ពិភពតារា៖ គង់ វិច្ឆិកាពីឡានកូរ៉ូឡា មកជិះលុចស៊ីស៣០០
×
ភ្នំពេញ ៖ តារាសម្តែងវ័យក្មេងនាងគង់ វិច្ឆិកាថ្វីបើពេលនេះវិស័យសិល្បៈរបស់នាងមានរយៈពេល៣ឆ្នាំមកហើយក្ដី តែតារារូបនេះក៏មិនទាន់ហក់ឲ្យខ្លាំង និងក្ដោបប្រជាប្រិយភាពដល់កំពូល និងទទួលការងារឲ្យច្រើនដូចជាតារាល្បីមួយចំនួនដែរប៉ុន្តែនាងមានភាពហ៊ឺហាអាចប្តូររថយន្តពីឡានកូរ៉ូឡា មកជិះលុចស៊ីស៣០០ ពណ៌ស និងទិញផ្ទះថ្មី១ល្វែង នៅម្តុំអូរបែកក្អម ដែលមានតម្លៃជិត១០ម៉ឺនដុល្លារយ៉ាងរំភើយ។
បើនិយាយពីបទពិសោធន៍ក្នុងអាជីពសម្ដែងសិល្បៈរបស់គង់ វិច្ឆិកា នាងទើបតែមានឱកាសសម្តែងខ្សែភាពយន្តបាន៤រឿងប៉ុណ្ណោះ ហើយទើបតែទទួលតំណែងជាតួឯកក្នុងរឿង “បេះដូងក្រៅទ្រូង”ដែលត្រៀមដាក់បញ្ចាំងនៅទូរទស្សន៍ជាតិកម្ពុជា។
យ៉ាងណាក្តីបើគេងាកទៅប៉ាន់ស្មានពីប្រាក់ចំណូលរបស់នាងវិញក៏មិនទាន់អាចនឹងកើបប្រាក់បានច្រើនសម្រាប់លើកស្ទួយជីវភាពគ្រួសាររបស់នាងឲ្យមានភាពហ៊ឺហាប្តូររថយន្តពីឡានកូរ៉ូឡា មកជិះលុចស៊ីស៣០០ ពណ៌ស និងទិញផ្ទះថ្មី ១ល្វែង នៅម្តុំអូរបែកក្អម ដែលមានតម្លៃជិត១០ម៉ឺនដុល្លារនោះទេ។
ពាក់ព័ន្ធរឿងនេះប្រភពពីមហាជននិយាយថា ការមានបានលឿនបែបនេះប្រាកដជាមានការជួយជ្រោមជ្រែងពីបុរសអ្នកមានក្រៅសិល្បៈឧបត្ថម្ភជាមិនខាន បើសិនពឹងផ្អែកលើប្រាក់ចំណូលពីសិល្បៈហើយទើបតែមានកេរ្តិ៍ឈ្មោះតិចតួចដូចនាងដូចជារហ័សមានបានពេកហើយ ព្រោះកន្លងមកមានអ្នកសិល្បៈជាច្រើនតែងតែត្អូញត្អែរពីចំណូលបានមកពីសិល្បៈថាមិនអាចទ្រទ្រង់ជីវភាពគ្រួសារបានទេ។
ទាក់ទងរឿងដែលថាមានអ្នកនៅពីក្រោយខ្នងជួយឧបត្ថម្ភនោះ គង់ វិច្ឆិកា ធ្លាប់បាននិយាយថា នាងកំពុងសិក្សាចិត្តគូស្នេហ៍ពីបុរសអាណិកជនខ្មែរនៅសហរដ្ឋអាមេរិកម្នាក់ ដើម្បីឈានទៅចាប់ដៃធ្វើជាគូអនាគតនៅពេលខាងមុខនេះ។
បច្ចុប្បន្ននេះក្រោយពីឈានចូលដល់ឆ្នាំ២០១៥នេះគង់ វិច្ឆិកា គេបានឃើញនាងប្តូររថយន្តពីកូរ៉ូឡាមកជិះលុចស៊ីស៣០០ ពណ៌ស និងទើបតែទិញផ្ទះ១ល្វែងនៅអូរបែកក្អមមានតម្លៃជិត១០ម៉ឺនដុល្លារ។ នាងឲ្យដឹងដែរថា ពេលនេះនាងកំពុងចំណាយប្រាក់បន្ថែមទៀតសម្រាប់ជួសជុលកែលំអនិងទិញសម្ភារៈមួយចំនួនដាក់ផង។ ការទិញផ្ទះថ្មីនេះគង់ វិច្ឆិកា បញ្ជាក់បន្ថែមថា នាងមិនបានលក់ផ្ទះចាស់ទេ ហើយក៏មិនមែនជាប្រាក់ឧបត្ថម្ភពីគូស្នេហ៍ដែរ គឺជាប្រាក់កម្លាំងញើសឈាមរបស់នាងប៉ុណ្ណោះ៕
© រក្សាសិទ្ធិដោយ thmeythmey.com