ជាតិ
សង្គមជាតិ
ទោះជាខែវស្សាមកដល់តែស្រះស្រង់នៅមិនទាន់មានទឹកនៅឡើយ
× សៀមរាប៖ រហូតមកដល់ថ្ងៃ១៤ កក្កដានេះ ស្រះស្រង់ដែលគោកគ្មានទឹកអស់ជាង២ខែមកហើយនោះ នៅមិនទាន់មានទឹកដូចធម្មតាវិញទេ។ ការបន្តគោកនេះ ដោយសារលំហូរទឹកភ្ញៀងមិនទៀងទាត់ និងការអាក់ខាន ការបង្ហូរទឹកពីភ្នំបូក របស់អាជ្ញាធរអប្សរា។
ដីបែកក្រហែង គ្មានទឹក និងរុក្ខជាតិ ទាំងនេះសុទ្ធតែរូបភាព ដែលគេបានឃើញនៅរណ្តៅស្រះស្រង់ ដែលមានជម្រៅមិនដល់២ម៉ែត្រផង។ ប្រភពពីអ្នកភូមិ និងអ្នកលក់ដូរ បានអះអាងថា ស្រះស្រង់ បានគោកគ្មានទឹក ក្នុងអំឡុងខែឧសភាមកហើយ ហើយការគោកនេះជារឿងដ៏កម្របំផុត។
មន្ត្រីនៃអាជ្ញាធរអប្សរាបាននិយាយថា ការគោករាក់នៃស្រះស្រង់នេះ គឺបណ្តាលមកពីរដូវវស្សាឆ្នាំនេះ អូសបន្លាយពេលយូរ។ លោក ហង់ ពៅ អគ្គនាយករងអាជ្ញាធរអប្សរា ដែលទទួលបន្ទុកផ្នែកគ្រប់គ្រងធនធានទឹក បាននិយាយថា ស្រះស្រង់ធ្លាប់គោកម្តងនៅឆ្នាំ២០០៤ ដែលកាលនោះជំរុញឲ្យអាជ្ញាធរជីកប្រឡាយ ដើម្បីបង្ហូរទឹកចូល។
យ៉ាងណាមិញ រហូតមកដល់ថ្ងៃនេះ ស្រះស្រង់ដែលគោករាក់ជាង២ខែមកហើយនោះ នៅមិនទាន់ជួយសង្គ្រោះបាននៅឡើយទេ។ ព្រោះថា បើតាមមន្ត្រីនៃអាជ្ញាធរអប្សរាមួយ បានបញ្ជាក់ថា គម្រោងបង្ហូរពីភ្នំបូកត្រូវបានអាក់ខាន ដោយសារទឹកមានតិច។ ទឹកដែលមានតិចតួចនៅទីនោះ គឺគ្រាន់សម្រាប់តែផ្គត់ផ្គន់ដល់ការប្រើប្រាស់របស់ប្រជាពលរដ្ឋតែប៉ុណ្ណោះ។
គួររម្លឹកថា ស្រះស្រង់ដែលមានបណ្តោយ ៧៨០ម និងទទឹង ៣៨០ម កសាងឡើងនៅចុងសតវត្សទី១២ ដើមសតវត្សទី១៣ ដោយពុំមានប្រព័ន្ធបង្ហូរទឹកចូលទេ។ ប្រភពពីអាជ្ញាធរអប្សរា ស្រះនេះពឹងលើទឹកភ្លៀង និងទឹកក្រោមដី ដែលជ្រាបចូលពីបារាយណ៍ខាងកើត ខណៈដែលបារាយណ៍ខាងកើតសព្វថ្ងៃ ក៏គោកហួតហែងដូចគ្នា។ គេនៅមិនទាន់ដឹងថា តើអាជ្ញាធរអប្សរា អាចនឹងមានដំណោះស្រាយអ្វីផ្សេងទៀតនោះទេចំពោះបញ្ហានេះ៕
© រក្សាសិទ្ធិដោយ thmeythmey.com