នាយករដ្ឋមន្ត្រី ស្នើឲ្យដំឡើងប្រាក់ឧបត្ថម្ភ និងប្រាក់បំប៉នទ្វេដងដល់ក្រុមកីឡាជម្រើសជាតិ

កីឡាជាតិ

នាយករដ្ឋមន្ត្រី ស្នើឲ្យដំឡើងប្រាក់ឧបត្ថម្ភ និងប្រាក់បំប៉នទ្វេដងដល់ក្រុមកីឡាជម្រើសជាតិ

18, May 2015 , 8:19 pm

រូបភាព

ដោយ: រួបរួម

លោកនាយករដ្ឋមន្ត្រី ហ៊ុន សែន បានស្នើឲ្យមានការកែសម្រួលប្រកាសអន្តរក្រសួងស្តីពីការផ្តល់ប្រាក់ឧបត្ថម្ភ និងប្រាក់បំប៉នដល់ក្រុមកីឡាជម្រើសជាតិកម្ពុជា ពោលគឺឲ្យមានចំនួនកើនទ្វេដងដើម្បីលើកទឹកចិត្តដល់អត្តពលិក គ្រូបង្វឹក និងអនុរក្ស។ ការណែនាំរបស់ប្រមុខរដ្ឋាភិបាលគឺធ្វើឡើងនាជំនួប កាលពីព្រឹកថ្ងៃទី១៨ ខែឧសភា នៅវិមានសន្តិភាព ជាមួយប្រតិភូ និងអត្តពលិកកម្ពុជា២៥៦រូប ដែលត្រៀមចេញទៅចូលរួមកីឡាស៊ីហ្គេមលើកទី២៨ នៅប្រទេសសិង្ហបុរី។

លោក អ៊ុក សិទ្ធីជាតិ អគ្គនាយកនៃអគ្គនាយកដ្ឋានកីឡារបស់ក្រសួងអប់រំ យុវជន និងកីឡា បានពន្យល់ថា ប្រាក់បំប៉ន គឺជាប្រាក់អាហារូបត្ថម្ភបំប៉នកីឡាករ-កីឡាការិនីឲ្យមានថាមពលគ្រប់គ្រាន់ប្រចាំថ្ងៃសម្រាប់ការហ្វឹកហាត់បច្ចេកទេសដើម្បីបង្កើនសិទ្ធផល ហើយប្រាក់ឧបត្ថម្ភគឺការផ្តល់មិនអចិន្ត្រៃយ៍តាមរយៈពេលកំណត់ធ្វើអ្វីមួយ។

បើតាមការណែនាំរបស់លោកនាយករដ្ឋមន្ត្រី លោក អ៊ុក សិទ្ធីជាតិ បានលើកឡើងថា កីឡាករ-កីឡាការិនីដែលស្ថិតក្នុងការប្រមូលផ្តុំ នឹងត្រូវបានតម្លើងប្រាក់ឧបត្ថម្ភប្រចាំខែពី២៥ម៉ឺនរៀល ទៅ៥០ម៉ឺនរៀល គ្រូបង្វឹកពី៣០ម៉ឺនរៀលទៅ៦០ម៉ឺនរៀល និងអនុរក្សពី១៥ម៉ឺនរៀលទៅ៣០ម៉ឺនរៀល។ ចំពោះប្រាក់បំប៉នប្រចាំថ្ងៃរបស់អត្តពលិកដែលបច្ចុប្បន្នមានចំនួន២៨០០០រៀលក្នុងមួយថ្ងៃ ឬ៨៤ម៉ឺនរៀលក្នុងមួយខែនោះ នឹងកើនដល់១លាន៣សែនរៀលក្នុងមួយខែ។

មន្ត្រីជាន់ខ្ពស់ផ្នែកកីឡារូបនេះ បានអះអាងថា ក្រសួងរបស់លោក រួមជាមួយក្រសួងសេដ្ឋកិច្ច និងហិរញ្ញវត្ថុ នឹងរៀបចំប្រកាសអន្តរក្រសួងឡើងវិញ ទៅតាមការលើកឡើងរបស់លោកនាយករដ្ឋមន្ត្រី ហើយនឹងត្រូវអនុវត្តចាប់ពីឆ្នាំក្រោយតទៅ ខណៈការប្រមូលផ្តុំនៅឆ្នាំនេះ ត្រូវចប់សព្វគ្រប់ហើយ។

នាជំនួបកាលពីព្រឹកថ្ងៃចន្ទផងដែរ លោកនាយករដ្ឋមន្ត្រី បានលើកទឹកចិត្តឲ្យក្រុមកីឡាករ-កីឡាការិនីខិតខំប្រឹងប្រែងដើម្បីដណ្តើមមេដាយជូនជាតិ និងគោរពឲ្យបាននូវក្រមសីលធម៌ សុជីវធម៌។ ជាមួយគ្នានេះ លោកបានឧបត្ថម្ភដល់ប្រតិភូទាំងអស់ក្នុងម្នាក់ៗចំនួន៣០០ដុល្លារអាមេរិក។

សម្រាប់ស៊ីហ្គេមលើកទី២៨នៅប្រទេសសិង្ហបុរីដែលចាប់ផ្តើមជាផ្លូវការនៅថ្ងៃទី៥ ខែមិថុនា កម្ពុជាបញ្ជូនកីឡាចំនួន២២ប្រភេទឲ្យចូលរួម ក្នុងកីឡាករ-កីឡាការិនីមានចំនួន១៧៦នាក់៕