កីឡាជាតិ
ជាតិ
ព្រឹត្តិការណ៍ប្រណាំងកង់ឆ្លងកាត់ឧបសគ្គលើកទី៩ប្រព្រឹត្តទៅនៅដើមខែឧសភា
× រដូវកាលទី៩នៃព្រឹត្តិការណ៍ប្រណាំងកង់ឆ្លងកាត់ឧបសគ្គ នឹងប្រព្រឹត្តទៅនៅដើមខែឧសភា ខាងមុខ ដោយចាប់ផ្តើមពីតំបន់កោះដាច់ ឆ្ពោះទៅកាន់ភ្នំប្រសិទ្ធិ។ នេះបើតាមបញ្ជាក់របស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC)។
ព្រឹត្តិការណ៍ប្រណាំងកង់ឆ្លងកាត់ឧបសគ្គដែលមានឈ្មោះថា «Cambodia MTB Series» (Mountain Bike) ឈានដល់រដូវកាលទី៩ហើយនៅឆ្នាំ២០១៥នេះ។ តាមរយៈសន្និសីទសារព័ត៌មានកាលពីចុងខែមេសា កន្លងមក លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានថ្លែងឲ្យដឹងថា ថ្វីត្បិតតែការប្រកួតនេះ មានការបើកទូលាយដល់មហាជនទូទៅក៏ពិតមែន ប៉ុន្តែវាក៏ជាយុទ្ធនាការស្វែងរកអ្នកមានសមត្ថភាពសម្រាប់ការប្រកួតជាលក្ខណៈអន្តរជាតិផងដែរ។
ដូចជាឆ្នាំមុនៗផងដែរ ព្រឹត្តិការណ៍ប្រណាំងកង់ឆ្លងកាត់ឧបសគ្គនឹងមាន៥ដំណាក់កាល។ បើតាមលោក Pierre Catry ជនជាតិបារាំងដែលជាស្ថាបនិកនៃកីឡាប្រណាំងកង់ MTB ដំណាក់កាលទី១ដែលប្រព្រឹត្តទៅនៅតំបន់កោះដាច់ នាថ្ងៃទី៣ ខែឧសភា ជាដំណាក់កាលស្រួលជាងគេ ហើយស្ថានភាពកាន់តែតឹងតែងជាបន្តបន្ទាប់សម្រាប់ដំណាក់កាលទី២នៅព្រែកលាប នាថ្ងៃទី២៨ ខែមិថុនា ដំណាក់កាលទី៣នៅខេត្តកំពង់ស្ពឺនាថ្ងៃទី២ ខែសីហា ហើយដំណាក់កាលដែលពោរពេញទៅដោយឧបសគ្គលើសណ្ឋានដីឡើងចុះ កាត់ទឹក ឆ្លងអូរ និងមានថ្ម គឺក្នុងដំណាក់ទី៤នៅភ្នំបាសិតនាថ្ងៃទី១ ខែវិច្ឆិកា និងដំណាក់កាលចុងក្រោយនៅតំបន់គិរីរម្យនាថ្ងៃទី១៣ ខែធ្នូ។
ការប្រកួតនឹងមានការបែងចែកជា១០កម្រិតផ្សេងៗគ្នាទៅតាមប្រភេទអាយុ និងជំនាញ ដែលក្នុងនោះរួមមាន កម្រិតសម្រាប់កីឡាករដែលមានជំនាញខ្លាំងបំផុត (Elite) ក្រុមកីឡាករជំនាញ (Expert) ដែលមានចាប់ពី៣០ឆ្នាំ កីឡាករជំនាញមធ្យមដែលមានអាយុ១៦ដល់២៩ឆ្នាំ កីឡាករជំនាញមធ្យមអាយុចាប់ពី៣០ឆ្នាំ កីឡាករថ្មីដែលមានអាយុពី១៤ដល់១៦ឆ្នាំ ឬតិចជាង១៧ឆ្នាំដែលកម្ពស់ខ្ពស់ជាង១ម៉ែត្រ៥៥ កីឡាករថ្មីចាប់ពី១៧ទៅ៣៣ឆ្នាំ កីឡាករថ្មីចាប់ពី៣៤ដល់៣៩ឆ្នាំ ក្រុមកីឡាការិនី Women Class កីឡាករដែលមានវ័យចាប់ពី៤០ឆ្នាំ និងក្រុមកុមារដែលមានអាយុក្រោម១៣ឆ្នាំ។
សម្រាប់ដំណាក់កាលនីមួយៗ អ្នកដណ្តើមបានលេខ១ទទួលបាន២៥ពិន្ទុ ចំណាត់ថ្នាក់លេខ២ បាន ២២ពិន្ទុ លេខ៣ បាន ២០ ពិន្ទុ លេខ ៤ បាន ១៨ ពិន្ទុ លេខ ៥ បាន ១៦ ពិន្ទុ ដោយអ្នកដែលមានពិន្ទុរួមច្រើនជាងគេនឹងក្លាយជាជើងឯកប្រចាំឆ្នាំ២០១៥ ។
អ្នករៀបចំកម្មវិធីបានអះអាងថា អ្នកជិះកង់អាជីព និងមិនអាជីពជាង២០០នាក់នឹងចូលក្នុងព្រឹត្តិការណ៍នេះ។ ចាប់តាំងពីឆ្នាំ១៩៩៦មក ការប្រកួតកីឡាប្រណាំងកង់ឆ្លងកាត់ឧបសគ្គត្រូវកត់ត្រាចូលជាប្រភេទកីឡាអូឡាំពិកនាព្រឹត្តិការណ៍ប្រកួតនៅក្នុងទីក្រុងអាត្លង់តា សហរដ្ឋអាមេរិក។ ទោះបីជាការប្រកួតមានភាពលំបាកក៏ដោយ ប៉ុន្តែវាក៏បានផ្តល់ភាពសប្បាយរីករាយផងដែរដល់បណ្តាអ្នកចូលរួម៕
© រក្សាសិទ្ធិដោយ thmeythmey.com