ពីនេះ ពីនោះ
×![]()
កាលពីមុនអ្នកស្រាវជ្រាវបានបញ្ជាក់ថា ការរួមភេទកាន់តែច្រើននោះនឹងធ្វើឱ្យយើងសប្បាយចិត្តព្រោះថាការរួមភេទនិងសុភមង្គលគឺមានទំនាក់ទំនងវិជ្ជមាន។ ប៉ុន្តែការសិក្សាថ្មីមួយរបស់សាកលវិទ្យាល័យ Carnegie Mellon បានបង្ហាញថាការបង្កើនសកម្មភាពផ្លូវភេទច្រើនដងពេក នឹងមិនអាចធ្វើឲ្យមនុស្សមានសុភមង្គលបានឡើយ។ នេះបើយោងតាមលទ្ធផលនៃការស្រាវជ្រាវ ដែលចុះផ្សាយនៅក្នុងកាសែត New York Daily News ។
អ្នកស្រាវជ្រាវបានបញ្ជាក់ថា កាលពីពេលមុនគេបានរកឃើញពីទំនាក់ទំនងជាវិជ្ជមានរវាងការរួមភេទនិងសុភមង្គល ព្រោះថាភាពសប្បាយរីករាយឬការមានសុខភាពល្អ នឹងអាចជំរុញឲ្យដៃគូមានការរួមភេទកាន់តែច្រើន នឹងអាចធ្វើឱ្យអ្នករីករាយ។ ប៉ុន្តែការបង្កើនចំនួនដងនៃការរួមភេទជាមួយដៃគូ គឺមិនមែនរូបមន្តសម្រាប់ធ្វើឲ្យមានសុភមង្គលនោះទេ។
សាកលវិទ្យាល័យ Carnegie Mellon បានសម្ភាសន៍និងសាកសួរមនុស្សដែលមានអាយុចន្លោះពី៣៥ទៅ ៦៥ ឆ្នាំដែលអ្នកទាំងនោះគឺជាមនុស្សស្រលាញ់ភេទផ្ទុយគ្នានិងបានរៀបការរួមហើយ។អ្នកស្រាវជ្រាវបានសម្ភាសន៍ពួកគេដើម្បីបង្កើតស្ថិតិជាមូលដ្ឋានមួយស្តីពីការរួមភេទញឹកញាប់ប្រចាំសប្តាហ៍របស់ប្តីប្រពន្ធ។ អ្នកស្រាវជ្រាវក៏បានស្នើឲ្យគូស្វាមីភរិយាមួយចំនួន បង្កើនចំនួននៃការរួមភេទទ្វេដង លើសពីអ្វីដែលពួកគេជាធ្វើជាធម្មតាក្នុងសប្តាហ៍ផងដែរ។
ការពិសោធន៍នេះបានបន្តអស់រយៈពេលបីខែ ក្រោយមកក្រុមអ្នកស្រាវជ្រាវ ក៏បានសាកសួរដៃគូទាំងនោះពីស្ថានភាពនៃការរួមភេទរបស់ពួកគេ។ ជាលទ្ធផល ប្ដីប្រពន្ធដែលបង្កើនការរួមភេទកាន់តែច្រើនដង គឺធ្វើឲ្យពួកគេកាន់តែកាត់បន្ថយចំណង់ផ្លូវភេទ ព្រមទាំងមានការថយចុះនូវក្ដីសុខស្រួលក្នុងជីវិតផ្លូវភេទរបស់គូស្វាមីភរិយាទាំងនេះផងដែរ៕
© រក្សាសិទ្ធិដោយ thmeythmey.com
