ពិភពតារា៖ ឃុន ច័ន្ទតារាវត្តី ពន្លកតារាថ្មីរះលើវិថីសិល្បៈ
× ភ្នំពេញ៖ តារាចម្រៀងរូបស្រស់កញ្ញា ឃុន ច័ន្ទតារាវត្តី ដែលទើបតែបន្សាត់ខ្លួននាំយករូបសម្រស់ និងទឹកដមសំឡេងមកស្វែងរកកេរ្តិ៍ឈ្មោះក្នុងវិស័យសិល្បៈបានរយៈពេលជាងពីរឆ្នាំមកនេះ ទទួលបានការគាំទ្រគួរឲ្យកត់សម្គាល់។ យូរៗម្តង នាងបានឡើងបង្ហាញវត្តមានជាតារាកិត្តិយសនៅតាមបណ្តាប៉ុស្តិ៍ទូរទស្សន៍ជារឿយៗផងដែរ។
ឃុន ច័ន្ទតារាវត្តី ជាអ្នកចម្រៀងប្រចាំនៅក្នុងក្លឹបកំម្សាន្ត ស្ប៉ាក។ តាមរយៈរូបសម្រស់ដ៏ស្រស់សោភានេះ ទោះបីជា ឃុន ច័ន្ទតារាវត្តី មិនទាន់មានឈ្មោះច្រៀងឱ្យផលិតកម្មណាមួយក្តី ប៉ុន្តែបច្ចុប្បន្នកញ្ញាក៏ជាតារាចម្រៀងម្នាក់មានកេរ្តិ៍ឈ្មោះបោះសំឡេង នៅតាមកម្មវិធីប្រគំតន្ត្រីលើកឆាកទូរទស្សន៍ និងនៅតាមបណ្តាខេត្តផងដែរ។
ការមិនទាន់មានឱកាសធ្វើជាម្ចាស់សំឡេងនៅលើថាសស៊ីឌីនេះ កញ្ញា ឃុន ច័ន្ទតារាវត្តី បានប្រាប់ថា មួយរយៈមិននេះនាងត្រូវបានផលិតកម្មក្នុងស្រុកពីរបានហៅឱ្យធ្វើកុងត្រា ផងដែរ ប៉ុន្តែនាងមិនទទួលយក ព្រោះផលិតកម្មទាំងពីរថ្មី និងមិនទាន់មានកេរ្តិ៍ឈ្មោះ។ ម្យ៉ាងទៀតគម្រោងផលិតខ្សោយ ដូច្នេះហើយនាងក៏មិនចុះកុងត្រានាំតែពិបាកដល់ការងារដែលខ្លួនមានសព្វថ្ងៃនោះទេ។
កញ្ញា ឃុន ច័ន្ទតារាវត្តី បានឲ្យដឹងថា ការចុះកុងត្រាជាមួយផលិតកម្ម គឺគេទាមទារកាត់ភាគរយគ្រប់ប្រាក់ចំណូលពីសិល្បៈរបស់នាង ដូច្នេះហើយទើបនាងមិនសូវខ្វល់ចង់ចូលផលិតកម្ម ព្រោះទីផ្សារការងាររបស់នាងនាពេលបច្ចុប្បន្ននេះមានច្រើនរកតែពេលសម្រាកគ្មានផង៕
© រក្សាសិទ្ធិដោយ thmeythmey.com