ពីនេះ ពីនោះ
ប្រចៀវអង្គាម មានរន្ធប្រមុះ ដូចប្រមុះជ្រូក
× សេចក្តីផ្តើម៖ វាក៏ជាប្រភេទប្រចៀវដែលស្ថិតនៅក្នុងក្រុមប្រចៀវស៊ីសត្វល្អិតផងដែរ។ ពួកវាងាយស្រួលសម្គាល់ដោយពិនិត្យមើលកន្ទុយរបស់វា ដែលមិនព័ទ្ធជុំវិញដោយស្រទាប់ភ្នាស់ស្តើងរបស់កន្ទុយ ដែលខុសពីប្រភេទប្រចៀវភាគច្រើន។ ពីមុនមានសត្វប្រចៀវនេះរាប់លានក្បាលរស់នៅតាមដំបូលអាគារសារមន្ទីរជាតិកម្ពុជា ប៉ុន្តែសព្វថ្ងៃបានហើរចេញអស់ ដោយការរៀបចំជួសជុលសារមន្ទីរជាថ្មី។ ប្រភេទនេះ លាមករបស់វាក៏អាចយកមកធ្វើជីសម្រាប់ដាំដំណាំផងដែរនៅពេលដែលវាស៊ីបម្លែងសត្វល្អិតឲ្យទៅជាជីដ៏មានជីជាតិ។ នៅតាមតំបន់ខ្លះ ក្នុងប្រទេសកម្ពុជាមានប្រជាជនមួយចំនួនគាត់ អាចរកប្រាក់ចំណូលបានតាមរយៈការប្រមូលលាមក សត្វប្រចៀវសម្រាប់លក់ឲ្យកសិករ។
ភិនភាគ និងជីវសាស្ត្រ៖ ប្រចៀវប្រភេទនេះមានលលាដ៏ក្បាលតូចជាងប្រចៀវផ្សេងៗទៀតភ្ជាប់ជាមួយធ្មេញថ្គាមលើតូច។ ផ្នែកខាងលើដងខ្លួនមានរោមខ្លីពណ៌ត្នោត ហើយផ្នែកខាងក្រោមមានរោមពណ៌ប្រផេះស្រាល។ បបូរមាត់លើមានភាពជ្រួញអង្កាញ់ខ្លាំងភ្ជាប់រហូតដល់ត្រចៀក ហើយមានរន្ធប្រមុះដូចប្រមុះជ្រូក។ វាជាសត្វចូលចិត្តរស់នៅជាក្រុមរហូតដល់រាប់ពាន់ក្បាលតាមរូងភ្នំធំៗដែលមានសីតុណ្ហភាពត្រជាក់ និងស៊ីសត្វល្អិតដែលហើរក្នុងអាកាស និងធ្វើសំបុកនៅមាត់រូងដែលវារស់នៅ។
រប៉ាយរស់នៅ៖ ប្រភេទនេះមានស្ទើរគ្រប់ទីកន្លែងក្នុងប្រទេស។ ប្រភេទនេះប្រហែលជាប្រភេទដែលត្រូវបានគេស្គាល់ច្បាស់ជាងគេនៅក្នុងប្រទេសកម្ពុជា ដែលគេតែងតែឃើញ វារស់នៅជាហ្វូងមានចំនួនច្រើនៅតាមទ្រនំនានា ក្នុងរូងភ្នំ ផ្ទាំងថ្ម និងនៅតាមចន្លោះ ពិដានដំបូលអាគារនានានៅក្នុងទីប្រជុំ ជន និងទីក្រុង។
ស្ថានភាពអភិរក្ស៖ ជាប្រភេទមានដោយបង្គួរ ដោយប្រចៀវស៊ីសត្វល្អិតជាអាហារ ទើបធ្វើឲ្យគេយល់ឃើញថា វាមានប្រយោជន៍ច្រើនដល់ស្រែចម្ការរបស់កសិករ។ ប៉ុន្តែការបាត់បង់ទីជម្រកដែលវាធ្លាប់រស់នៅបានក្លាយទៅជាការគម្រាមកំហែងដ៏ធ្ងន់ធ្ងរដល់ការរស់នៅរបស់ពួកវា៕
© រក្សាសិទ្ធិដោយ thmeythmey.com