ជាតិ
សង្គមជាតិ
សំរាមក្បែរស្ទឹងសែនក្នុងសង្កាត់កំពង់ក្របៅ ត្រូវបានសម្អាត
× កំពង់ធំ៖ បន្ទាប់ពីពិធីចូលឆ្នាំខ្មែរ សំរាមបានក្លាយជាបញ្ហាចោទ ដែលត្រូវដោះស្រាយ សម្រាប់ថ្នាក់ដឹកនាំសង្កាត់កំពង់ក្របៅ។ គំនរសំរាមមានទីតាំងប្របមាត់ស្ទឹងសែន ជាប់នឹងផ្សារចាស់ ក្នុងសង្កាត់នេះ។
អាជ្ញាធរមូលដ្ឋាន និងក្រុមហ៊ុនប្រមូលសំរាមក្នុងក្រុងស្ទឹងសែនត្រូវជួបគ្នាដើម្បីដោះស្រាយបញ្ហាគំនរសំរាម ដែលធ្វើឲ្យពលរដ្ឋមិនសប្បាយចិត្ត។ សំរាមបានក្លាយជាគំនរភ្នំ ចាប់តាំងពីថ្ងៃចូលឆ្នាំខ្មែរ ដោយមិនមានការដោះស្រាយ។ គំនរសំរាមនៅក្បែរមាត់ស្ទឹងសែន បានបង្កក្លិនអសោធដល់ពលរដ្ឋដែលរស់នៅក្បែរនោះ។
«ឥឡូវនេះ បញ្ហាសំរាម ត្រូវបានដោះស្រាយអស់ហើយ»។ នេះជាការបញ្ជាក់របស់ចៅសង្កាត់កំពង់ក្របៅ លោក ចាន់ ប៊ុន ដែលទទួលស្គាល់ថា សំរាមនេះជាបញ្ហាតូចទេ តែវាបានធ្វើឱ្យឈឺក្បាល។ ការយឺតយ៉ាវរបស់កម្មករប្រមូលសំរាម តែងតែបង្កឲ្យអសណ្តាប់ធ្នាប់ ហើយថាប្រសិនបើមានភ្លៀងទៀតនោះ សំរាមនឹងរឹតតែរាយប៉ាយ។
ទាក់ទងនឹងបញ្ហាសំរាមដែលត្រូវបានទុកចោលតាំងពីក្រោយចូលឆ្នាំខ្មែរមកនោះលោកចៅសង្កាត់កំពង់ក្របៅបានបញ្ជាក់ថា «ដោយសារមានការកកស្ទះសំរាមនេះ ថ្នាក់ដឹកនាំដូចជាលោកអភិបាលក្រុង លោកអធិការក្រុង រួមទាំងខ្ញុំជាចៅសង្កាត់ ប៉ុស្តិ៍រដ្ឋបាលផង បានចុះទៅពិនិត្យជាក់ស្តែងឃើញថា ពិតជាមានបញ្ហាកកស្ទះសំរាមមែន។ អ៊ីចឹងហើយយើងបានពិភាក្សាសម្រេចឱ្យគ្រឿងចក្រមកកើបកកាយយកចេញ»។
បើតាមការបញ្ជាក់របស់បងស្រី សម្ផស្សដែល អាជីវករលក់ដូរនៅក្បែរ ទីតាំងគរសំរាមនោះ គាត់ពិតជាមានអារម្មណ៍រីករាយណាស់ ពេលដែលបញ្ហាសំរាម ត្រូវបានថ្នាក់ដឹកនាំសង្កាត់ ដោះស្រាយបានទាន់ពេលវេលា ហើយមិនបង្កផលប៉ះពាលដល់អាជីករក៏ដូចជាពលរដ្ឋដែលរស់ក្បែរតំបន់នោះ៕
© រក្សាសិទ្ធិដោយ thmeythmey.com