ជាតិ
ពីនេះ ពីនោះ
សង្គមជាតិ
គិតតែរិះគន់គេ តែខ្លួនឯងគ្មានបានធ្វើអ្វីសោះ! មិនយល់...?
× ប្រជាជនខ្មែរមួយចំនួនពូកែណាស់ខាងរិះគន់អ្នកដទៃ និងសកម្មភាពក្នុងសង្គមមួយចំនួន ដែលខ្លួនគិតថា មិនត្រឹមត្រូវ ។ ក្នុងមួយថ្ងៃៗ ពួកគេអង្គុយតែសំឡឹងរកមើលតែកំហុសអ្នកដទៃ ដើម្បីរិះគន់បំពេញតាមចិត្តខ្លួន ។ សម័យបច្ចុប្បន្ន បណ្តាញសង្គមហ្វេសប៊ុកជាទីពេញនិយម សម្រាប់ពួកគេរិះគន់នរណាម្នាក់នៅពេលដែលខ្លួនមិនពេញចិត្ត ។ជាការពិតហើយថា ការិះគន់ក្នុងន័យស្ថាបនា អាចធ្វើឲ្យបុគ្គល ឬសកម្មភាពមិនល្អក្នុងសង្គមផ្លាស់ប្តូរទៅជាល្អ។ ហើយការរិះគន់ ក្នុងន័យស្ថាបនា ជាចំណុចដែលមិនអាចខ្វះបានក្នុងសង្គមប្រជាធិបតេយ្យ។ ក៏ប៉ុន្តែពេលខ្លះការរិះគន់របស់ប្រជាជនមួយចំនួន ត្រូវគេមើលឃើញថា ធ្វើឡើងហាក់បីដូចជា ហួសហេតុ ឬជ្រុលពេក តាមតែចិត្តរបស់ខ្លួន ពោលគឺឲ្យតែឃើញសកម្មភាពអ្វីមួយដែលផ្ទុយពីចិត្ត ឬក្រុមរបស់ខ្លួន គឺខុសទាំងអស់ ។
មិនបាច់និយាយដល់រឿងរ៉ាវកន្លងមកយូរនោះទេ ជាក់ស្តែងកាលពីក្នុងពិធីបុណ្យចូលឆ្នាំថ្មីៗនេះ ស្រាបៀរអង្គរដែលឧបត្ថម្ភដល់កីឡាករជ័យលាភីប្រកួតអុកក្នុងព្រឹត្តិការណ៍សង្ក្រាន្តកន្លងទៅ ដែលគ្រាន់តែកីឡាករទទួលរង្វាន់ហើយមានជាប់ស្លាកស្រាបៀរអង្គរ ក៏ត្រូវប្រជាជនខ្មែរមួយចំនួនកើតទុក្ខ មិនសុខចិត្តរិះគន់យ៉ាងផុសផុលផងដែរ។ ពួកគេរិះគន់ ដោយសារម្ចាស់ជ័យលាភីស្តេចអុកឆ្នាំ ២០១៥ កាន់ស្លាកទទួលប្រាក់រង្វាន់ពីស្រាបៀរអង្គរ ដែលពួកគេ គិតថា មិនល្អនោះឡើយ ព្រោះតែមានក្រុមហ៊ុនស្រាបៀរជាអ្នកឧបត្ថម្ភ។ តែនៅពេលសួរថា បើអ្នករិះគន់ មិនចង់ឲ្យក្រុមហ៊ុនស្រាបៀរឧបត្ថម្ភប្រាក់ដល់កីឡាករនោះ តើខ្លួនឯងដែលជាអ្នករិះគន់នោះ បានឧបត្ថម្ភលើកទឹកចិត្តដល់កីឡាករដែលពួកគេត្រូវការប្រាក់រង្វាន់ដែរឬទេ ? ចម្លើយអត់ទាល់តែសោះ គ្រាន់តែរិះគន់ប៉ុណ្ណោះ ។ មិនយល់...? © រក្សាសិទ្ធិដោយ thmeythmey.com