ពីនេះ ពីនោះ
វិធីខ្លះៗជួយកាត់បន្ថយការនឿយហត់ភ្នែកដោយសារកញ្ចក់កុំព្យូទ័រ
×
ជាការពិតណាស់ យើងមិនអាចសម្លឹងមើលកញ្ចក់កុំព្យូទ័រពេញមួយថ្ងៃនោះទេ ប៉ុន្តែជួនកាល ការធ្វើការនៅមុខឧបករណ៍នេះ គឺជារឿងមិនអាចគេចផុតឡើយ។ ការអង្គុយធ្វើការយូរម៉ោងពេកនៅមុខកុំព្យូទ័របង្កនូវបញ្ហាមួយចំនួនដូចជា កែវភ្នែកស្ងួត រលាកកែវភ្នែកឈឺក្បាល និង ស្រវាំងភ្នែក។ ខាងក្រោមនេះ ជាដំបូន្មានខ្លះៗដែលអាចកាត់បន្ថយការនឿយហត់ភ្នែកបាន៖
• អ្នកត្រូវដាក់កុំព្យូទ័រឲ្យឆ្ងាយពីខ្លួនចម្ងាយពី ៥០ ទៅ ៦០ ស.ម។ ពិតណាស់ ត្រូវធានាថា អ្នកនៅអាចអានអក្សរលើកញ្ចក់កុំព្យូទ័របាន។ តែត្រូវចាំថា កាន់តែឆ្ងាយ កាន់តែល្អ។ ម្យ៉ាងទៀត ផ្នែកខាងលើនៃកញ្ចក់ត្រូវស្ថិតនៅកម្រិតស្មើនឹងភ្នែករបស់អ្នក។
• ត្រូវឧស្សាហ៍មើលរបស់ផ្សេងៗដែលនៅជុំវិញខ្លួន ១៥ វិនាទី រៀងរាល់ ១៥ នាទីម្តង។
• បើសិនជាអ្នកត្រូវមើលឯកសារបណ្ដើរ ធ្វើការនៅលើអេក្រង់បណ្ដើរ អ្នកគួរតែប្រើតង្កៀបគាបឯកសារនោះនៅលើMoniteur ដើម្បីជៀសវាងភ្នែករបស់អ្នកត្រូវខំចាប់គោលដៅជានិច្ច។
• បើសិនជាអ្នកយល់ថា ភ្នែករបស់អ្នកស្ងួតអ្នកគួរតែទម្លាក់អេក្រង់ឲ្យទាបជាងភ្នែករបស់អ្នកបន្តិច។ ដូច្នេះ អ្នកអាចព្រិចភ្នែកញឹកញាប់ជាងមុន ហើយភ្នែករបស់អ្នកក៏មានសំណើមជាងមុនដែរ។ប៉ុន្តែ បើអ្នកមិនអាចទម្លាក់កម្រិតអេក្រង់បានទេ អ្នកគួរតែព្រិចភ្នែកឲ្យបានញឹកញាប់។
• ជៀសវាងចំណាំងផ្លាតនៃពន្លឺទៅលើកញ្ចក់កុំព្យូទ័រ៕
© រក្សាសិទ្ធិដោយ thmeythmey.com