ពីនេះ ពីនោះ
អារម្មណ៍ប្រចណ្ឌ និង អារម្មណ៍ច្រណែនផ្សេងគ្នាដូចម្តេច?
×
ការប្រចណ្ឌ និងការច្រណែន ជាអារម្មណ៍ និងចិត្តសាស្ត្រពីរផ្សេងគ្នា តែមនុស្សមួយចំនួននៅតែយល់ច្រឡំ ។ ថ្ងៃនេះថ្មីៗសូមបកស្រាយនៅពាក្យទាំងពីរនេះដែលសម្តែងពីអារម្មណ៍ពីរផ្សេងគ្នា ជូនប្រិយមិត្ត។ ការបកស្រាយនេះមិនពឹងផ្អែកទាំងស្រុងទៅលើអក្សរសាស្ត្រទេ តែជាការពន្យល់បែបទស្សនវិទ្យា និងចិត្តវិទ្យា។
ការប្រចណ្ឌ (Jealousy)កើតចេញពីក្តីស្រឡាញ់ បើមិនស្រឡាញ់គឺមិនប្រចណ្ឌ។ ចំណែកឯការច្រណែន (Envy)កើតចេញពីក្តីស្អប់ បើមិនស្អប់គឺមិនច្រណែន។
ជាចិត្តសាស្ត្រ ពេលអ្នកស្រឡាញ់អ្នកណាម្នាក់ ពេលនោះអ្នកប្រាកដជាមានសេចក្តីហួងហែង មិនចង់ឲ្យអ្នកផ្សេង (a third person)ចូលមកពាក់ព័ន្ធនោះទេ។ ប្រសិនបើមាននោះអ្នកប្រាកដជាកើតក្តីប្រចណ្ឌនឹងមនុស្សដែលអ្នកស្រឡាញ់ ជាមួយនឹងជនទីបីនោះ ដោយអ្នកកើតក្តីព្រួយថា ក្រែងលោអ្នកផ្សេងគេល្អជាងអ្នក ហើយទាក់ទាញយកមនុស្សដែលអ្នកស្រឡាញ់ទៅបាត់។
ដូច្នេះស្ថានភាពនេះ អ្នកអាចមានអារម្មណ៍ប្រចណ្ឌ នឹងមនុស្សដែលអ្នកស្រឡាញ់ និងមានសេចក្តីច្រណែននឹងបុគ្គលទីបី ដែលចូលមកជ្រៀតជ្រែកចូលក្នុងសម្ព័ន្ធភាពរបស់អ្នក។ ការច្រណែន គឺជាស្ថានភាពចិត្តមួយ ដែលអ្នកក្តៅក្រហល់ក្រហាយ នឹងអ្នកណាម្នាក់ដែលអ្នកមិនពេញចិត្ត ដោយឃើញគេបាននូវអ្វីដែលអ្នកស្រឡាញ់ ឬអ្នកបាត់បង់មនុស្ស ដែលអ្នកស្រឡាញ់ទៅក្នុងដៃអ្នកផ្សេងម្នាក់ទៀត។
ជារួម សេចក្តីប្រចណ្ឌកើតឡើងដោយមានស្ថានភាពមនុស្សបីនាក់ ចំណែកឯ សេចក្តីច្រណែន អាចកើតឡើងដោយស្ថានភាពមនុស្សពីរនាក់ ឬក៏បីនាក់។
កុំប្រចណ្ឌ! ប្រចណ្ឌ មានន័យថា អ្នកទទួលស្គាល់ថា អ្នកទីបីគេល្អជាងអ្នក។
កុំច្រណែន! ច្រណែន មានន័យថា អ្នកទទួលស្គាល់ថា អ្នកអន់ជាងគេ៕
© រក្សាសិទ្ធិដោយ thmeythmey.com