ជាតិ
សង្គមជាតិ
×![]()
តំណាងសង្គមស៊ីវិល និងប្រជាពលរដ្ឋជាសមាជិកអាស៊ាន រួមទាំងប្រទេសទីម័រខាងកើតផង បានលើកឡើងនៅក្នុងវេទិកាប្រជាពលរដ្ឋអាស៊ាន ពីការព្រួយបារម្ភនៅដែលប៉ះពាល់ដល់សិទ្ធិ និងជីវភាពរស់នៅរបស់ប្រជាពលរដ្ឋទាំងថ្នាក់ជាតិ និងថ្នាក់តំបន់។ វេទិកានេះរៀបចំឡើងដោយក្រុមសង្គមស៊ីវិលនៅក្នុងសហគមន៍អាស៊ាន ដែលប្រព្រឹត្តនៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២២ដល់២៥ ខែមេសា ឆ្នាំ២០១៥
មនុស្ស១៥០០នាក់ ជាតំណាងក្រុមសង្គមស៊ីវិលធ្វើការលើវិស័យផ្សេងៗគ្នា តំណាងជនជាតិដើមភាគតិច និងប្រជាពលរដ្ឋមកពីប្រទេសសមាជិកអាស៊ាន និងប្រទេសទីម័រខាងកើតផងនោះ បានជួបជុំគ្នានៅក្នុងវេទិកាប្រជាពលរដ្ឋអាស៊ានកាលពីពេលថ្មីៗនេះ ដើម្បីប្រមូលក្តីបារម្ភរបស់ពួកគេដាក់ទៅរដ្ឋាភិបាលរៀងៗខ្លួន។ ក្នុងចំណោមប្រតិភូទាំងអស់ មានតំណាងសង្គមស៊ីវិល និងប្រជាពលរដ្ឋកម្ពុជាជាង១០០នាក់។
នៅក្នុងក្របខណ្ឌនៃកិច្ចប្រជុំកំពូលអាស៊ាននៅក្នុងទីក្រុងគូឡា ឡាំពួរ នៃប្រទេសម៉ាឡេស៊ីជាប្រធានប្តូរវេន វេទិកាប្រជាពលរដ្ឋអាស៊ានត្រូវបានរៀបចំឡើង ដើម្បីតំណាងសហគមន៍មកពីប្រទេសសមាជិកអាស៊ាននីមួយៗ លើកឡើងពីបញ្ហាលទ្ធិប្រជាធិបតេយ្យ សិទ្ធិសេរីភាពក្នុងការបញ្ចេញមតិ ការគោរពសិទ្ធិមនុស្សទូទៅ សិទ្ធិជនជាតិដើមភាគតិច បញ្ហាដីធ្លី និងសិទ្ធិលំនៅឋាន បញ្ហាអំពើរពុករលួយ ធនធានធម្មជាតិ ចំណាកស្រុករបស់យុវជន ការពង្រឹងគុណភាពអប់រំ បញ្ហាសន្តិភាព និងសន្តិសុខនៅក្នុងសហគន៍អាស៊ានទាំងមូល ការទទួលខុសត្រូវលើការអភិវឌ្ឍនៅក្នុងតំបន់ទន្លេមេគង្គ និងជជែកពិភាក្សាពីការទាញយកប្រយោជន៍ពីសហគមន៍អាស៊ានសម្រាប់ប្រជាពលរដ្ឋទាំងមូលជាដើម។
© រក្សាសិទ្ធិដោយ thmeythmey.com
