ជាតិ
សារព័ត៌មានបរទេសចុះផ្សាយរឿងរ៉ាវ MyTV និង Allen ជាមួយនឹងការរិះគន់ធ្ងន់ៗ
× មិនត្រឹមតែបណ្តាញព័ត៌មានក្នុងស្រុក និងអ្នកប្រើប្រាស់បណ្តាញសង្គមនៅកម្ពុជានោះឡើយ ករណីដែលកម្មវិធី «ពេញចិត្ត ឬអត់?» របស់ទូរទស្សន៍ MyTV យកការនឹករលឹកម្តាយរបស់កុមារី Autumn Allen ទៅលេងសើចនាឱកាសនៃទិវា Mother’s Day កាលពីថ្ងៃអាទិត្យ ក៏ទទួលបាននូវការចាប់អារម្មណ៍ពីសារព័ត៌មានបរទេសផងដែរ។
Sky News បានដកស្រង់ប្រភពពីកាសែត The Phnom Penh Post និងដាក់ចំណងជើងថា៖ «កម្មវិធីលេងសើចរបស់ទូរទស្សន៍ទាក់ទងនឹងការរៀបចំឲ្យក្មេងស្រីម្នាក់ជួបម្តាយរបស់ខ្លួន ទទួលរងនូវការរិះគន់»។ សារព័ត៌មានដែលមានមូលដ្ឋាននៅអង់គ្លេសមួយនេះ បានសរសេរថា ក្មេងស្រីអាយុ១៣ឆ្នាំម្នាក់គិតថាខ្លួននឹងបានជួបម្តាយដែលខ្លួនបានបែកកាលពីអាយុ៦ឆ្នាំ ប៉ុន្តែទូរទស្សន៍បែរជាបានយកតួកំប្លែងម្នាក់ដែលមានការតុបតែងខ្លួនជាស្រីទៅជំនួសវិញ។
Sky News ក៏បានបង្ហាញឃ្លីបវីដេអូរបស់កុមារី Allen នាអំឡុងនៃកម្មវិធី «ពេញចិត្ត ឬអត់?» ផងដែរ។ តាមប្រភពពី The Phnom Penh Post សារព័ត៌មាន Sky News ក៏បានដកស្រង់សម្តីផ្ទាល់របស់ Allen ដែលថា ក្រោយការលែងលះរវាងឪពុក និងម្តាយ នាងក៏ព្យាយាមចង់ជួបម្តាយដែរ ប៉ុន្តែនាងមិនដឹងថា គាត់រស់នៅទីណាឡើយ ដោយគ្រាន់តែដឹងតាមឪពុកថា ម្តាយខ្លួនប្រហែលជារស់នៅ Scottsdale, Arizona សហរដ្ឋអាមេរិក។
ដូចគ្នាផងដែរ Daily Mail ដែលជាសារព័ត៌មានលក់ដាច់ជាងគេលំដាប់ទីពីរនៅចក្រភពអង់គ្លេស បានចាត់ទុកថា «ពេញចិត្ត ឬអត់?» គឺជាកម្មវិធីដ៏អាក្រក់មួយ (Cruel Cambodian TV Show)។ ជាមួយនឹងប្រភពព័ត៌មានដែលទទួលបានពី The Phnom Penh Post សារព័ត៌មាន Daily Mail បានចុះផ្សាយរូបថតជាច្រើនរបស់កុមារី Allen និងការផ្សាយនៃកម្មវិធី «ពេញចិត្ត ឬអត់?» នាទិវា Mother’s Day។
ដោយឡែក គេហទំព័រព័ត៌មាន Asian Correspondent ដែលជាដៃគូរបស់ទីភ្នាក់ងារព័ត៌មាន AP ប្រចាំតំបន់អាស៊ី បានលើកឡើងពីការសុំទោសរបស់ទូរទស្សន៍ MyTV ចំពោះកុមារី Autumn Allen ក្រោយការរិះគន់យ៉ាងចាស់ដៃពីអ្នកប្រើប្រាស់បណ្តាញសង្គម។ Asian Correspondent បានផ្តល់ព័ត៌មានបន្ថែមថា Allen ដែលចេះច្រៀងជាភាសាខ្មែរ អង់គ្លេស ចិន និងបារាំងនោះ បានកើតនៅទឹកដីអាមេរិក ហើយបានមករស់នៅកម្ពុជាកាលពីអាយុ៦ឆ្នាំ។
ទូរទស្សន៍ ITV News របស់អង់គ្លេស ក៏ចាប់អារម្មណ៍ផងដែរចំពោះករណីនេះ។ ITV News បានភ្ជាប់មតិរបស់អ្នកវិភាគសង្គម លោក អ៊ូ វិរៈ ដែលបានរិះគន់កម្មវិធី និងអ្នករៀបចំកម្មវិធី «ពេញចិត្ត ឬអត់?» ដោយភ្ជាប់ជាមួយនឹងការចុះផ្សាយរបស់សារព័ត៌មានថ្មីៗ ។
បណ្តាព័ត៌មានផ្សេងទៀតដែលបានចុះផ្សាយរឿងរ៉ាវនេះមានដូចជា Le Journal de Montréal របស់កាណាដា, The Daily Mirror, The Thai Visa News, Fox News, Channel4, Metro, Headlines & Global News, Her.ie , IJ Review, UPI, Het Laatste Nieuws , Opposing Views ជាដើម៕
សម្រាប់ព័ត៌មានដែលទាក់ទង សូមអាន៖
-ក្រុមការងារកម្មវិធី «ពេញចិត្ត ឬអត់?» ជប់លៀងសុំទោសកុមារី Allen និងក្រុមគ្រួសារ
- កម្មវិធីទូរទស្សន៍មួយយកការនឹកម្តាយរបស់ក្មេងស្រីទៅលេងសើច
- MyTV សុំទោសកុមារី Allen និងក្រុមគ្រួសារចំពោះកំហុសអចេតនារបស់ខ្លួន
© រក្សាសិទ្ធិដោយ thmeythmey.com