ពិភពតារា៖ ព្រំ រដ្ឋា បោះទុនធ្វើជំនួញផលិតរឿងភាគទូរទស្សន៍
×
ភ្នំពេញ៖តារាសម្តែង និងជាពិធីការិនីមេម៉ាយមួយដ៏ស្រស់សោភា អ្នកនាង ព្រំ រដ្ឋា បាននិងកំពុងធ្វើជំនួញលើការផលិតខ្សែវីដេអូភាគសម្រាប់ទូរទស្សន៍ បន្ថែមលើការងារដ៏មមាញឹករបស់នាងក្នុងអាជីពសិល្បៈ និងការគ្រប់គ្រងហាងកែសម្ផស្សដែលមានស្រាប់នោះ។
បច្ចុប្បន្ននេះអ្នកនាង ព្រំ រដ្ឋា កំពុងបោះទុនចំណាយដើមទុនសម្រាប់ប្រើប្រាស់នៅក្នុងការផលិតខ្សែវីដេអូភាគខ្មែរ ដើម្បីឲ្យមានគុណភាពទាក់ទាញក្នុងនោះ ក៏នឹងមានសមាសភាពសម្តែងដោយតារាល្បីៗផងដែរ។
បើទោះបីក្លាយជាស្រីមេម៉ាយកូន១ក៏ដោយក៏រូបសម្រស់របស់អ្នកនាង ព្រំ រដ្ឋា ត្រូវបានគេមើលឃើញថា នៅតែស្រស់ផូរផង់មិនចាញ់ស្រីក្រមុំព្រមទាំងនៅតែមានមន្តស្នេហ៍ធ្វើឱ្យបុរសៗជាច្រើនបានឈ្លក់វង្វេង និងកំពុងតាមសុំស្នេហ៍ថែមទៀតផង។ ដោយសារនៅតែស្រលាញ់ និងចូលចិត្តវិស័យសិល្បៈដែលមិនអាចកាត់ផ្តាច់បាននោះទើបធ្វើឲ្យអ្នកនាង ព្រំ រដ្ឋា សម្រេចចិត្តបោះទុនធ្វើជំនួញលើមុខរបរផលិតខ្សែវីដេអូបន្ថែមពីលើមុខអាជីពជាអ្នកគ្រប់គ្រងកម្មវិធីសិល្បៈនៅ ប៉ុស្តិ៍ទូរទស្សន៍មួយ និងជាម្ចាស់ហាងកែសម្រស់មួយនៅក្នុងរាជធានីភ្នំពេញ។
អ្នកនាង ព្រំ រដ្ឋា បានទាក់ទងក្រុមអ្នកជំនាញជំនាន់ក្រោយដើម្បីធ្វើជាអ្នកផលិត អ្នកសរសេរជាសាច់រឿង រួមទាំងបានជ្រើសរើសតួអង្គសម្តែងដូចជាលោក ហេង ប៊ុនលាភ, កញ្ញាទេព សម្ជស្ស, កញ្ញា អ៊ិន លក្ខិណា ព្រមទាំងមានវត្តមានរូបនាងផ្ទាល់សម្រាប់ការសម្ដែងថតក្នុងខ្សែ វីដេអូភាគដំបូងនេះផងដែរ ដែលមានចំណងជើងថា “វិថីនារី” ៕
© រក្សាសិទ្ធិដោយ thmeythmey.com