×![]()
ភ្នំពេញ៖អតីតតារាចម្រៀងស្រីល្បីឈ្មោះប្រចាំផលិតកម្មស្ពាក Spark Music កញ្ញាវ៉ាឌី ភាលីង បានឱបក្រសោបនូវប្រជាប្រិយភាពល្បីគួរសម កាលពីអំឡុងឆ្នាំ២០១០ ហើយក៏ត្រូវបាត់ស្ងាត់សូន្យ ស្ទើរតែបាត់ឈ្មោះពីពិភពសិល្បៈរហូតមក ក្រោយពីល្បីថា នាងមានឧកញ៉ាម្ចាស់ស្នេហ៍ បង្ខំឱ្យនាងដកខ្លួនពីសិល្បៈ ទៅសម្ងំរស់នៅសោយសុខលើគំនរទ្រព្យសម្បត្តិវីឡា ដុល្លារ និងឡានទំនើបទៀតផងតែនាងបានបដិសេធរឿងនេះ។
ការដកខ្លួនឱ្យនៅឆ្ងាយពីពិភព សិល្បៈរបស់ ស្រីស្អាតវ៉ាឌី ភាលីង ក៏លេចចេញនូវព័ត៌មាន អាស្រូវ មួយចំនួន ដោយគេនាំគ្នានិយាយថា នាងមានឧកញ៉ាម្ចាស់ស្នេហ៍ បង្ខំឱ្យនាងដកខ្លួនពីសិល្បៈ ទៅសម្ងំរស់នៅសោយសុខលើគំនរ ទ្រព្យ វីឡា ដុល្លារ និងឡានទំនើបទៀតផង។ តែសម្រាប់ព័ត៌មានមួយនេះកន្លងមក ក៏ត្រូវបានខាងគ្រួសាររបស់កញ្ញាវ៉ាឌី ភាលីង ផ្ទាល់ បានចេញមុខបដិសេធថា នោះពុំមែនជាការពិតទាំងអស់ ហើយក៏បានអះអាងទៀតថា តារាចម្រៀងរូបឆោមស្រស់ វ៉ាឌី ភាលីង មាន បញ្ហាសុខភាពយ៉ាងធ្ងន់ធ្ងរ ទើបនាងអវត្តមានពីអាជីពយ៉ាងដូច្នេះ។មានទស្សនិកជនជាច្រើន មិនបានជឿ ជាក់ថា កញ្ញាវ៉ាឌី ភាលីង មិនបង្ហាញខ្លួនដោយ សារសុខភាពនោះទេ ផ្ទុយទៅវិញ គេបែរជានាំគ្នាជឿទៅលើរនាំងស្នេហារបស់នាងជាមួយនឹងបុរស ដែលមានងារជាឧកញ៉ានោះច្រើនជាង។ បើគិតមកដល់ពេលនេះ អវត្តមាននៅក្នុងពិភពសិល្បៈរបស់តារាចម្រៀងវ៉ាឌី ភាលីង បានអូសបន្លាយមកជាង៥ឆ្ន្នាំហើយ យូរៗម្តង គេបានឃើញនាងឡើងច្រៀងនៅក្នុងនាមជាតារាកិត្តិយសម្តងម្កាលដែរ។ ថ្មីៗនេះ លេចឮដំណឹងមកថា កញ្ញាវ៉ាឌី ភាលីង បានស្ពាយបង្វេចវិលមកប្រកបរបរចាស់យ៉ាងពេញទំហឹងវិញហើយ។
ដំណឹងមួយនេះ ក៏បានធ្វើឱ្យទស្សនិកជនមួយចំនួនសង្ស័យថា ចំណងស្នេហ៍ដែលធ្លាប់តែល្បីរវាងកញ្ញាវ៉ាឌី ភាលីង ជាមួយឧកញ៉ាម្នាក់នោះ ប្រហែលជាដើរដល់ផ្លូវពុះជ្រែកបេះដូងពីគ្នាហើយ ទើបធ្វើឱ្យភាលីង ខ្វះភាពកក់ក្តៅនៅក្នុងការរស់នៅ ហើយក៏ងាកមកផ្ញើឆ្នាំងបាយជាមួយអាជីពចាស់ឡើងវិញយ៉ាងដូច្នេះ៕
© រក្សាសិទ្ធិដោយ thmeythmey.com
