ជាតិ
សង្គមជាតិ
នាយករដ្ឋមន្ត្រីឲ្យក្រុមហ៊ុនគ្រប់គ្រងតំបន់ទេសចរណ៍នៅទន្លេសាបឈប់យកលុយពីភ្ញៀវ
× សៀមរាប៖ ប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន បានបង្គាប់ឲ្យស្ថាប័នគ្រប់គ្រង និងជាពិសេសក្រុមហ៊ុនលក់សំបុត្រចូលទស្សនាបឹងទន្លេសាប ត្រូវបញ្ឈប់ការលក់សំបុត្រដល់ភ្ញៀវទេសចរគ្រប់រូបភាព។ នេះបើយោងតាម សេចក្តីជូនដំណឹង ដែលចេញផ្សាយកាលពីពាក់កណ្តាលខែមេសាកន្លងទៅ។
ក្នុងស.ជ.ណ ឫសេចក្តីជូនដំណឹងរបស់លោកនាយករដ្ឋមន្ត្រី ហ៊ុន សែន បានបញ្ជាទៅក្រុមហ៊ុនចំនួន២ ឲ្យបញ្ឈប់អាជីវកម្មលក់សំបុត្រដល់ភ្ញៀវទេសចរ ដែលចូលទៅទស្សនានៅតំបន់ទន្លេសាប ក្នុងភូមិសាស្ត្រខេត្តសៀមរាប (លើកលែងតែតំបន់ចុងឃ្នៀស) មានតំបន់កំពង់ភ្លុកជាដើម។ ក្រុមហ៊ុនទាំងនោះមានក្រុមហ៊ុន ស៊ូជីញ (Sou Ching Port Investment Co,.LTD) និងក្រុមហ៊ុន ស៊ីផេក (Sea Pac Investment Co,.LTD) របស់កូរ៉េ។ «ក្នុងករណីក្រុមហ៊ុន មិនអនុវត្តតាមបទបញ្ជានេះ ក្រុមហ៊ុននឹងត្រូវប្រឈមនឹងការដកហូតគោលការណ៍វិនិយោគជាយកថាហេតុ»។ នេះជាខ្លឹមសារចុងក្រោយនៃស.ជ.ណ។
អភិបាលរង និងជាអ្នកនាំពាក្យសាលាខេត្តសៀមរាប លោក ប៊ុន ថារិទ្ធ បានឲ្យដឹងថា ខេត្តបានបញ្ជូនស.ជ.ណ ទៅក្រុមហ៊ុនទាំងនោះហើយ។ តាមធម្មតា តម្លៃសំបុត្រចូលទៅតំបន់កំពង់ភ្លុក មានតម្លៃ ៣ដុល្លារសម្រាប់ភ្ញៀវទេសចរបរទេស ដោយឡែកសម្រាប់ពលរដ្ឋខ្មែរ ចូលទៅកម្សាន្តដោយឥតគិតថ្លៃ លើកលែងតែរដូវបុណ្យទាន ដែលតម្លៃសំបុត្រ មានពី១ដុល្លារ ទៅ៣ដុល្លារផងដែរ។
មគ្គុទ្ទេសក៍ទេសចរណ៍ លោក ម៉ី សីដា បានសាទរចំពោះការបញ្ឈប់ការលក់សំបុត្ររបស់ក្រុមហ៊ុនខាងលើ។ លោកបញ្ជាក់ថា កន្លងមកក្រុមហ៊ុន ស៊ូជីញ ធ្លាប់មានទំនាស់ជាច្រើននឹងម្ចាស់ទូកដឹកភ្ញៀវទេសចរ ដូចជាការដំឡើងថ្លៃទូកជាដើម។ លោកបញ្ជាក់យ៉ាងដូច្នេះថា៖« ទូកដឹកភ្ញៀវរបស់សហគមន៍ គឺគ្រប់គ្រងដោយក្រុមហ៊ុន ស៊ូជីញ។ បើនៅកំពង់ភ្លុក ក្នុងទួកមួយជើងតម្លៃ ២៥ដុល្លារ ក្រុមហ៊ុនយក ៥ដុល្លារពីម្ចាស់ទូក។ ថ្មីៗនេះឮថា ក្រុមហ៊ុន ចង់បិទលែងតំបន់កំពង់ភ្លុក និងបង្វែរភ្ញៀវមកតែតំបន់ចុងឃ្នៀសវិញ»។
បើទោះជាមានស.ជ.ណ បញ្ឈប់ការលក់សំបុត្រនៅតំបន់បឹងទន្លេសាបខេត្តសៀមរាប យ៉ាងណាក្តី តែក្រុមមគ្គុទ្ទេសក៍មួយចំនួនគិតថា ក្រុមហ៊ុន ស៊ូជីញ នៅតែមានសិទ្ធិ គ្រប់គ្រងលើទូកទេសចរណ៍សហគមន៍នៅតំបន់នោះដដែល។ អាចមិនយកតម្លៃសំបុត្រ តែដំឡើងតម្លៃទូកវិញក៏ថាបាន៕
© រក្សាសិទ្ធិដោយ thmeythmey.com