×![]()
ភ្នំពេញ៖ តារាសម្តែងនិងចម្រៀងរលកក្រោយវ័យ២០ឆ្នាំ កញ្ញា ចរិយា ពេជ្រថ្មីៗនេះបែកធ្លាយដំណឹងយ៉ាងរសើបថាត្រូវបានចុះចាញ់អំណាចទឹកលុយ និងទ្រព្យសម្បត្តិរបស់សេដ្ឋីវ័យជាង៤០ឆ្នាំម្នាក់ ហើយរូបនាងក៏យល់ព្រម ប្រគល់បេះដូងឱ្យគេរួចទៅហើយដែរ។
បើតាមប្រភពពីអ្នករួមអាជីពរបស់កញ្ញា ចរិយា ពេជ្រ បានលួចបង្ហើបឱ្យដឹងថា ចំណងស្នេហ៍រវាងចរិយា ពេជ្រ ជាមួយសេដ្ឋីម្នាក់នោះ ទើបតែចាប់ផ្តើមទេ ដោយសារតែបុរសអ្នក មានលុយច្រើនរូបនោះ ព្យាយាមតាមសុំសេចក្តីស្នេហាពីចរិយា ពេជ្រ រហូតធ្វើឱ្យនាងបាក់ចិត្តចំពោះរូបគេតែម្តង ។
អ្វីដែលគេបានឃើញ បានដឹងនោះ គឺបុរសមានទ្រព្យលំដាប់សេដ្ឋីជា ប្រុសស្នេហ៍គ្រាដំបូងរបស់កញ្ញា ចរិយា ពេជ្រ តែងបង្ហាញខ្លួនមកជួបនាងជាប្រចាំ និងធានា ចិញ្ចឹមស្រីស្អាតចរិយា ពេជ្រ ឱ្យរស់នៅក្នុងលំដាប់ខ្ពស់មួយ ដែលរូបនាងមិនធ្លាប់បានជួបកន្លងមក ។ ជាងនេះទៅទៀត គេថែមទាំងធានាធ្វើជាខ្នងបង្អែកសម្រាប់ជួយវែកផ្លូវឱ្យ ចរិយា ពេជ្រ ល្បីឈ្មោះបានលឿន នៅក្នុងអាជីពសិល្បៈទៀតផង។ ហើយសង្សារបណ្តូលចិត្តគ្រាដំបូងរបស់ចរិយាពេជ្រ រូបនេះ គេក៏ មិនមានបំណងហាមឃាត់ ឬក៏យកស្រីស្នេហ៍ វ័យក្មេងរបស់ខ្លួន ទៅលាក់ទុកឱ្យសោយសុខ នៅក្នុងភូមិគ្រឹះនោះដែរ ។
តែគួរឱ្យស្តាយ បើ តាមដំណឹងថា សេដ្ឋីរូបនោះ មានប្រពន្ធកូន និងជាបុរសម្នាក់ដែលសម្បូរស្រីស្នេហ៍ច្រើន ណាស់ ។ គេមិនដឹងថា កញ្ញាចរិយា ពេជ្រ បាន ដឹងហើយ ឬនៅទេ ហើយគេក៏នាំគ្នាជួយព្រួយ បារម្ភពីស្នេហាគ្រាដំបូងរបស់ស្រីស្រស់ចរិយា ពេជ្រ ផងដែរ ខ្លាចត្រូវ កន្លង់រូបនេះក្រេបអស់ រសជាតិលម្អងឆ្អែតឆ្អន់រួចក៏បោះបង់នាងចោល ។
ពាក់ព័ន្ធទៅនឹងព័ត៌មានថា កញ្ញាចរិយា ពេជ្រ មានសេដ្ឋីចិញ្ចឹមនោះនៅមិនទាន់សុំការបំភ្លឺ រឿងពិតពីចរិយា ពេជ្រ នៅឡើយទេ ពីព្រោះ ទូរស័ព្ទរបស់នាង មិនអាចទំនាក់ទំនងបាន។ យើងមិនទាន់ហ៊ានសន្និដ្ឋានថា នោះវាជារឿងពិត ឬក៏យ៉ាងណាដែរ ពីព្រោះអ្វីដែលយើងទើបទទួលបានពេលនេះ វាស្ថិតនៅក្នុងលក្ខណៈមាត់ចាបមាត់ព្រាបតែប៉ុណ្ណោះ៕
© រក្សាសិទ្ធិដោយ thmeythmey.com
