អន្តរជាតិ
នយោបាយអន្តរជាតិ
បញ្ហាសមុទ្រចិនខាងត្បូងអាចក្តៅជាថ្មីពេលម៉ាឡេស៊ីជាប្រធានកិច្ចប្រជុំអាស៊ាន
× សកម្មភាពរបស់ចិនជាបន្តបន្ទាប់ នៅតំបន់ត្រួតស៊ីគ្នាក្នុងសមុទ្រចិនខាងត្បូងជាមួយភាគីជម្លោះហ្វីលីពីន និងវៀតណាម អាចក្លាយជាក្តៅថ្មីទៀតនៅក្នុងកិច្ចប្រជុំកំពូលអាស៊ានឆ្នាំ២០១៥នេះ ស្របពេលដែលលោកប្រធានាធិបតីហ្វីលីពីន ប៊ែរនីណូ អាហ្គីណូ បានបញ្ជាក់ថា លោកនឹងលើកបញ្ហានេះដាក់ជារបៀបវារៈក្នុងកិច្ចប្រជុំកំពូលអាស៊ានដែលមានម៉ាឡេស៊ីជាប្រធាន។
ស្របពេលដែលកិច្ចប្រជុំកំពូលអាស៊ានកាន់តែខិតជិតមកដល់ បញ្ហាសមុទ្រចិនខាងត្បូង នឹងក្លាយជាប្រធានបទក្តៅគ្របដណ្តប់របៀបវារៈនៃកិច្ចប្រជុំខាងមុខ។ មេដឹកនាំកំពូលហ្វីលីពីនបានអះអាងថាខ្លួននឹងស្នើឲ្យ មេដឹកនាំអាស៊ាន ចេញសេចក្តីថ្លែងការណ៍រួមមួយ ដើម្បីថ្កោលទោសរដ្ឋាភិបាលទីក្រុងប៉េកាំងដែលហ៊ានរំលោភដែនអធិបតេយ្យរបស់ខ្លួន។ យ៉ាងណាក៏ដោយ ចំណោទបញ្ហាត្រូវបានលើកឡើងថា តើសេចក្តីថ្លែងការណ៍នោះ អាចនឹងធ្វើទៅរួចដែរឬទេ ខណៈពេលម៉ាឡេស៊ី ដែលជាប្រធាននោះមានទំនាក់ទំនងជិតស្និទ្ធជាមួយរដ្ឋាភិបាលរបស់លោក Xi Jinping។
នៅថ្ងៃទី ២៦ ខែមេសា ខាងមុខនេះ ម៉ាឡេស៊ី នឹងក្លាយជាម្ចាស់ផ្ទះនៃកិច្ចប្រជុំកំពូលអាស៊ានលើកទី២៦ ។ តាមការរំពឹងទុក បន្ទាប់ពីកម្ពុជា កិច្ចប្រជុំនៅម៉ាឡេស៊ីអាចនឹងក្លាយជាវេទិកាបញ្ចេញកំហឹងសារជាថ្មីរបស់ហ្វីលីពីន និង វៀតណាម ដើម្បីវាយប្រហារ ទៅលើមហាយក្សចិន។
អ្វីដែលគួរកត់សម្គាល់នោះ បញ្ហានេះតែងតែឡើងកម្តៅ នៅពេលដែលសមាជិកអាស៊ាន ដែលមាននិន្នាការងាកទៅរកចិន ធ្វើជាម្ចាស់ផ្ទះ។ តួយ៉ាង ក្នុងពេលដែលកម្ពុជាធ្វើជា ប្រធានអាស៊ាននៅក្នុងឆ្នាំ២០១២ កម្ពុជាបានក្លាយជាសមរភូមិរបស់ហ្វីលីពីន និង វៀតណាម ក្នុងការបញ្ចេញកំហឹង ដើម្បីវាយប្រហារ ទិតៀនចិន។
សម្រាប់កិច្ចប្រជុំកំពូលនៅក្នុងទីក្រុងកូឡាឡាំពួរ ខាងមុខ ប្រធានាធិបតីហ្វីលីពីន លោក ប៊ែរនីណូ អាហ្គីណូ នឹងស្នើឲ្យ មេដឹកនាំអាស៊ានចេញ សេចក្តីថ្លែងការណ៍រួមមួយ ដើម្បីថ្កោលទោស និង រិះគន់រដ្ឋាភិបាលទីក្រុងប៉េកាំងលើការទន្ទ្រានរំលោភដែនសមុទ្រជម្លោះក្បែរកោះស្ព្រាតលី ដែលជាតំបន់ ត្រួតស៊ីរវាង ហ្វីលីពីន និង ចិន។ ការស្នើសុំសេចក្តីថ្លែងការណ៍នេះ ហាក់ដូចជាការផ្ញើសារមួយទៅកាន់រដ្ឋាភិបាលម៉ាឡេស៊ី ក្នុងនាមជាប្រធានអាស៊ាន គួរត្រៀមទុកមុន និង រក្សាគោលជំហរបស់ខ្លួនឲ្យបានត្រឹមត្រូវ។
ម៉ាឡេស៊ី គឺជាប្រទេសមួយក្នុងចំណោមសមាជិកបួនរបស់អាស៊ានរួមមានប្រ៊ុយណេ ហ្វីលីពីន និងវៀតណាម ដែលជាប់ពាក់ពន្ធ័នឹងដែនជម្លោះសមុទ្រចិនខាងត្បូង។ យ៉ាងណាក៏ដោយ ចិន និង ម៉ាឡេស៊ី មិនធា្លប់មានវិវាទធ្ងន់ធ្ងរជាមួយគ្នានោះទេ។ ផ្ទុយទៅវិញ ប្រទេសទាំងពីរ មានទំនាក់ទំនងស្ងប់ស្ងាត់ និងជិតស្និទ្ធគ្នា ទាំងវិស័យការទូត និង ពាណិជ្ជកម្ម៕
© រក្សាសិទ្ធិដោយ thmeythmey.com