អន្តរជាតិ
×![]()
ដោយ: ថ្មីៗ
សញ្ញារលកយក្សស៊ូណាមិលេចចេញជាថ្មីម្តងទៀតហើយនៅក្នុងប្រទេសជប៉ុន ដោយមានរលករញ្ជួយបាតសមុទ្រកម្រិត ៦.៨រ៉ិកទ័រនៅថ្ងៃចន្ទនេះ។ ក្រោយមានរលករញ្ជួយ អាជ្ញាធរជប៉ុនបានផ្តល់សញ្ញាប្រកាសអាសន្នខ្លាំងនៅតំបន់ពីរដូចជា Miyakojima និងYaeyama ដែលអាចរងគ្រោះដោយរលកយក្ស ។ ប៉ុន្តែយ៉ាងណាក៏ដោយ ការប្រកាសអាសន្នត្រូវបានដកចេញក្រោយគ្មានរលករញ្ជួយធំៗកើតឡើង។
នៅថ្ងៃចន្ទនេះ សញ្ញាប្រកាសអាសន្នស្តីពីរលកយក្សស៊ូណាមីត្រូវបានដាក់ចេញដោយអាជ្ញាធរជប៉ុន ក្រោយមានរលករញ្ជួយក្រោមសមុទ្រកម្រិតខ្ពស់ ៦.៨ រ៉ិកទ័រ។ ករណីរញ្ជួយនេះបានកើតឡើងនៅតំបន់សមុទ្រក្បែរតំបន់តៃវ៉ាន់ ហើយក្រោយកើតឡើងភ្លាមអាជ្ញាធរជប៉ុនបានដាក់ចេញសញ្ញាប្រកាសអាសន្នក្រែងរលកយក្សស៊ូណាមីកើតឡើងផង។ តំបន់ចំនួនពីរស្ថិតក្រោមការត្រួតពិនិត្យ និងអាចប្រឈមការវាយប្រហារដោយរលកយក្សស៊ូណាមិ ក្នុងនោះមានដូចជា Miyakojimaនិង Yaeyama។
អាជ្ញាធរជប៉ុនបានប្រកាសអោយប្រជាជនចាកចេញអោយឆ្ងាយពីតំបន់ដែលស្ថិតក្នុងភាពប្រកាសអាសន្ន ដើម្បីធានាថា ប្រជាជនជប៉ុនគ្មានគ្រោះថ្នាក់ បើមានការវាយប្រហារដោយរលកយក្សមែននោះ។ ការរញ្ជួយក្រោមសមុទ្រកម្រិត ៦.៨រ៉ិកទ័រនេះ កើតមានឡើងនៅចន្លោះកោះអូគីណាវ៉ាជប៉ុន និងកោះតៃវ៉ាន់។
បើយោងតាមស្ថាប័នផ្តល់សញ្ញាប្រកាសអាសន្នស្តីពីគ្រោះមហន្តរាយរលកយក្សស៊ូណាមិប៉ាស៊ីហ្វិក គេព្រួយបារម្ភថារលកយក្សមានរយៈកម្ពស់ទាបបំផុត១ម៉ែត្រអាចកើតឡើងនិងវាយប្រហារតំបន់ស្ថិតនៅភាគនីរតីប្រទេសជប៉ុន ប៉ុន្តែយ៉ាងណាក៏ដោយមិនមានសញ្ញាណាមួយបញ្ជាក់ថាមានរលកយក្សស៊ូណាមីឡើយ។
មកទល់ពេលនេះ គេមិនទាន់ឃើញមានរលកធំៗ ឬការវាយប្រហារដោយរលកយក្សកើតមានឡើងឡើយ។ ក្រោយមិនមានរលកធំៗដូចការភ័យខ្លាចទេនោះ អាជ្ញាធរជប៉ុនបានសម្រេចដកចេញការប្រកាសអាសន្នវិញ ៕
© រក្សាសិទ្ធិដោយ thmeythmey.com
