ពីនេះ ពីនោះ
វិធីសាស្ត្ររៀបចំកិច្ចប្រជុំបុគ្គលិក ដ៏ល្អបំផុត
×
ទាំងសមាជិក ទាំងប្រធាន ភាគច្រើនតែងតែនិយាយថា៖ «ពេលអង្គុយប្រជុំមួយព្រឹក ឬពេញមួយថ្ងៃមិនដឹងថាខ្លួនទទួលបានលិទ្ធផលអ្វីខ្លះ ឬសម្រេចបានលិទ្ធផលអ្វីខ្លះនោះទេ»។ ហេតុអ្វីបានមនុស្សភាគច្រើនតែងតែនិយាយថា ពេលប្រជុំ ឬជជែកពិភាក្សាជាមួយគ្នាមិនមានប្រសិទ្ធភាពសោះ? តើគួរធ្វើបែបណាទើបក្រុមការងារមួយប្រជុំជាមួយគ្នាមានប្រសិទ្ធភាពខ្ពស់?
១. របៀបវារៈ៖ មុននឹងមានកិច្ចប្រជុំត្រូវកំណត់របៀបវារៈឲ្យច្បាស់លាស់ យ៉ាងហោចណាស់ត្រូវដឹងថារបៀបវារៈទី១ និយាយពីអ្វី និងទី២ និយាយពីអ្វីខ្លះ។ ការកំណត់របៀបវារៈគួរតែស្នើសុំពីសមាជិកម្នាក់ៗ ថាតើសមាជិកណាចង់ប្រជុំ ឬចង់ជជែកពិភាក្សារលើប្រធានបទអ្វី ហើយមុនថ្ងៃប្រជុំមួយថ្ងៃ ឬពីរថ្ងៃ ត្រូវតែផ្ញើរបៀបវារៈប្រជុំនោះឲ្យសមាជិកម្នាក់ៗបានដឹងជាមុន។
២. អ្នកសម្របសម្រួល៖ អ្នកសម្របសម្រួលដើរតួនាទីយ៉ាងសំខាន់នៅក្នុងកិច្ចប្រជុំ ព្រោះត្រូវសម្របសម្រួលសមាជិកទាំងអស់ឲ្យបញ្ចេញគំនិតយោបល់ លើកពីបញ្ហា និងដំដោះស្រាយម្តងម្នាក់ៗ ដោយមិនអនុញ្ញាតឲ្យសមាជិកណាម្នាក់និយាយកាត់គ្នា និយាយបែបវាយប្រហារ និងនិយាយទម្លាក់កំហុសដាក់គ្នាជាដើម។ បន្ទាប់មកត្រូវប្រមូលគំនិតយោបល់ទាំងនោះមកបញ្ចូលគ្នា និងបន្ទាប់ពីបិទកិច្ចប្រជុំអ្នកសម្របសម្រួលត្រូវរម្លឹកខ្លឹមសារឬលិទ្ធផលប្រជុំដោយសង្ខេប ដើម្បីឲ្យសមាជិកទាំងអស់បានដឹង និងយល់កាន់តែច្បាស់ម្តងទៀត។
៣. អ្នកកត់ត្រា៖ បន្ទាប់ពីអ្នកសម្របសម្រួលកំពុងធ្វើការសម្របសម្រួលក្នុងកិច្ចប្រជុំ អ្នកកត់ត្រាត្រូវតែយកចិត្តទុកដាក់ស្តាប់ និងធ្វើការកត់ត្រាដោយសង្ខេបនូវចំណុចណាដែលសំខាន់ៗ ប្រសិនបើស្តាប់មិនទាន់ ឬមិនទាន់យល់ច្បាស់ថាគេចង់និយាយពីអ្វី អ្នកកត់ត្រាត្រូវតែសួរបញ្ជាក់ ឬឲ្យគេនិយាយម្តងទៀត ដើម្បីចៀសវាងនូវការយល់ច្រឡំ។ បន្ទាប់ពីចប់កិច្ចប្រជុំអ្នកកត់ត្រាត្រូវធ្វើកំណត់ត្រា ឬធ្វើរបាយការណ៍នៃកិច្ចប្រជុំនោះផ្ញើឲ្យសមាជិកទាំង ជាពិសេស ដើម្បីឲ្យសមាជិកណាដែលមិនបានចូលរួមប្រជុំ បានដឹងពីលិទ្ធផលក្នុងកិច្ចប្រជុំនោះផងដែរ។
៤. សមាជិក៖ សមាជិកត្រូវតែដឹងថាក្នុងកិច្ចប្រជុំលើកនេះ មានរបៀបវារៈអ្វីខ្លះ ហើយពេលប្រជុំសមាជិកម្នាក់ៗត្រូវតែបញ្ចេញគំនិតយោបល់ លើកពីបញ្ហា និងដំណោះស្រាយដែលពួកគេមាន។ ជាពិសេសសមាជិកម្នាក់ៗត្រូវចេះឲ្យតម្លៃគ្នា ដោយមិនត្រូវនិយាយកាត់គ្នា និងនិយាយបែបវាយប្រហារ ឬទម្លាក់កំហុសដាក់គ្នាទៅវិញទៅមកនោះទេ៕
© រក្សាសិទ្ធិដោយ thmeythmey.com