កីឡាជាតិ
ស៊ីហ្គេម៖ បាល់បោះកម្ពុជា នៅពូលជាមួយម្ចាស់ផ្ទះសិង្ហបុរី
× លទ្ធផលនៃការចាប់ពូលជ្រើសរើសក្រុមក្នុងការប្រកួតលើវិញ្ញាសាបាល់បោះ ក្នុងព្រឹត្តិការណ៍កីឡាស៊ីហ្គេមឆ្នាំ ២០១៥ នៅប្រទេសសិង្ហបុរី នេះដោយក្រុមជម្រើសជាតិកម្ពុជា ស្ថិតក្នុងពូល B ជាមួយក្រុមម្ចាស់ផ្ទះ។
យោងតាមវេបសាយផ្លូវការ seagames2015 សម្រាប់វិញ្ញាសាបាល់បោះ ផ្នែកបុរស ចែកជា ២ ពូល មាន ពូល A ហ្វីលីពីន, ម៉ាឡេស៊ី, ឥណ្ឌូណេស៊ី និង ទីម័រខាងកើត ហើយពូល B មាន ថៃ, សិង្ហបុរី, កម្ពុជា, មីយ៉ាន់ម៉ា និង វៀតណាម។ ការប្រកួតចាប់ពីថ្ងៃទី ៩ ដល់ ១៥ ខែ មិថុនា នៅកីឡដ្ឋាន Kallang Cluster។
ចំណែកវិញ្ញាសាផ្នែកនារីវិញ មិនមានការបែងចែកពូលនោះទេ ព្រោះមានក្រុមចូលរួមតែ ៦ ដោយត្រូវធ្វើការប្រកួតវិលជុំសន្សំពិន្ទុ។ ក្រុមទាំង ៦ មានហ្វីលីពីន, ថៃ, ម៉ាឡេស៊ី, ឥណ្ឌូណេស៊ី, វៀតណាម និង សិង្ហបុរី។
សម្រាប់បាល់បោះជាវិញ្ញាសា ១ ក្នុងចំណោមវិញ្ញាសា ៣៦ ប្រភេទកីឡាដែលមាន ៤០២ វិញ្ញាសាដែលដាក់ឱ្យអត្តពលិកមកពីប្រទេសទាំង ១១ ក្នុងតំបន់អាស៊ានធ្វើការប្រកួតប្រជែងក្នុងព្រឹត្តិការណ៍កីឡាស៊ីហ្គេមឆ្នាំ ២០១៥ នេះ។ ពិធីបើកផ្លូវការនឹងចាប់ផ្ដើមនៅថ្ងៃទី ៥ ខែមិថុនា ហើយបិទវិញនៅថ្ងៃទី ១៦ ខែ មិថុនា ឆ្នាំ ២០១៥៕
© រក្សាសិទ្ធិដោយ thmeythmey.com