ពីនេះ ពីនោះ
×![]()
ដោយ: ថ្មីៗ
ដើម្បីជ្រើសរើសមុខរបរ ឬការងារមួយដែលល្អសម្រាប់អនាគតរបស់ខ្លួន អ្នកគប្បីពិចារណាលើលក្ខខណ្ឌដូចខាងក្រោម៖
១/ សមត្ថភាពវិជ្ជាជីវៈ៖ ត្រូវយល់និងស្គាល់ពីជំនាញឯកទេសរបស់ខ្លួនឲ្យបានច្បាស់ជាមុន និងត្រូវប្រាកដប្រជាខ្លួនឯងថា ខ្លួនឯងអាចធ្វើអ្វីបានខ្លះ? ធ្វើបានក្នុងកម្រិតណាខ្លះ? មានបទបិសោធន៍កម្រិតណាក្នុងមុខជំនាញនោះ? ព្រោះប្រសិនជាធ្វើការងារមិនត្រូវនឹងមុខជំនាញ នោះនឹងនាំឲ្យអ្នកធ្វើការមិនរីកចម្រើន ហើយឈានដល់បរាជ័យទៀតផង។
២/ ឧបនិស្ស័យ ឬចំណង់ចំណូលចិត្ត៖ ត្រូវពិចារណាលើនិស្ស័យពីកំណើត និងចំណង់ចំណូលចិត្តផ្ទាល់ខ្លួន ព្រោះអ្វីដែលយើងចង់ គឺធ្វើឲ្យយើងមានលទ្ធភាព។ ប្រសិនជាយើង មិនចង់ គឺមិនអាចធ្វើបានឡើយ។ ជាពិសេស ត្រូវពិចារណា ថាតើមុខជំនាញ មុខរបរឬការងារដែលយើងជ្រើសរើសយកនោះ ស្របនឹងនិស្ស័យរបស់យើងឬទេ។
៣/ ប្រភពធនធាន៖ ត្រូវចេះប្រមាណមើលពីប្រភពធនធានដែលយើងមាន ធៀបនឹងវិជ្ជាជីវ ឬមុខរបរ ដែលយើងបម្រុងនឹងជ្រើសយក ថាតើអាចទៅរួចឬអត់។ ប្រភពធនធានដែលត្រូវពិចារណា គឺគិតពីសមត្ថភាព ចំណេះដឹង កម្រិតបច្ចេកទេស ថវិកា សុខភាព និងពេលវេលាផងដែរ ថាតើយើងអាចទ្រាំទ្រការងារនោះបានឬទេ? ប្រសិនជាបាន តើនៅក្នុងកម្រិតណា?
៤/ ច្បាប់សង្គម ឬឧត្តមគតិសង្គម៖ គ្រប់ការងារដែលយើងមានលទ្ធភាពធ្វើបាន ហើយយើងគ្រោងនឹងជ្រើសរើសយកការងារ ឬមុខរបរដែលស្របច្បាប់ និងស្របនឹងឧត្តគតិសង្គម ទើបការងារ ឬមុខរបរនោះមានស្ថិរភាព និងរីកចម្រើន។ ប្រសិនជា គេប្រកបមុខរបរ ឬធ្វើការងារណាមួយមិនស្របច្បាប់ ផ្ទុយពីឧត្តមគតិសង្គម នោះនឹងត្រូវសង្គមដាក់ទោស ហើយវានឹងនាំឲ្យមានផលវិបាកអាក្រក់ទៅវិញ។
៥/ ស្ថានភាពសង្គម ឬស្ថានភាពទីផ្សារ៖ ដើម្បីឲ្យការងារ ឬមុខរបររីកចម្រើនបន្ថែមពីលើលក្ខខណ្ឌខាងលើ យើងត្រូវសិក្សាពីតម្រូវការរបស់ទីផ្សារ ឬតម្រូវការនៃការផ្គត់ផ្គង់ថែមទៀត។ បើពុំដូច្នេះទេ យើងពុំអាចសម្រេចគោលដៅនៃជីវិតបានឡើយ ព្រោះពីមួយថ្ងៃទៅមួយថ្ងៃតម្រូវការកម្លាំងពលកម្មលើទីផ្សារ ក៏ដូចជាតម្រូវការការផ្គត់ផ្គង់តែងតែប្រែប្រួល និងមានការវិវដ្តទៅមុខជានិច្ច។ ដូចនេះយើងបង្កើនសមត្ថភាពរបស់ខ្លួន ដើម្បីឲ្យឆ្លើយតបនឹងតម្រូវការទីផ្សារការងារបច្ចុប្បន្នជាប្រការចាំបាច់បំផុត៕
ប្រភព៖ ដកស្រង់ពីវប្បធម៌ទូទៅភាគ១
© រក្សាសិទ្ធិដោយ thmeythmey.com
