ជាតិ
សង្គមជាតិ
អ្នកជំនាញអះអាងថា ភ្លៀងធ្លាក់លាយដុំទឹកកកតូច ជាបាតុភូតធម្មតា អ្នករាជធានីភ្នំពេញ និងអ្នកក្រុងសៀមរាបបានភ្ញាក់ផ្អើលចំពោះបាតុភូតធ្លាក់ដុំទឹកកក ដែលលាយឡំជាមួយភ្លៀងធំនៅរសៀលថ្ងៃទី២២ខែមេសានេះ។
ភ្លៀងមិនបានធ្លាក់ជាទូទៅនៅក្នុងក្រុងនិងរាជធានីទាំងពីរទេ ដូច្នេះអ្នកខ្លះក៏មិនបានដឹងអំពីបាតុភូតនេះ ហើយបានត្រឹមតែមើលតាមបណ្តាញសង្គមហ្វេសប៊ុក ដែលអ្នកបានឃើញដុំទឹកកកធ្លាក់ ថតបង្ហោះ។
លោក អ៊ុំ រីណា ប្រធាននាយកដ្ឋានឧតុនិយមនៃក្រសួងធនធានទឹក និងឧតុនិយមបានពន្យល់ប្រាប់សារព័ត៌មានថ្មីៗនៅព្រលប់ថ្ងៃពុធនេះថា នេះគឺជាបាតុភូតធម្មតាមួយ បន្ទាប់ពីអាកាសធាតុក្តៅខ្លាំង ហើយថាសីតុណ្ហភាពនៅក្នុងដុំពពកក្រាស់ខ្លះមានកម្រិតក្រោមសូន្យអង្សារនោះ។ លោក អ៊ុំ រីណា បានបញ្ជាក់យ៉ាងដូច្នេះ៖«នេះជាបាតុភូតធម្មតាទេ។ វាបានកើតតាំងពីម្សិលមិញ (ថ្ងៃអង្គារ) នៅក្នុងខេត្តមណ្ឌលគិរី។ តាមពិតដុំទឹកកកពិតប្រាកដដែលធ្លាក់ពីក្នុងពពកមក ត្រូវធំជាងនេះផង។ ប៉ុន្តែទំរាំវាធ្លាក់មកដល់ដី ត្រូវទឹក ត្រូវខ្យល់ ទើបយើងឃើញវាតូចៗអ៊ីចឹង»។
ចំពោះលោក អ៊ុំ រីណា ប្រសិនបើដុំទឹកកកធ្លាក់ដូចគ្នានៅពេលគ្មានភ្លៀង នោះទើបជាការព្រួយបារម្ភ។ នេះមិនមែនជាឆ្នាំដំបូងដែរ ដែលមានដុំទឹកកកតូចៗធ្លាក់លាយឡំជាមួយទឹកភ្លៀង។ កាលពីប៉ុន្មានឆ្នាំមុន ក៏មានបាតុភូតដូចគ្នានៅខេត្តមណ្ឌលគិរី និងរតនគិរី ហើយមនុស្សម្នាបានថតបង្ហាញ ចែករំលែកប្រាប់គ្នានៅក្នុងបណ្តាញសង្គមហ្វេសប៊ុកដូចគ្នានដែរ៕
© រក្សាសិទ្ធិដោយ thmeythmey.com