ការពិនិត្យ​ភាពស្របច្បាប់​នៃ​ជនអន្តោប្រវេសន៍ គួរ​ធ្វើឱ្យបាន​ទូលំទូលាយ និង​ប្រកបដោយ​និរន្តរភាព
ជាតិ
សង្គមជាតិ
ការពិនិត្យ​ភាពស្របច្បាប់​នៃ​ជនអន្តោប្រវេសន៍ គួរ​ធ្វើឱ្យបាន​ទូលំទូលាយ និង​ប្រកបដោយ​និរន្តរភាព
27, Jun 2015 , 11:20 pm        
រូបភាព
ដោយ:
ភ្នំពេញ៖ រយៈពេល​ប៉ុន្មាន​ខែ​ចុង​ក្រោយនេះ យើង​បាន​សង្កេតឃើញថា រដ្ឋាភិបាល​បានចាប់ផ្ដើម​ប្រើ​វិធានការ​ក្ដៅ​គួរឱ្យកត់សម្គាល់ ដើម្បី​ពិនិត្យ​ភាពស្របច្បាប់​របស់​ជន​អន្តោប្រវេសន៍ ដែល​បាន​ចូលមក​ស្នាក់នៅ​កម្ពុជា។ ជាពិសេស ចំណាត់ការដំបូងៗនេះ ត្រូវបាន​គេ​មើលឃើញថា រដ្ឋាភិបាល​កម្ពុជា បានធ្វើ​ទៅលើ​ជនអន្តោប្រវេសន៍​វៀតណាម និង​ចិន។ ក្រៅពី​ជនអន្តោប្រវេសន៍​វៀតណាម​និង​ចិន កម្ពុជា ក៏មាន​ជនអន្តោប្រវេសន៍ផ្សេងៗទៀត ដូចជា ឥណ្ឌា អាហ្វ្រិក និង អឺរ៉ុប ជាដើម។ ហេតុនេះ រដ្ឋាភិបាល​គួរ​ចាត់វិធានការ​រឹតបន្តឹង​ភាពស្របច្បាប់​របស់​ជន​អន្តោប្រវេសន៍​ទាំងនេះ​ផងដែរ។


 
ឆ្លងតាម​តថភាព​សង្គម យើង​បាន​ឃើញថា ជនអន្តោប្រវេសន៍​មិន​ស្របច្បាប់​មួយចំនួន​ក្នុងចំណោម​ជនអន្តោប្រវេសន៍ វៀតណាម​និង​ចិន ដែល​បានមក​ស្នាក់នៅ​កម្ពុជា កន្លងមក ពួកគេ​ធ្លាប់​ប្រព្រឹត្ត​បទល្មើស លួច ឆក់ ប្លន់ ចាប់ជំរិត ជួញដូរ​គ្រឿងញៀន និង​បទល្មើសផ្សេងៗទៀត ដែល​បង្ក​ការភ័យខ្លាច និង​អសន្តិសុខ​នៅ​កម្ពុជា ជាពិសេស នៅ​ទី ក្រុងភ្នំពេញ និង​ទីក្រុង​ទេសចរណ៍​មួយចំនួនទៀត។ ចំណែក​ជនអន្តោប្រវេសន៍ផ្សេងៗទៀត ក៏​ធ្លាប់​ប្រព្រឹត្ត​បទល្មើសផ្សេងៗ ដូចជា ការ​ឆបោក​តាម​វិធីផ្សេងៗ និង​ការរំលោភ​ផ្លូវភេទ​កុមារ ជាដើម។ ផ្ទុយទៅវិញ ជនអន្តោប្រវេសន៍ វៀតណាម ចិន ជនជាតិ​ដទៃទៀត ដែល​កំពុង​រស់នៅ​កម្ពុជា​ដោយ​ស្របច្បាប់ ពួកគេ​ក៏បាន​គោរព​ច្បាប់​របស់​កម្ពុជា និង​បានរួម​ចំណែក​អភិវឌ្ឍ​សង្គម​ខ្មែរ​ក្នុង​វិស័យផ្សេងៗផងដែរ។
 
ទោះបីជា​យ៉ាងនេះ​ក៏ដោយ ក៏​ការ​រឹតបន្តឹង​ភាពស្របច្បាប់​លើ​ជនអន្តោប្រវេសន៍​នៅ​កម្ពុជា គឺជា​រឿង​ត្រូវតែ​ធ្វើជា​ចាំបាច់ ដើម្បី​គ្រប់គ្រង​ចំនួន​ជនអន្តោប្រវេសន៍​ឱ្យបាន​ច្បាស់លាស់ បែងចែក​ប្រភេទ​ជនអន្តោប្រវេសន៍(ទេសចរណ៍, ការងារ ...), ជនអន្តោប្រវេសន៍​ស្របច្បាប់ និង ជនអន្តោប្រវេសន៍​មិន​ស្របច្បាប់ ជាដើម។ ប្រសិនបើ​យើង​ធ្វើបែបនេះ​បាន នោះ​យើង​នឹង​អាច​រៀបចំ​ជនអន្តោប្រវេសន៍​ឱ្យមាន​សណ្ដាប់ធ្នាប់ កំណត់​មុខសញ្ញា ចាត់វិធានការ​ចំពោះ​ជន​អន្តោ-ប្រវេសន៍​មិន​ស្របច្បាប់ ដើម្បីឱ្យ​ពួកគេ​បំពេញបែបបទ​ទៅតាម​ច្បាប់ បញ្ជូន​ជនអន្តោប្រវេសន៍​ខុសច្បាប់​ទៅ​ប្រទេស ដើម​វិញ ឬ​កសាង​បែបបទ​បញ្ជូន​ពួកគេ​ទៅ​តុលាការ ប្រសិនបើ​ពួកគេ​ប្រព្រឹត្ត​ខុសច្បាប់​អន្តោប្រវេសន៍​របស់​កម្ពុ​ជា។ 
 
វិធានការ​បែបនេះ ប្រទេសជិតខាង​របស់​កម្ពុជា និង​ប្រទេស​ដទៃទៀត បាន​អនុវត្ត​តាំងពី​យូរហើយ ដោយឡែក នៅ​កម្ពុជា ការអនុវត្ត​ច្បាប់​អន្តោប្រវេសន៍ ហាក់ដូចជា​មិនទាន់មាន​ភាព​តឹងរ៉ឹង និង​ប្រកបដោយ​និរន្តរភាព​នៅ ឡើយ។ ទោះបីជា​យ៉ាងនេះ​ក៏ដោយ ក៏​ក្នុងនាម​អ្នកតាមដាន​បញ្ហា​សង្គម យើង​សូម​ស្វាគមន៍ និង​កោតសរសើរ​ចំពោះ​មន្ត្រី​មាន​សមត្ថកិច្ច​របស់​ក​ម្ពុ​ជា ដែល​កំពុងបើក​ប្រតិបត្តិការថ្មីៗ លើ​កិច្ចការ​ពិនិត្យ​ភាពស្របច្បាប់​របស់​ជន​អន្តោប្រវេសន៍ និង​សូមឱ្យ​ប្រតិបត្តិការ​នេះ​ប្រព្រឹត្ត​ទៅជា​និរន្ត និង​ទូលំទូលាយ។             
 
គួរគត់សម្គាល់​ថា កាលពី​ថ្ងៃទី២៣ ខែមិថុនា ឆ្នាំ២០១៥ មន្ត្រី​មាន​សមត្ថកិច្ច បាន​ចុះទៅពិនិត្យ​ជនអន្តោប្រវេសន៍ នៅ​ការដ្ឋាន​សំណង់​ចំនួន៣កន្លែង​នៅ​កោះ​ពេជ្រ បាន​រកឃើញ​ជនអន្តោប្រវេសន៍​វៀតណាម​និង​ចិន ចំនួន ២១៥នាក់ ក្នុងនោះ​មានតែ៣០នាក់​ប៉ុណ្ណោះ ដែលមាន​ភាពស្របច្បាប់។ នៅ​ថ្ងៃទី២៥ ខែមិថុនា ជនអន្តោប្រវេសន៍​វៀតណាម ១០៩នាក់​ទៀត ត្រូវបាន​កម្លាំង​នគរបាល​អន្តោប្រវេសន៍​ឃាត់ខ្លួន ក្នុង​ខណ្ឌ​ច្បារអំពៅ បន្ទាប់ពី​ត្រួតពិនិត្យ​ឃើញថា ពួកគេ​បាន​ឆ្លងដែន​មក​ធ្វើការ​ដោយ​ខុសច្បាប់​នៅ​កម្ពុជា។ ក្រៅពីនេះ នៅ​កន្លែងផ្សេងៗទៀត​ក៏មាន​ការ​រឹតបន្តឹង​ភាពស្របច្បាប់​លើ​ជនអន្តោប្រវេសន៍​វៀតណាម​ដែរ ដូចជា នៅតាម​ដង​ទន្លេមេគង្គ​ត្រង់​តំបន់​អរិយ​ក្សត្រ និង​នៅតាម​ដង​ទន្លេសាប​ក្នុង​ខេត្តកំពង់ឆ្នាំង​ជាដើម។  
 
គួរ​បញ្ជាក់ដែរថា ក្នុង​ឆ្នាំ២០១៥នេះ នគរបាល​បាន​ឃាត់ខ្លួន និង​បណ្តេញចេញ​ជនជាតិ​វៀតណាម​ខុសច្បាប់​ជាង ១១០០នាក់​ហើយ។ យោងតាម​សារព័ត៌មានថ្មីៗ ដែល​ដកស្រង់​របាយការណ៍​បូកសរុប​របស់​អគ្គនាយក​ដ្ឋា​ន​អន្តោ-ប្រវេសន៍ បង្ហាញថា គិត​ចាប់ពី​ថ្ងៃទី១២ ខែមេសា ឆ្នាំ២០១៤ រហូតមកដល់​បច្ចុប្បន្ន​នេះ ជនអន្ដោប្រវេសន៍ សរុប មាន ២៣៨៣ នាក់(មាន ៤៣ សញ្ជាតិ) ត្រូវបាន​បញ្ជូន និង​បណ្តេញ​ចេញពី​កម្ពុជា ក្នុងនោះ ២០២៧ នាក់​ស្មើនឹង ៨៥ ភាគរយ ជា​ជនជាតិ​វៀតណាម។
 
យោងទៅតាម​តួលេខ​ដែល​បានបង្ហាញ​នេះ បញ្ជាក់ថា នៅ​កម្ពុជា ជនអន្ដោប្រវេសន៍​វៀតណាម​ខុសច្បាប់ មាន​ចំនួន​ច្រើនជាង​បំផុត​ក្នុងចំណោម​ជនអន្ដោប្រវេសន៍​ដទៃទៀត។ លើសពីនេះ​ទៀត វា​ក៏​អាច​មានន័យថា ការឆ្លង​ដែន​រប​ស់ជ​ន​អន្តោប្រវេសន៍​វៀតណាម​ខុសច្បាប់​មក​កម្ពុជា មាន​ភាពងាយស្រួល ឯការ​ស្នាក់នៅ​ដោយ​ខុសច្បាប់​របស់​ពួកគេ​នៅ​កម្ពុជា​កន្លងមក ក៏​មិនសូវមាន​ឧបសគ្គ​ដែរ។ សូមបញ្ជាក់ថា កន្លងមក ក៏​ធ្លាប់​ការខ្វែងគំនិត​គ្នា​រវាង​បក្ស​កាន់អំណាច និង​បក្សប្រឆាំង​ដែរ​អំពី​ចំនួន​សរុប​នៃ​ជនអន្ដោប្រវេសន៍​វៀតណាម​នៅ​កម្ពុជា ទាំង​ស្របច្បាប់ ទាំង​មិន​ស្របច្បាប់។ បក្ស​កាន់អំណាច​អះអាងថា ជនអន្ដោប្រវេសន៍​វៀតណាម មាន​ត្រឹមតែ​ប្រមាណ​រាប់សែន​នាក់​ប៉ុណ្ណោះ ឯ​បក្សប្រឆាំង​វិញ​ថា ជនអន្ដោប្រវេសន៍​វៀតណាម មាន​រហូតដល់​រាប់លាន​នាក់។ 
 
បញ្ហា​ជនអន្ដោប្រវេសន៍​វៀតណាម​នេះ ត្រូវបាន​គេ​យកមក​ធ្វើជា​កម្មវត្ថុ​នៃ​ការឃោសនា​រក​សំឡេងឆ្នោត​រាល់​ការបោះឆ្នោតម្ដងៗ ។ វា​នៅតែ​ជា​បញ្ហា​ស្មុគស្មាញ និង​បញ្ហា​រសើប​នៅក្នុង​សង្គម​ខ្មែរ មិន​ចាញ់​បញ្ហា​ព្រំដែន​ប៉ុន្មាន​ទេ។ យើង​សង្ឃឹមថា ប្រសិនបើ​បេសកកម្ម ឬ​ប្រតិបត្តិការ​រឹតបន្តឹង​ភាពស្របច្បាប់​លើ​ជនអន្ដោប្រវេសន៍​វៀតណាម ចិន និង​ជនជាតិ​ដទៃទៀត ត្រូវបាន​គេ​ធ្វើឡើង​ដោយ​និរន្តរភាព តម្លាភាព ភាពច្បាស់លាស់ ដោយ​ចេតនា​ល្អ និង​មិន​ធ្វើឡើង​បែប​ប្រជាភិថុតិ ឬ​ធ្វើឡើង​គ្រាន់តែ​ឱ្យ​ល្អមើល​ទេ នោះ​បញ្ហា​ជនអន្ដោប្រវេសន៍​វៀតណាម នឹង​លែង​ក្លាយទៅជា​ប្រធានបទ​ក្ដៅ​ក្នុងការ​ឃោសនា​រក​សំឡេងឆ្នោត​ទៀតហើយ ឯ​ជនអន្ដោប្រវេសន៍​ដទៃទៀត​ក៏ត្រូវ​បាន​គេ​គ្រប់គ្រង​ប្រកបដោយ​ប្រសិទ្ធភាព​ដែរ៕  
 
 
 

© រក្សាសិទ្ធិដោយ thmeythmey.com