កីឡាជាតិ
ជាតិ
ឈុតស៊ីហ្គេមកម្ពុជាចាញ់ U-22 កូរ៉េខាងត្បូង ១-០ នាជំនួបកម្តៅសាច់ដុំនៅហូជីមិញ ឈុតស៊ីហ្គេមកម្ពុជាបានចាញ់ក្រុមជម្រើសជាតិអាយុក្រោម២២ឆ្នាំកូរ៉េខាងត្បូង ១-០ នាជំនួបមិត្តភាពកម្តៅសាច់ដុំនៅកីឡដ្ឋាន Thong Nhat Stadium ក្នុងក្រុងហូជីមិញ ប្រទេសវៀតណាម នៅរសៀលថ្ងៃទ១៣ ខែឧសភា។ គ្រាប់បាល់ជ័យជម្នះរបស់យុវជនកូរ៉េខាងត្បូង បានកើតឡើងនៅក្នុងនាទី ទី៥២ ។
នេះជាប្រកួតមិត្តភាពអន្តរជាតិជា លើកទី៣ ហើយចំពោះក្រុម U-23 កម្ពុជា ក្រោយប្រកួត ២ លើកមុនធ្វើឡើងនៅទឹកដីម៉ាឡេស៊ី ដោយចាញ់ក្រុម U-22 ម្ចាស់ផ្ទះក្នុងលទ្ធផល ២ ទល់ ៣ និង ស្មើគ្នា៣ ទល់ ៣ កាលពីចុងខែមេសា កន្លងទៅ។
ក្រុមកម្ពុជា ដឹកនាំដោយលោកគ្រូបង្វឹកជនជាតិកូរ៉េខាងត្បូង Lee Tae Hoon កំពុងតែត្រៀមខ្លួនទៅចូលរួមប្រកួតកីឡាស៊ីហ្គេមឆ្នាំ ២០១៥ នៅប្រទេសសិង្ហបុរី ដែលនឹងចាប់ផ្ដើមនៅដើមខែ មិថុនា ដោយស្ថិតក្នុងពូល ជាមួយ ឥណ្ឌូណេស៊ី, មីយ៉ាន់ម៉ា, ហ្វីលីពីន និង ម្ចាស់ផ្ទះសិង្ហបុរី។
ដោយឡែកក្រុមកូរ៉េខាងត្បូងក្រោមការដឹកនាំរបស់លោក Shin Taeyong ធ្វើដំណើរមកកាន់ទឹកដីអាស៊ីអាគ្នេយ៍នេះដើម្បីត្រៀមខ្លួនប្រកួតជម្រុះ កីឡាអូឡាំពិករដូវក្ដៅឆ្នាំ២០១៦ នៅប្រទេសប្រេស៊ីល និង ត្រូវចូលរួមប្រកួតពានរង្វាន់ទ្វីបអាស៊ីជុំផ្ដាច់ព្រ័ត្រ 2016 AFC U-23 Championship នៅប្រទេសកាតា ផងដែរ បន្ទាប់ពីបញ្ចប់ចំណាត់ថ្នាក់លេខមួយក្នុងការប្រកួតជម្រុះនៅប្រទេសឥណ្ឌូនេស៊ី កាលពីចុងខែមិនា ដោយបានយកឈ្នះម្ចាស់ផ្ទះឥណ្ឌូនេស៊ី ៤-០ ឈ្នះប្រ៊ុយណេ ៥-០ និងទីម័រខាងកើត ៣-០ ។
មុនប៉ះកម្ពុជា ក្រុមនេះបានប្រកួតស្មើគ្នា ០ ទល់ ០ ជាមួយក្រុម U-23 វៀតណាម កាលពីថ្ងៃទី ៩ ឧសភា កន្លងទៅនៅទីក្រុងហាណូយ។
ជម្រើស១១នាក់ដំបូង៖ អ៊ុំ សេរីរ័ត្ន, សឿយ វិសាល, ណុប តុលា, នេន សុធារ័ត្ន, រស់ សំអឿន, ឈិន ឈឿន, សុះ ស៊ូហាណា, ភួង សុខសាណា, ហូយ ផល្លីន, ប្រាក់ មុន្នីឧត្តម (ប្រធានក្រុម), សុខ ចាន់រស្មី។
រូបថតទាំងអស់ផ្តល់ដោយ លោក ឆាំង ពិសិដ្ឋ
© រក្សាសិទ្ធិដោយ thmeythmey.com