ជាតិ
សង្គមជាតិ
ខ្យល់កន្ត្រាក់នឹងបន្តកើតមានរហូតដល់ពាក់កណ្តាលខែមិថុនា
× ឥទ្ធិពលខ្យល់មូសុងនិរតី (មូសុងវស្សា) នឹងមកដល់កម្ពុជា ចាប់ពីថ្ងៃទី០៤ ឬថ្ងៃទី០៥ ខែឧសភា ឆ្នាំ២០១៥ ខាងមុខនេះ ។ នេះបើសេចក្តីជូនដំណឹងរបស់ក្រសួងធនធានទឹក និងឧតុនិយម ដែលបានចេញផ្សាយនៅ ថ្ងៃទី០២ ខែឧសភា ឆ្នាំ២០១៥ ។
បើតាមសេចក្តីជូនដំណឹងដដែល បរិមាណទឹកភ្លៀងដែលនឹងធ្លាក់ចុះ នឹងមានកម្រិតពីតិច ទៅបង្គួរ ចាប់ពីខែឧសភា ដល់ខែមិថុនា និងមានកម្រិតច្រើន ចាប់ខែកក្កដា ដល់ខែតុលា ។ ក្នុងរដូវវស្សានេះ ក៏នឹងមានបាតុភូតផ្សេងៗផងដែរ ដូចជា ផ្គរ រន្ទះ លាយឡំនឹងខ្យល់កន្ត្រាក់ ដែលបន្តកើតមានច្រើន រហូតដល់ពាក់កណ្តាលខែមិថុនា។
តាមការព្យាករណ៍របស់ក្រសួងធនធានទឹក និងឧតុនិយម ស្ថានភាពអាកាសធាតុប្រទេសកម្ពុជា ក្នុងរដូវវស្សាឆ្នាំនេះ នឹងជួបប្រទះនូវភ្លៀងរដូវវស្សា ដែលនឹងចាប់ផ្តើមធ្លាក់រាយប៉ាយទូទាំងប្រទេស ជាបន្តបន្ទាប់ ចាប់ពីខែឧសភាតទៅ ។
សេចក្តីជូនដំណឹងដដែលបន្តថា ក្រសួងធានធនទឹក នឹងបន្តតាមដានស្ថានភាពអាកាសធាតុនារដូវវស្សានេះជាប់ជាប្រចាំ ហើយនឹងធ្វើសេចក្តីជូនដំណឹងបន្ថែមក្នុងករណីចាំបាច់៕
© រក្សាសិទ្ធិដោយ thmeythmey.com