កីឡាជាតិ
ម៉ោង ៣ រសៀលនេះក្រុម U-23 កម្ពុជា ប៉ះ U-23 កូរ៉េខាងត្បូង
×
ក្រុមបាល់ទាត់ជម្រើសយុវជនក្រោមអាយុ២៣ ឆ្នាំ (U-23) របស់កម្ពុជា នឹងប្រកួតមិត្តភាពអន្តរជាតិជាមួយក្រុមខ្លាំងនៅតំបន់អាស៊ី គឺ U-23 កូរ៉េខាងត្បូង នៅវេលាម៉ោង ៣ រសៀលថ្ងៃទី ១៣ ខែ ឧសភា ឆ្នាំ ២០១៥ នេះ លើទីលាន Thống Nhất Stadium ក្នុងទីក្រុងហូជីមិញ ប្រទេសវៀតណាម។
នេះជាប្រកួតមិត្តភាពអន្តរជាតិជាលើកទី៣ ហើយចំពោះក្រុម U-23 កម្ពុជា ក្រោយប្រកួត ២ លើកមុនធ្វើឡើងនៅទឹកដីម៉ាឡេស៊ី ដោយចាញ់ក្រុម U-22 ម្ចាស់ផ្ទះក្នុងលទ្ធផល ២ ទល់ ៣ និង ស្មើគ្នា៣ ទល់ ៣ កាលពីចុងខែមេសា កន្លងទៅ។
ក្រុមកម្ពុជា ដឹកនាំដោយលោកគ្រូបង្វឹកជនជាតិកូរ៉េខាងត្បូង Lee Tae Hoon កំពុងតែត្រៀមខ្លួនទៅចូលរួមប្រកួតកីឡាស៊ីហ្គេមឆ្នាំ ២០១៥ នៅប្រទេសសិង្ហបុរី ដែលនឹងចាប់ផ្ដើមនៅដើមខែ មិថុនា ដោយស្ថិតក្នុងពូល ជាមួយ ឥណ្ឌូណេស៊ី, មីយ៉ាន់ម៉ា, ហ្វីលីពីន និង ម្ចាស់ផ្ទះសិង្ហបុរី។
ដោយឡែកក្រុមកូរ៉េខាងត្បូង ធ្វើដំណើរមកកាន់ទឹកដីអាស៊ីអាគ្នេយ៍នេះដើម្បីត្រៀមខ្លួនប្រកួតជម្រុះកីឡាអូឡាំពិករដូវក្ដៅឆ្នាំ២០១៦ នៅប្រទេសប្រេស៊ីល និង ត្រូវចូលរួមប្រកួតពានរង្វាន់ទ្វីបអាស៊ីជុំផ្ដាច់ព្រ័ត្រ 2016 AFC U-23 Championship នៅប្រទេសកាតារ ផងដែរ។ មុនប៉ះកម្ពុជា ក្រុមនេះបានប្រកួតស្មើគ្នា ០ ទល់ ០ ជាមួយក្រុម U-23 វៀតណាម កាលពីថ្ងៃទី ៩ ឧសភា កន្លងទៅនៅទីក្រុងហាណូយ។
តើកម្ពុជា អាចធ្វើបានល្អកម្រិតណា ពេលប៉ះក្រុមខ្លាំងកូរ៉េខាងត្បូង នៅថ្ងៃនេះ?
© រក្សាសិទ្ធិដោយ thmeythmey.com