ពិភពតារា៖ សុខ ស្រីម៉ុច ផ្អាកពីសិល្បៈ ព្រោះឡើងទម្ងន់ធាត់ពេក
× ភ្នំពេញ៖ តារាសម្តែងកំពុងតែមានប្រជាប្រិយភាព នាង សុខ ស្រីម៉ុច កាលពីពេលកន្លងទៅ នាងបានសាងកេរ្ដិ៍ឈ្មោះល្បីក្នុងទីផ្សារសិល្បៈ ដែលមហាជនពេញនិយមជាច្រើន ប៉ុន្តែមួយរយៈចុងក្រោយនេះ ស្រាប់តែបាត់វត្តមាននាងសូន្យឈឹង។ បញ្ហានេះ ស្រីម៉ុច បញ្ជាក់ថា នាងមិនបានឈប់ពីសិល្បៈទេគឺគ្រាន់តែផ្អាកសិន ព្រោះឡើងគីឡូ រូបរាងមិនស្អាត។
ស្របពេលជាមួយគ្នានេះ ក៏មានទស្សនិកជនអ្នកគាំទ្រ និងអ្នកនិយមតាមដានរឿងរ៉ាវតារាក្នុងស្រុកបាននាំគ្នានិយាយថា ស្រីម៉ុច ចាប់តាំងពីមានឈ្មោះល្បី និងទាញបានប្រជាប្រិយភាពខ្លាំង ក្នុងពេលពីរបីឆ្នាំចុងក្រោយនេះ ឃើញថា នាងហាក់ឡើងយីអ៊ុនខ្ពស់ ធ្វើឲ្យមានសាច់មានឈាមស្រស់ថ្លា រីកមុខមាត់ដូចគ្រាប់ជី។ប៉ុន្តែអ្វីដែលចម្លែកនោះនៅត្រង់ថា ហេតុអ្វីពេលនេះ ស្រីម៉ុច ដូចជាពុំសូវឃើញ បង្ហាញវត្តមាននៅក្នុងកម្មវិធីសម្តែងដូចមុនទៅវិញ ឬមួយនាងឈប់ពីសិល្បៈទៅហើយ?
សុខ ស្រីម៉ុ បានប្រាប់ថា នាងពុំបានឈប់ពីវិស័យសិល្បៈនោះទេ ហើយមូលហេតុដែលធ្វើឱ្យនាង ហាក់រយាលឃ្លាតឆ្ងាយសិល្បៈមួយរយៈនេះ ដោយសារមានបញ្ហាផ្ទាល់ខ្លួនបន្តិចបន្តូច។ស្រីម៉ុច បញ្ជាក់ថា «ខ្ញុំមិនបានឈប់ពីសិល្បៈទេបង..! គឺគ្រាន់តែផ្អាកសិន ព្រោះឥឡូវ ខ្ញុំធាត់ខ្លាំពេក(ឡើងគីឡូ)។ កត្តានេះហើយដែលធ្វើឱ្យខ្ញុំមិនសូវចង់បង្ហាញវត្តមានក្នុងការចេញសម្តែង ឬតាមកម្មវីធីនានានោះ។ ប៉ុន្តែនៅពេលខ្ញុំសម្រកគីឡូបានវិញ ពេលណានោះ ខ្ញុំនឹងចាប់ផ្តើមទទួលយកការហៅសម្តែងឡើងវិញ..»។
តារាសម្តែង សុខ ស្រីម៉ុច បានបន្តទៀតថា កាលពីមុន នាងមានមានទម្ងន់ត្រឹមតែ៤៩ គីឡូតែប៉ុណ្ណោះតែឥឡូវឡើង រហូតដល់៥៤ គីឡូ ពោលគឺឡើងដល់ទៅ៥គីឡូ។ មូលហេតុដែលធ្វើឱ្យនាងឡើងគីឡូដូច្នេះ គឺមកពីនាងញ៉ាំមិនតមអាហារ នឹងរវល់ការងារផ្ទាល់ខ្លួនហត់ ទើបពេលខ្លះបណ្តាលឱ្យនាងញ៉ាំបានច្រើន ឡើងគីឡូរបែបនេះតែម្ដង។
តារាសម្តែងសម្បុរ ស្រអែមស្រស់ សុខ ស្រីម៉ុច បន្ថែមថា «គោលបំណងរបស់ខ្ញុំពេលនេះ គឺនៅពេលដែលខ្ញុំសម្រកទម្ងន់ បាន៨គីឡូពេលណានោះ គឺខ្ញុំនឹងទទួលយកការថតសម្តែងឡើងវិញ ដើម្បីបម្រើអារម្មណ៍ទស្សនិកជនអ្នកគាំទ្រ។ ម្យ៉ាងទៀតព្រោះថា ពេលខ្ញុំកំពុងធាត់ អ៊ីចឹង គឺសម្តែងមើលទៅមិនសម ហើយក៏មិនសូវស្អាតដែរ តែបើស្រកគីឡូជាងនេះបន្តិចវិញ នោះគឺជាការល្អ..»៕
© រក្សាសិទ្ធិដោយ thmeythmey.com