អន្តរជាតិ
នយោបាយអន្តរជាតិ
×![]()
ក្រុមសង្គ្រោះប្រទេសនូវែលសេឡង់ បានសម្រេចផ្អាកដំណើររបស់ខ្លួនកាលពីល្ងាចម្សិលមិញ ដើម្បីទៅកាន់ប្រទេសនេប៉ាល់ដើម្បីសង្គ្រោះប្រជាជនដែលរងគ្រោះដោយគ្រោះមហន្តរាយរញ្ជួយដី។ ការផ្អាកនេះកើតឡើងក្រោយពេលរដ្ឋាភិបាលនេប៉ាល់បដិសេធសំណើរសុំបញ្ជូនក្រុមសង្គ្រោះរបស់រដ្ឋាភិបាលនូវែលសេឡង់ ដោយអះអាងថាក្រុមសង្គ្រោះមានគ្រប់គ្រាន់ហើយដើម្បីបំពេញប្រតិបត្តិការ។
លោក មុំ ពិទូរ្យ លម្អិតព័ត៌មាននេះ
ល្ងាចថ្ងៃចន្ទម្សិលមិញ ក្រុមសង្គ្រោះរបស់រដ្ឋាភិបាលនូវែលសេឡង់រៀបចំឡើងយន្តហោះដើម្បីបំពេញប្រតិបត្តិការរបស់ខ្លួននៅនេប៉ាល់ទៅហើយ ស្រាប់តែត្រូវផ្អាកដំណើររបស់ខ្លួនវិញ។ ការសម្រេចផ្អាកដំណើរទៅនេប៉ាល់នេះ កើតមានឡើងដោយសាររដ្ឋាភិបាលក្រុងកដ្ឋមណ្ឌូ បដិសេធជំនួយរបស់រដ្ឋាភិបាលនូវែលសេឡង់ ដោយរដ្ឋាភិបាលនេះបញ្ជាក់ថា ខ្លួនទទួលបានជំនួយជាក្រុមរុករកនិងសង្គ្រោះ គ្រប់គ្រាន់ហើយដើម្បីបំពេញប្រតិបត្តិការជួយប្រជាជនដែលកំពុងប្រឈមការលំបាក។
ការឈានដល់ការបដិសេធក្រុមសង្គ្រោះរបស់នូវែលសេឡង់នេះ ក៏ដោយសារតែនូវែលសេឡង់យឺតយ៉ាវក្នុងការផ្តល់ជំនួយ និងបញ្ជូនក្រុមរុករកនិងសង្គ្រោះរបស់ខ្លួនទៅកាន់ប្រទេសនេប៉ាល់។ មានអ្នកខ្លះរិះគន់រដ្ឋាភិបាលនូវែលសេឡង់ថា គ្រោះមហន្តរាយកើតឡើងតាំងពីថ្ងៃសៅរ៍ ប៉ុន្តែរដ្ឋាភិបាលទើបបញ្ជូនក្រុមជួយសង្គ្រោះទៅនេប៉ាល់នៅថ្ងៃចន្ទ ខណៈដែលប្រទេសជាច្រើនបញ្ជូនជំនួយនិងក្រុមសង្គ្រោះទៅនេប៉ាល់ភ្លាមៗក្រោយកើតហេតុ។
លោក Murray McCully រដ្ឋមន្ត្រីការបរទេសនូវែលសេឡង់បានថ្លែងថា លោកពិតជាយល់ពីការសម្រេចចិត្តរបស់រដ្ឋាភិបាលនេប៉ាល់ចំពោះការសម្រេចបដិសេធការផ្តល់ជំនួយរបស់នូវែលសេឡង់ ហើយអ្វីដែលលោកធ្លាប់មានបទពិសោធន៍នោះគឺ ស្ថានភាពប្រែប្រួលរហ័ស ហើយការផ្តល់ជំនួយនេះគួរតែធ្វើឡើងឆាប់រហ័សបំផុតតាមដែលអាចធ្វើបានដូចគ្នាដែរ។
លោកបានបន្ថែមថា ក្រុមសង្គ្រោះរដ្ឋាភិបាលនូវែលសេឡង់ត្រៀមលក្ខណៈជានិច្ចដើម្បីសហការជាមួយក្រុមសង្គ្រោះផ្សេងទៀត ប្រសិនបើរដ្ឋាភិបាលនេប៉ាល់ត្រូវការជំនួយ ហើយនូវែលសេឡង់ព្យាយាមតាមដានមើលស្ថានភាពជារួមថាតើមានអ្វីទៀតដែលរដ្ឋាភិបាលអាចជួយបាន។
បើទោះជានេប៉ាល់បដិសេធក្រុមរុករក និងសង្គ្រោះរបស់នូវែលសេឡង់ក៏ដោយ បច្ចុប្បន្ននេះរដ្ឋាភិបាលក្រុង Willington បានសម្រេចផ្តល់ជំនួយជាហិរញ្ញវត្ថុក្នុងទំហំប្រមាណ ១លានដុល្លារនូវែលសេឡង់ ដែលស្មើនឹង៧សែនដុល្លារអាមេរិកទៅដល់រដ្ឋាភិបាលនេប៉ាល់សម្រាប់ដោះស្រាយបញ្ហាប្រឈម។
គណបក្សប្រឆាំងនូវែលសេឡង់ បានបន្តរិះគន់រដ្ឋាភិបាល ដោយអះអាងថា រដ្ឋាភិបាលគួរតែរហ័សរហួនជាងនេះក្នុងការផ្តល់ជំនួយគាំទ្រផ្នែកបច្ចេកទេសដើម្បីជួយសង្គ្រោះប្រជាជននេប៉ាល់ ដែលគ្រោះថ្នាក់កើតឡើងតាំងពីថ្ងៃសៅរ៍មកម្ល៉េះនោះ។ សមាជិកគណបក្សប្រឆាំងម្នាក់មិនបានបង្ហាញអត្តសញ្ញាណសង្កត់ធ្ងន់ថា នូវែលសេឡង់មានក្រុមសង្គ្រោះនិងរុករកល្អជាងគេនៅលើពិភពលោក ប៉ុន្តែរដ្ឋាភិបាលបែរជាយឺតយ៉ាវក្នុងការបញ្ជូនអ្នកជំនាញទៅសង្គ្រោះមនុស្សនៅនេប៉ាល់ទៅវិញ៕
© រក្សាសិទ្ធិដោយ thmeythmey.com
