ពីនេះ ពីនោះ
× ស្រលាញ់សក់ តែខ្ពើមសក់
(បទៈ ពាក្យ៧)
ប្រុសស្រីស្រលាញ់សក់ខ្លាំងណាស់ សក់ស្តើងសក់ក្រាស់ដុះគ្រប់គ្នា
ខំកក់ថែផ្លុំបាញ់ខំការពារ សម្រស់សោភាព្រោះតែសក់។
រៀបចេញទៅណាជ្រោងសិតវែក ផ្អៀងផ្អងប្រឹងញែកឆ្លុះកញ្ចក់
លាបថ្នាំអ៊ុតផ្លុំកៀបបន្តក់ មានក្រាស់សិតសក់សារ៉ាយទៀត។
ស្រីៗតែងខ្លួនចូលពិធី រាប់សិបនាទីប្រឹងខំឆ្លៀត
សក់ស្កូវលេចចេញខំលាបត្បៀត ម្កុដបូរក្រងកៀបណែនពេញក្បាល។
ម្នាក់ៗនាំគ្នាខ្លាចស្កូវណាស់ ខ្លាចគេថាចាស់ភ័យជ្រួលច្រាល
ខ្លាចស្រីមិនស្និទ្ធប្រុសមិនស្នាល ឃើញស្កូវឈឺឆ្អាលទិញថ្នាំលាប។
អ្នកខ្លះផលិតផលណែនពេញទួ នៅតែរអ៊ូថាមិនស្កៀប
ខំរកខំទិញថែមឲ្យជ្រាប ខ្លះគិតចង់ប្រៀបដូចតារា។
កាត់សក់ម្តងៗចង់ឆ្កួតជាង ឲ្យគេប្រិតព្រៀងមើលផងណា
បើកាត់រួចហើយមិនសង្ហា ចាំទុកចុះណាស្បថលែងចូល។
លុយកាក់ចំណាយលើគ្រឿងប្រើ ចង់ស្អាតគ្រាន់បើខំប្រមូល
មិនហ៊ានស៊ីចុកខំបញ្ចូល មិនហ៊ានទិញហូលថែសក់សិន។
ប៉ុន្តែបើសក់ជ្រុះចូលបាយ ខ្ពើមក្តៅក្រហាយដូចខ្មោចឆ្អិន
ខ្ពើមណាស់លោកអើយគេចចេញសិន សក់ខ្មែរ យួន ចិន ខ្ពើមទាំងអស់។
ស្រលាញ់ខ្លាំងណាស់ម្តេចក៏ខ្ពើម ពីមុនជ្រួលជ្រើមទាំងស្រីប្រុស
ស្រលាញ់ខ្លាំងណាស់ថែគ្មានខុស តែហេតុម្តេចចុះខ្ពើមសក់ក្នុងម្ហូប?៕
និពន្ធដោយ៖ផារី, កែសម្រួល៖ វិឆ័យ សុភី
© រក្សាសិទ្ធិដោយ thmeythmey.com