កីឡាជាតិ
ក្រុមស៊ីប៉ាក់តាក្រនារីចេញទៅដណ្ដើមពាន King Cup នៅថៃ មុនស៊ីហ្គេមមកដល់
× សហព័ន្ធកីឡាសីប៉ាក់តាក្រកម្ពុជា បានបញ្ជូនក្រុមកីឡាការិនីជម្រើសជាតិរបស់ខ្លួនចេញទៅប្រកួតដណ្ដើមពានរង្វាន់ The 30th king's Cup Takraw World Championships នៅទីក្រុងបាងកក ប្រទេសថៃ ដែលជាការប្រកួតកម្ដៅ មុនចេញទៅប្រកួតក្នុងព្រឹត្តិការណ៍កីឡាស៊ីហ្គេមឆ្នាំ ២០១៥ នៅសិង្ហបុរី។
លោក ជាតិ ខេមរា គ្រូបង្វឹកក្រុមសីប៉ាក់តាក្រជម្រើសជាតិបានប្រាប់មកពីប្រទេសថៃថា ព្រឹត្តិការណ៍នេះនឹងចាប់ផ្ដើមពីថ្ងៃទី ៤ ដល់ ១០ ខែ ឧសភា ឆ្នាំ ២០១៥ ដោយមានប្រទេសជាង ៣០ ចូលរួម ហើយចែកជាវិញ្ញាសាសម្រាប់បុរស និង នារី។ King Cup 2015 នេះចែកចេញជា Premeir Division, Division 1, Division 2 និង Division 3 ខណៈវិញ្ញាសាប្រកួតមាន ប្រកួតជា Team, Regu, Double និង Hoop។
សម្រាប់ក្រុមបុរសរបស់កម្ពុជា មិនបានចូលរួមប្រកួតក្នុងពានរង្វាន់នេះទេព្រោះជាប់ហ្វឹកហាត់សីឈិនឡូន នៅប្រទេសមីយ៉ាន់ម៉ា ត្រៀមប្រកួតនៅសីហ្គេម។ កម្ពុជា នឹងបញ្ជូនក្រុមកីឡាករប្រកួតសីឈិឡូន ហើយក្រុមនារីប្រកួតសីប៉ាក់តាក្រ។
ចំណែកក្រុមនារីកម្ពុជាធ្លាប់បានហ្វឹកហាត់នៅប្រទេសថៃ មួយរយៈធំ មុនចូលរួមប្រកួតក្នុងពានរង្វាន់នេះ។ កីឡាការិនីជម្រើសជាតិទាំង ៨ នាក់មាន សន សុភាព, អ៊ុក សុខសាន្ត, សន សុភ័ណ្ឌ, ចន ពេជ្រញ៉ា, ពេជ្រ សុផា, ងួន ច័ន្ទបូរមី, ឯម ពិសិដ្ឋ និង សុទ្ធ ស្រីលក្ខណ៍ ក៏មានឈ្មោះចូលរួមប្រកួតក្នុងពានរង្វាន់នេះដែរ៕
© រក្សាសិទ្ធិដោយ thmeythmey.com