ជាតិ
សង្គមជាតិ
AII និង PPIU តំណាងឲ្យកម្ពុជាក្នុងការប្រកួតអ្នកតស៊ូមតិឆ្នើម និងវោហាសព្ទសាធារណៈនៅអាស៊ី
× ភ្នំពេញ៖ សិស្សនៃវិទ្យាស្ថានអន្តរទ្វីបអាមេរិកាំង (AII) បានដណ្តើមពានរង្វាន់អ្នកតស៊ូមតិឆ្នើមប្រចាំឆ្នាំ ២០១៥ ខណៈនិស្សិតនៃសាកលវិទ្យាល័យភ្នំពេញអន្តរជាតិ (PPIU) បានដណ្តើមជ័យលាភីវោហាសព្ទសាធារណៈ ក្នុងវេទិកាប្រកួតនៅថ្ងៃទី២៦ ម្សិលមិញនេះ។ បន្ទាប់ពីទទួលបានជ័យលាភីហើយនោះ ពួកគេនឹងធ្វើជាតំណាងកម្ពុជា បន្តទៅចូលរួមប្រកួតប្រចាំតំបន់ដែលនឹងប្រារព្ធឡើងអំឡុងសន្និសីទអាស៊ីប៉ាស៊ីហ្វិកឆ្នាំ២០១៥ អំឡុងខែមិថុនា ក្នុងប្រទេសម៉ាឡេស៊ី ខាងមុខ។
វេទិកាតស៊ូមតិនិងវោហាស័ព្ទជាសាធារណៈនេះ មានសិស្ស និងនិស្សិតមកពីគ្រឹះស្ថានអប់រំចំនួន ៧ បានចូលរួម ក្នុងនោះ រួមមាន សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) សាកលវិទ្យាល័យហ្សាម៉ាន់ (ZAMAN) សាកលវិទ្យាល័យអាស៊ីអឺរ៉ុប (AEU) សាកលវិទ្យាល័យភ្នំពេញអន្តរជាតិ (PPIU) សាកលវិទ្យាល័យន័រតុន (NU) សាកលវិទ្យាល័យបៀលប្រាយ (BBU) និង វិទ្យាស្ថានអន្តរទី្វបអាមេរិកាំង (AII) ។
ការប្រកួតប្រជែងពានរង្វាន់វោហាស័ព្ទជាសាធារណៈ និងអ្នកតស៊ូមតិឆ្នើមដែលរៀបចំឡើង ដោយសភាយុវជនពាណិជ្ជករអន្តរជាតិកម្ពុជា (JCI)នេះ បានប្រព្រឹត្តទៅពេញមួយថ្ងៃ នៅវិទ្យាស្ថានបច្ចេកវិទ្យាកម្ពុជា (សាលាតិចណូ) ។
បន្ទាប់ពីការប្រកួតយ៉ាងស្វិតស្វាញ និងការផ្តល់ពិន្ទុពីសំណាក់ចៅក្រមវិនិច្ឆ័យរួចនោះ ជាលទ្ធផល ជ័យលាភីអ្នកតស៊ូមតិឆ្នើមបានធ្លាក់លើសិស្សមកពីវិទ្យាស្ថានអន្តរទ្វីបអាមេរិកាំង (AII) រីឯផ្នែកវោហាស័ព្ទជាសាធារណៈ បានលើនិស្សិតមកពីសាកលវិទ្យាល័យភ្នំពេញអន្តជាតិ។
តំណាងជ័យលាភីក្រុមអ្នកតស៊ូមតិឆ្នើមនៃ AII កញ្ញា ប៉ែន សុខអាន បានសម្តែងអារម្មណ៍ រីករាយជាខ្លាំង នៅពេលដែលក្រុមរបស់កញ្ញាបានជ័យឈ្នះ។ សុខអាន និយាយយ៉ាងដូច្នេះ ថា៖«មោនភាពរបស់យើង និងសាលារបស់យើង នៅដែលក្រុមរបស់យើងឈ្នះលើក្រុម ឆ្នើមៗដ៏ទៃទៀត។ ក្រុមយើងបានសហការគ្នាបានយ៉ាងល្អ ទាំងការស្រាវជ្រាវលើប្រធានបទ និងទាំងការតស៊ូមតិលើវេទិកា»។ ទន្ទឹមនឹងការបន្តទៅប្រកួតប្រចាំតំបន់អាស៊ី នាពេលខាងមុខនេះ សុខអាន បានប្តេជ្ញាថា នឹងព្យាយាមឲ្យអស់ពីសមត្ថភាព ដើម្បីយកជ័យជំនះឲ្យកម្ពុជាផងដែរ។ កញ្ញា ញញឹមប្រាប់ថា៖«ខ្ញុំមិនហ៊ានថាឈ្នះ ឬយ៉ាងណាទេ ប៉ុន្តែក្រុមយើងនឹងសហការគ្នាឲ្យកាន់តែខ្លាំង ដើម្បីកម្ពុជា»។
គួររម្លឹកថា សុខអាន ជាជ័យលាភីជើងឯកវោហាស័ព្ទជាសាធារណៈប្រចាំអាស៊ីប៉ាស៊ីហ្វិកនៅឆ្នាំ ២០១៤ នៅប្រទេសជប៉ុន។ ពេលនោះ នាងបានក្លាយជាបេក្ខជនតំណាងអាស៊ីចូលរួមការប្រកួតផ្ដាច់ព្រ័ត្រថ្នាក់ពិភពលោកនៅទីក្រុង Leipzig ប្រទេសអាល្លឺម៉ង់ ជាមួយដៃគូឆ្នើម៣នាក់ទៀតដែលជាជើងឯកប្រចាំទ្វីបអាមេរិក អឺរ៉ុប និង អាហ្វ្រិក។ ប៉ុន្តែ សុខអាន ពុំចំណាត់ថ្នាក់ជើងឯកនោះទេ ពេលនោះ តំណាងមកពីទ្វីបអាហ្វ្រិក សញ្ជាតិនីហ្សេរីយ៉ាបានកា្លយជាជ័យលាភីថ្នាក់ពិភពលោក។ ទោះបីជាយ៉ាងណា នារីវ័យ ១៩ ឆ្នាំរូបនេះ នៅតែមានមោទនភាពចំពោះកម្ពុជា ដែលមានបេក្ខជនបានក្លាយជាតំណាងឲ្យទ្វីបអាស៊ីប៉ាស៊ីហ្វិក។
ដោយឡែក ជ័យលាភីវោហាស័ព្ទជាសាធារណៈប្រចាំឆ្នាំ ២០១៥នេះវិញត្រូវបានលើ កញ្ញា តារា រត្ន ដែលជានិស្សិតច្បាប់ នៃសាកលវិទ្យាល័យភ្នំពេញអន្តរជាតិ។ និស្សិតឆ្នាំទី៤ រូបនេះ រីករាយ នឹងលទ្ធផលនេះ ដោយនាងបានលើកឡើងថា នាងមិននឹកស្មានដល់ ចំពោះលទ្ធផល នេះទេ។ រៀបរាប់ទាំងអារម្មណ៍រំភើប រត្ន ថា៖«ខ្ញុំមិនគិតថា អាចទទួលបានជ័យលាភីទេ ព្រោះបេក្ខជនដ៏ទៃសុទ្ធតែជាឆ្នើមៗ ទាំងអស់»។
មុននឹងចាកចេញទៅប្រកួតវោហាស័ព្ទនៅម៉ាឡេស៊ីដែរនោះ កញ្ញា រត្ន រំពឹងទុកទាំងរឹងមាំថា នាងនឹងយកឈ្នះក្នុងកម្មវិធីនេះ«ខ្ញុំសង្ឃឹម ៩៩,៩ភាគរយ ថា នឹងអាចយកឈ្នះបេក្ខជននៅ ក្នុងតំបន់អាស៊ី»។ នេះការរំពឹងរបស់កញ្ញា រត្ន។
ប្រធានបទប្រកួតក្នុងកម្មវិធីឆ្នាំ ២០១៥នេះផ្តោតសំខាន់លើគោលដៅអភិវឌ្ឍសហស្សវត្សរ៍របស់អង្គការសហប្រជាជាតិ (UN-MDGs) ដែលទាក់ទងនឹងប្រធានបទ កាត់បន្ថយភាពក្រីក្រធ្ងន់ធ្ងរនិងបញ្ឈប់ការរីកសាយនៃមេរោគអេដស៍ព្រមទាំងការផ្តល់នូវការអប់រំបឋមសិក្សាជាសាកលដែលត្រូវសម្រេចឲ្យបានត្រឹមឆ្នាំ ២០១៥ ។
គួរបញ្ជាក់ថា ជ័យលាភីតំណាងកម្ពុជា នឹងត្រូវទៅចូលរួមក្នុងការប្រកួតប្រចាំតំបន់ដែលនឹងធ្វើឡើងអំឡុងសន្និសីទអាស៊ីប៉ាស៊ីហ្វិក ឆ្នាំ២០១៥ នៅថ្ងៃទី១១ដល់ទី១៤ ខែមិថុនា ក្នុងប្រទេសម៉ាឡេស៊ី។ ហើយក្រុមដែលទទួលបានជ័យជំនះក្នុងកម្មវិធីនោះនឹងបន្តទៅប្រកួតប្រជែងជ្រើសជើងឯកពិភពលោកដែលនឹងប្រារព្ធក្នុងខែវិច្ឋិកា នៅប្រទេសជប៉ុន៕
© រក្សាសិទ្ធិដោយ thmeythmey.com