ជាតិ
សង្គមជាតិ
សហគមន៍ទូកកំពង់ភ្លុកត្រៀមបោះឆ្នោតម្តងទៀតក្រោយផ្ទុះអំពើហិង្សា រូបភាព៖ លោក នួន រតន៍
× សៀមរាប៖ សហគមន៍ទូកអុំ និងកាណូតនៅតំបន់ទេសចរណ៍កំពង់ភ្លុក ខេត្តសៀមរាប នឹងរៀបចំពិធីបោះឆ្នោតជាលើកទី២នៅថ្ងៃនេះ បន្ទាប់ពីការបោះឆ្នោតលើកទី១ ដើម្បីជ្រើសរើសប្រធានសហគមន៍ និងអនុប្រធាននោះ មានការរំខានពីសហគមន៍ខាងក្រៅ។ ការរំខាន ដែលធ្វើឲ្យការបោះឆ្នោតត្រូវផ្អាកនៅថ្ងៃទី ២៧ មិថុនា បានធ្វើឲ្យពលរដ្ឋខ្លះ រងរបួសធ្ងន់ស្រាយផងដែរ។
សមាជិកសហគមន៍កំពង់ភ្លុក លោក ស៊ុន ចាន់សេរី បានឲ្យដឹងថា សហគមន៍របស់លោកនឹងរៀបចំការបោះឆ្នោតជ្រើសរើសប្រធាន និងអនុប្រធាន ដើម្បីគ្រប់គ្រងការលក់សំបុត្រទូកនៅតំបន់កំពង់ភ្លុកសាជាថ្មីនៅថ្ងៃចន្ទនេះ បើទោះជាមានការរំខានពីប្រជាពលរដ្ឋមកពីសហគមន៍ខាងក្រៅ ដែលតាមការអះអាង គឺពួកគេ មានការរៀបចំឡើងដោយក្រុមហ៊ុន ស៊ូជីង យ៉ាងណាក្តី។ ក្រុមហ៊ុន ស៊ូជីង បានគ្រប់គ្រងការលក់សំបុត្រនៅតំបន់កំពង់ភ្លុក ហើយក្រោយមក ក៏ត្រូវបានរដ្ឋាភិបាលបង្គាប់ឲ្យផ្អាកដំណើរការទាំងស្រុង តាមរយៈសជណ ចុះថ្ងៃទី១៩ មេសា ឆ្នាំ២០១៥ ។
បើតាមការបញ្ជាក់របស់លោក ចាន់សេរី លោកមានការបារម្ភខ្លាចមានជម្លោះកើតឡើងសាជាថ្មី ខណៈដែលវត្តមានរបស់សមាជិកក្រុមហ៊ុន ស៊ូជីង បន្តនៅមូលដ្ឋានរបស់លោក។ លោក ចាន់សេរី បញ្ជាក់ថា៖« អ្នករំខានដែលរៀបចំឡើងដោយក្រុមស៊ូជីង មានខ្លះមកពីចុងឃ្នៀស មេជ្រៃ ខ្លះនៅសហគមន៍កំពង់ភ្លុកតែម្តង បានបោះតុង ដេកយាមនៅមុខសាលាស្រុកតែម្តង ចាំរំខានមិនឲ្យយើងបោះឆ្នោតទេ»។ លោក ចាន់សេរី បញ្ជាក់ថា អ្នកដែលដឹកនាំក្រុមតវ៉ានោះ មានឈ្មោះ គីម សុផានី ដែលគេស្គាល់ថា ជាអគ្គនាយកក្រុមហ៊ុន ស៊ូជីង។
តំបន់ទេសចរណ៍កំពង់ភ្លុក មានទីតាំងនៅភូមិគោកក្តុល ឃុំកំពង់ភ្លុក ស្រុកប្រាសាទបាគង ខេត្តសៀមរាប។ ភ្ញៀវទេសចរ តែងជួលទូកជិះមើលតំបន់ទេសចរណ៍ធម្មជាតិនៅទីនោះ និងគយគន់ភូមិបណ្តែតទឹកនៅទីនោះជាដើម។ ដើម្បីរៀបចំការគ្រប់គ្រងនៅទីនោះឲ្យបានល្អ បន្ទាប់ពីរដ្ឋាភិបាលដកសិទ្ធិគ្រប់គ្រងរបស់ក្រុមហ៊ុន ស៊ូជីង ថ្នាក់ដឹកនាំខេត្ត បានចុះរៀបចំការបោះឆ្នោត ដើម្បីឲ្យសហគមន៍ទូក គ្រប់គ្រងការលក់សំបុត្រឲ្យភ្ញៀវ។
គួរបញ្ជាក់ថា នៅសហគមន៍កំពង់ភ្លុកសរុបទាំងអស់ មានទូកអុំដៃចំនួន ៧៥៧ និងទូកធំ ចំនួន ២១៦ ដោយមានការដាក់វេនគ្នា។ មានការតវ៉ាជាច្រើនលើកច្រើនសារ អំឡុងពេលក្រុមហ៊ុន ស៊ូជីងនៅគ្រប់គ្រង គឺការយកតម្លៃសំបុត្រខ្ពស់ ដែលធ្វើឲ្យបាត់ភ្ញៀវនៅតំបន់នោះជាដើម។ គេនៅមិនទាន់ដឹងថា តើការបោះឆ្នោតលើកទី២របស់សហគមន៍កំពង់ភ្លុកអាចដំណើរការបានឫយ៉ាងណានោះទេនៅថ្ងៃនេះ៕
© រក្សាសិទ្ធិដោយ thmeythmey.com