កីឡាជាតិ
ជាតិ
ប៊ិន ធារី ថាខ្លួនគ្មានបញ្ហារបួសអ្វីឡើយ វាជាជម្រើសរបស់សហព័ន្ធ
× ប៊ិន ធារី បានសរសេរទៅកាន់ក្រុមអ្នកគាំទ្រនៅលើហ្វេសប៊ុករបស់ខ្លួននៅថ្ងៃនេះថា រូបគេមិនមានបញ្ហារបួសអ្វីនោះឡើយ ហើយអវត្តមានរបស់គេក្នុងក្រុមជម្រើសជាតិ គឺជាជម្រើសរបស់សហព័ន្ធកីឡាបាល់ទាត់កម្ពុជា។ ការលើកឡើងរបស់ខ្សែបម្រើខ្មែរ-បារាំង បន្ទាប់ពីអ្នកគាំទ្រជាច្រើនបានសម្តែងការងឿងឆ្ងល់ចំពោះការដករូបគេចេញពីបញ្ជីប្រកួតជម្រុះជុំទីពីរប្រចាំតំបន់អាស៊ីនៃព្រឹត្តិការណ៍ World Cup ឆ្នាំ២០១៨ ខណៈកម្ពុជាត្រូវប៉ះជាមួយអាហ្វហ្គានីស្ថាននៅថ្ងៃអង្គារ ខាងមុខ។
ប៊ិន ធារី ស្ថិតក្នុងចំណោមកីឡាករ១០នាក់ដែលត្រូវដកចេញពីក្រុមជម្រើសជាតិ ក្រោយកម្ពុជារងបរាជ័យ ៤-០ ក្នុងទឹកទីនាជំនួបជាមួយសឹង្ហបុរី។ កីឡាករផ្សេងទៀតរួមមាន ឡាយ រស្មី, ជា សំណាង, ទៀប វឌ្ឍនៈ, ពៅ ភារិទ្ធ, មូល ដារាវ័ន្ត, ហែម ស៊ីម៉ៃ, ចាន់ តារា, មួន ណារ៉ា, អ៊ុក សិទ្ធី ខណៈ ស៊ូ យ៉ាទី (អ្នកចាំទី) សាយ ពិសិដ្ឋ, ទៀង ទីនី, សុខ រិទ្ធី, វ៉ា សុខថន, ឃួន ឡាបូរ៉ាវី, គួច សុគម្ភៈ (ប្រធានក្រុម), ស៊ុន សុវណ្ណរិទ្ធី, ឈុន សុធារ័ត្ន, សួន វាសនា, ប្រាក់ ចាន់រតនា ឃឹម បូរី កឹម មករា ហុង ផេង និងសំរឹត សីហា រក្សាឈ្មោះខ្លួនដដែល។
កីឡាករ១១នាក់នៃឈុតស៊ីហ្គេម មានឈ្មោះជំនួសកីឡាករដែលត្រូវដកចេញ។ កីឡាករទាំង១១នាក់នោះ រួមមាន ចាន់ វឌ្ឍនាកា, ឈិន ឈឿន, ហួយ ផល្លីន, កែវ សុខផេង, នេន សុធារ័ត្ន, ប្រាក់ មុន្នីឧត្តម, សំអឿន ពិដោរ, សឿយ វិសាល, សុខ សុវណ្ណ, សុះ ស៊ូហាណា, អ៊ុំ សេរីរ័ត្ន។
លោក Kazunori Ohara គ្រួបង្វឹកក្រុមជម្រើសជាតិកម្ពុជា បានថ្លែងក្នុងសន្និសីទសារព័ត៌មានក្រោយកម្ពុជារងបរាជ័យ ៤-០ ដោយសារក្រុមភ្ញៀវសឹង្ហបុរី កាលពីរាត្រីថ្ងៃព្រហស្បតិ័ថា លោកមិនទាន់បានគិតគូពីការបញ្ចូលសមាជិកឆ្នើមនៃឈុតស៊ីហ្គេមឡើយ សម្រាប់ជំនួបជាមួយអាហ្វហ្គានីស្ថាន នាថ្ងៃអង្គារ ទី១៦ ខែមិថុនា។ ប៉ុន្តែបើយោងតាមបញ្ជីឈ្មោះដែលផ្សាយដោយសហព័ន្ធកីឡាបាល់ទាត់កម្ពុជា (FFC) ជម្រើសដំបូងនៃក្រុមជម្រើសជាតិកម្ពុជានាជំនួបជាមួយអាហ្វហ្គានីស្ថាននឹងមានការប្រែប្រួល៕
© រក្សាសិទ្ធិដោយ thmeythmey.com