កីឡាជាតិ
ពានបាល់ទាត់ Toyota Mekong Club Championship 2015 ចាប់ផ្ដើមប្រកួតពីខែវិច្ឆិកាទៅហើយ
× ពានរង្វាន់បាល់ទាត់ក្នុងតំបន់ប្រជាជាតិតាមដងទន្លេមេគង្គ Toyota Mekong Club Championship 2015 នឹងចាប់ផ្ដើមប្រកួតជាផ្លូវការនៅក្នុងខែ វិច្ឆកា ឆ្នាំ ២០១៥ ខាងមុខ ស្របពេលមានក្លិបជើងខ្លាំងពីប្រទេសចំនួន ៥ ចូលរួម។
យោងតាមសន្និសីទសារព័ត៌មានម្សិលមិញនៅទីក្រុងបាងកក ប្រទេសថៃ ម្សិលមិញ ភាគីពាក់ព័ន្ធបានសម្រេចទទួលយកប្រព័ន្ធប្រកួតជា ៣ ដំណាក់កាល ដោយក្នុងនោះក្លិបជើងខ្លាំងពីប្រទេសកម្ពុជា ឡាវ និង មីយ៉ាន់ម៉ា ត្រូវប្រកួតគ្នានៅវគ្គជម្រុះដំបូង ប្រើរូបមន្តប្រកួតវិលជុំ ហើយក្រុមដែលមានពិន្ទុខ្ពស់ជាងគេមានឈ្មោះឡើងលេងនៅជុំទី២។ ជុំទី២ មានក្លិបជើងខ្លាំងរបស់វៀតណាម រង់ចាំជាស្រេច ហើយក្រុមឈ្នះនៅវគ្គនេះមានកៅអីទៅលេងនៅជុំទី៣ ដែលជាវគ្គផ្ដាច់ព្រ័ត្រ។ ក្រុមជើងខ្លាំងក្នុងលីករបស់ថៃ ឈរចាំនៅជុំទី៣ នេះជាស្រេច ពោលគឺចាំតែប្រកួតវគ្គផ្ដាច់ព្រ័ត្រតែប៉ុណ្ណោះ។
គិតត្រឹមពេលនេះគណៈកម្មការរៀបចំការប្រកួតនៅមិនទាន់រកឃើញ ឈ្មោះក្រុមដែលអាចចូលលេងក្នុងពានរង្វាន់នេះនៅឡើយទេ ព្រោះក្រុមទាំងអស់ត្រូវតែជើងឯកប្រចាំលីកប្រទេសជាសមាជិកនីមួយៗ ប៉ុន្ដែពេលនេះលីកតាមប្រទេសទាំងអស់ កំពុងតែដំណើរការ មិនរកជើងឯកឃើញនៅឡើយនោះទេ។
ចំពោះប្រាក់រង្វាន់វិញមានដូចជាក្រុម
* ជើងឯកទទួលបាន ៧៥០០០ ដុល្លារអាមេរិក
* ជើងឯករង ទទួលបាន ៥ ម៉ឺនដុល្លារ
* ក្រុមលេខ៣ ទទួលបាន ៣ ម៉ឺនដុល្លារ
*ក្រុមលេខ ៤ ទទួលបាន ១ ម៉ឺនដុល្លារ
*ក្រុមលេខ ៥ ទទួលបាន ៥ ពាន់ដុល្លា
កីឡាករលេងល្អប្រចាំពានរង្វាន់ ទទួលបាន ៣ ពាន់ដុល្លារ។
ម្សិលមិញនេះដែរក៏មានការចាប់ឆ្នោតប្រកួតរើសគូប្រកួតដែរ៖
- ថ្ងៃទី ១ ខែ វិច្ឆិកា ឆ្នាំ ២០១៥ ក្លិបរបស់ឡាវ ប្រកួតជាមួយក្លិបរបស់កម្ពុជា នៅប្រទេសឡាវ
- ថ្ងៃទី ២២ ខែ វិច្ឆិកា ឆ្នាំ ២០១៥ ក្លិបរបស់មីយ៉ាន់ម៉ា ប្រកួតជាមួយក្លិបរបស់ ឡាវ នៅប្រទេសមីយ៉ាន់ម៉ា
- ថ្ងៃទី ២៩ ខែ វិច្ឆិកា ឆ្នាំ ២០១៥ ក្លិបរបស់កម្ពុជា ប្រកួតជាមួយក្លិបរបស់មីយ៉ាន់ម៉ា នៅទឹកដីកម្ពុជា
ការប្រកួតជុំទី២៖
- ថ្ងៃទី ៦ ខែ ធ្នូ ឆ្នាំ ២០១៥ ក្លិបរបស់វៀតណាម ជួបជាមួយក្រុមឈ្នះនៅជុំទី១ លើទឹកដីវៀតណាម
ការប្រកួតជុំទី៣៖
- ថ្ងៃទី ២០ ខែ ធ្នូ ឆ្នាំ ២០១៥ ក្លិបរបស់ថៃ ប្រកួតជាមួយក្រុមឈ្នះនៅជុំទី២ លើទឹកដីរបស់ថៃ
Toyota Mekong Club Championship 2015 ធ្លាប់រៀបចំជោគជ័យម្ដងហើយកាលពីឆ្នាំ ២០១៤ កន្លងទៅដោយមានក្រុមចូលរួមតែ ៣ ប៉ុណ្ណោះគឺក្លិបភ្នំពេញក្រោន តំណាងកម្ពុជា ក្លិប Becamex Binh Duong Fcតំណាប្រទេសវៀតណាម ក្លិប Ayeyawady United FC តំណាងប្រទេសមីយ៉ាន់ម៉ា និង ក្រុម Hoang Anh Attapeu របស់ប្រទេសឡាវ។ ជាលទ្ធផលពានរង្វាន់នេះបានទៅក្រុមBecamex Binh Duong FC របស់វៀតណាម ក្រោយប្រកួតឈ្នះក្រុម Ayeyawady United FC របស់មីយ៉ាន់ម៉ា ដោយលទ្ធផល ៤ ទល់ ០ នៅវគ្គផ្ដាច់ព្រ័ត្រ៕
© រក្សាសិទ្ធិដោយ thmeythmey.com