ជាតិ
សង្គមជាតិ
កាកបាទក្រហមសៀមរាបទទួលថវិកាពីសប្បុរសជាង៥០ម៉ឺនដុល្លារថ្ងៃខួបទី១៥២
× សៀមរាប៖ កាកបាទក្រហមខេត្តសៀមរាប បានទទួលទឹកប្រាក់សរុបជាង៥០ ម៉ឺនដុល្លារសហរដ្ឋអាមេរិក ពីសប្បុរសជននានា ក្នុងខួបទី១៥២ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា។
តាមពិតទៅថ្ងៃខួបលើកទី១៥២ ទិវាពិភពលោក កាកបាទក្រហម អឌ្ឍចន្ទក្រហម ៨ឧសភា ឆ្នាំ២០១៥ ត្រូវនឹងថ្ងៃទី៨ ឧសភាស្អែកនោះទេ តែសម្រាប់បណ្តាខេត្ត ពិធីនេះត្រូវរៀបចំមុន ដែលពិធីធំនឹងធ្វើឡើងនៅរាជធានីភ្នំពេញ។ ប្រធានបទសម្រាប់ឆ្នាំ២០១៥ ក្នុងការប្រារព្ធទិវាកាកបាទក្រហម គឺកម្លាំងមនុស្សធម៌ៈ គោលការណ៍គ្រឹះក្នុងសកម្មភាព។
ការប្រារព្ធខួបលើកទី១៥២ ទិវាពិភពលោក កាកបាទក្រហម អឌ្ឍក្រហមនៅខេត្តសៀមរាប រៀបចំឡើងនៅថ្ងៃទី៥ ឧសភា នៅសាលមហាស្រព រ៉ូសាណា ប្រ៊តវ៉េ ដែលមានលោក ទៀ បាញ់ ជាតំណាងប្រធានកាកបាទក្រហមកម្ពុជា ជាអ្នកអានសារលិខិតរបស់លោកស្រី ប៊ុន រ៉ានី នៅក្នុងពិធីនៅពេលនោះ។ ក្នុងលិខិតនោះបានបញ្ជាក់ថា «ថ្វីត្បិតនៅក្នុងឆ្នាំ២០១៤ កម្ពុជាពុំមានគ្រោះជំនន់ និងភ្លៀងធ្ងន់ធ្ងរដូចឆ្នាំ២០១៣ ក៏ដោយ ក៏កាកបាទក្រហមកម្ពុជា នៅតែបាននិងកំពុងបន្តជួយប្រជាពលរដ្ឋដែលជួបការលំបាក និងការខ្វះខាតនៅតាមមូលដ្ឋានសហគគមន៍ ជាពិសេស យើងបានផ្តល់ជំនួយមនុស្សធម៌ដល់ជនរងគ្រោះដោយខ្យល់ព្យុះ ខ្យល់កន្ត្រាក់ គ្រោះទឹកជំនន់ គ្រោះរាំងស្ងួត គ្រោះអគិ្គភ័យ និងគ្រោះមហន្តរាយដោយប្រការផ្សេង...»។
នៅក្នុងពិធីរម្លឹកខួបលើកទី១៥២នោះដែរ សប្បុរជនខ្មែរ និងបរទេស នៅក្នុងខេត្តសៀមរាប បានឈរតម្រៀបជួរគ្នា ទម្លាក់ស្រោមសំបុត្រចូលទៅក្នុងហិបកាកបាទក្រហម ដែលមានលោក ទៀ បាញ់ និងភរិយា លោក ឃឹម ប៊ុនសុង ចាំទទួល និងថតរូបជាអនុស្សាវរីយ៍ផង។ ក្រោយបញ្ចប់ អ្នករៀបចំពិធីប្រកាសថា កាកបាទក្រហមខេត្តសៀមរាប បានទទួលថវិកាពីសប្បុរសជនចំនួន ៥០០,៧០៧ ដុល្លារសហរដ្ឋអាមេរិក គិតទាំងលុយរៀល។
យោងតាមរបាយការណ៍ ដែលអានដោយអភិបាលខេត្តសៀមរាប លោក ឃឹម ប៊ុនសុង បានបញ្ជាក់ថា ក្នុងឆ្នាំ២០១៤-២០១៥ សាខាកាកបាទក្រហមសៀមរាប បានជួយសង្គ្រោះដល់ជនរងគ្រោះ ដោយសារគ្រោះមហន្តរាយបានចំនួន ៦៥៦ករណី ដោយមានអ្នកស្លាប់ចំនួន ៤៥នាក់ និងរងរបួស ១៨នាក់៕
© រក្សាសិទ្ធិដោយ thmeythmey.com