕
© រក្សាសិទ្ធិដោយ thmeythmey.com