ជាតិ
សង្គមជាតិ
លោកស្រី មូ សុខហួរ ស្នើប្រទេសសឹង្ហបុរី អន្តរាគមន៍ចាប់បញ្ជូនលោក សុខ ប៊ុន មកកម្ពុជា
× តំណាងរាស្ត្រគណបក្សសង្គ្រោះជាតិ លោកស្រី មូ សុខហួរ ស្នើឲ្យប្រទេសសឹង្ហបុរី ជួយអន្តរាគមន៍ចាប់បញ្ជូនខ្លួនលោកឧកញ៉ា សុខ ប៊ុន មកកម្ពុជាវិញ ដើម្បីទទួលខុសត្រូវចំពោះមុខច្បាប់លើទង្វើហិង្សាលើកញ្ញា ឯក សុជាតា ហៅថា សាសា អតីតពិធីការិនីទូរទស្សន៍ ។
លិខិតចុះថ្ងៃទី១៣ កក្កដា របស់លោកស្រី មូ សុខហួ ស្នើទៅឯកអគ្គរដ្ឋទូតសឹង្ហបុរីប្រចាំកម្ពុជា បានឲ្យដឹងថា អំពើហិង្សាប្រឆាំងលើស្ត្រី គឺចាត់ទុកថាជាបញ្ហាសុខភាពសាធារណៈ និងការប៉ះទង្គិចធ្ងន់ធ្ងរនៃសិទ្ធិរបស់ស្ត្រី ដែលត្រូវបានការពារដោយអង្គការសុខភាពពិភពលោក។ លោកស្រី មូ សុខហួរ បន្ថែមថា ដើម្បីការពារស្ត្រី និងកាត់បន្ថយអំពើហិង្សាលើស្ត្រីនោះ លុះត្រាមានវិធានការផ្លូវច្បាប់ ដើម្បីកាត់ទោសក្នុងបទល្មើសទាំងនោះ។ ជាក់ស្ដែងយុត្តិធម៌សម្រាប់ជនរងគ្រោះ ដូចករណីនាង ឯក សុជាតានេះ ដែលត្រូវបានប្រើហិង្សាដោយលោកឧកញ៉ា សុខ ប៊ុន រួមនឹងកងអង្គរក្សម្នាក់ទៀត ដែលជាបទល្មើស ដោយអាចកាត់ទោសបានជាមួយកាំភ្លើងផងដែរ។
តំណាងរាស្ត្រគណបក្សសង្គ្រោះជាតិរូបនេះបញ្ជាក់យ៉ាងដូច្នេះថា៖«ខ្ញុំសរសេសំណើរនេះដើម្បីឲ្យជំនួយការរបស់អ្នក ជួយរាយការណ៍ពីករណីនេះទាក់ទងទៅអាជ្ញាធរសឹង្ហបុរី ក្នុងគោលបំណងស្នើសហការអនុវត្តច្បាប់ជាមួយកម្ពុជា ក្នុងការចាប់បញ្ជូនលោកឧកញ៉ា សុខ ប៊ុន ដែលបានភៀសខ្លួនទៅជ្រកកោនសឹង្ហបុរីមកកម្ពុជាវិញ។ គ្រប់អង្គភាពប៉ូលីសទាំងអស់គួរជួយយកចិត្តទុកដាក់ចាត់វិធានបញ្ហានេះឲ្យបានប្រុងប្រយ័ត្ន »។
លោកស្រី មូ សុខហួរ បន្ដថា ការអំពាវនេះគឺជាជំហរឹងមាំនៃភាពជាដៃគូរ រវាងអាជ្ញាធរអនុវត្តច្បាប់នៅកម្ពុជា និងប្រទេសសឹង្ហបុរី ដើម្បីបង្ហាញជាសារថា ប្រទេសទាំងពីរមិននៅស្ងៀមមើលការប្រើអំពើហិង្សាប្រឆាំងលើស្ត្រីឡើយ។
យោងតាមឃ្លីបវីដេអូដែលថតដោយកាម៉េរ៉ាសុវត្ថិភាព គេសង្កេតឃើញសកម្មភាពវាយដំយ៉ាងធ្ងន់ធ្ងរពីបុរសម្នាក់ដែលគេអះអាងថា ជាលោក សុខ ប៊ុន និងអង្គរក្ស ទៅលើនាង សាសា អតីតពិធីការិនីទូរទស្សន៍នៅក្នុងហាងស្ថិតក្នុងបរិវេណកោះពេជ្យ កាលពីយប់ថ្ងៃទី២ ខែកក្កដា។ តាមបទសម្ភាសមួយជាមួយទូរទស្សន៍ CNC កញ្ញា សាសា បានអះអាងថា នាង និង សុខ ប៊ុន មិនដែលស្គាល់គ្នានោះឡើយ។ នាងបានបញ្ជាក់ថា ទំនាស់កើតឡើងបន្ទាប់ពីនាងព្យាយាមរារាំង លោក សុខ ប៊ុន និងក្រុមអង្គរក្ស មិនឲ្យនាំម្ចាស់ហាងជនជាតិជប៉ុនដែលជាមិត្តភក្តិរបស់នាងចេញទៅក្រៅ ខណៈដែលមិត្តភក្តិនោះកំពុងស្រវឹងជោគជាំ។ នាងបានទទួលរងការជេរប្រមាថពីសំណាក់អង្គរក្ស និងរងការវាយដំផ្ទាល់ពីសំណាក់លោក សុខ ប៊ុន។
គួរបញ្ជាក់ថា បន្ទាប់ពីជនរងគ្រោះដាក់ពាក្យបណ្តឹងទៅកាន់តុលាការ លោកព្រះរាជអជ្ញារង ហ៊ឹង ប៊ុនថននៃសាលាដំបូងរាជធានីភ្នំពេញ បានចេញដីកាកោះហៅ លោក សុខ ប៊ុន ឲ្យចូលខ្លួនបំភ្លឺកាលពីថ្ងៃទី៨ ខែកក្កដា តែរហូតមកដល់ពេលនេះបុរសជាឧកញ៉ារូបនេះ មិនទាន់បង្ហាញខ្លួននៅឡើយទេ៕
© រក្សាសិទ្ធិដោយ thmeythmey.com