ជាតិ
សង្គមជាតិ
រដ្ឋាភិបាលណែនាំពលរដ្ឋមិនឲ្យលក់-ជួលដីតាមព្រំដែនឲ្យបរទេស
× ភ្នំពេញ៖ កាលពីថ្ងៃទី១៤ ខែកក្កដា រដ្ឋមន្ត្រីក្រសួងមហាផ្ទៃ លោក ស ខេង បានប្រាប់ឲ្យ អាជ្ញាធរថ្នាក់ក្រោមជាតិចាត់វិធានហាមឃាត់ជាបន្ទាន់ ចំពោះការជួល ឬលក់ដីឲ្យបរទេស នៅតាមខ្សែបន្ទាត់ព្រំដែនទូទាំងប្រទេសកម្ពុជា ដើម្បីបញ្ចៀសបញ្ហាព្រំដែននានា។ ប៉ុន្តែអ្នក ស្រាវជ្រាវសង្គម ប្រាប់ថា រដ្ឋាភិបាលគួរតែសិក្សាបន្ថែមទៀតថា តើហេតុអ្វីបានជាប្រជាជន រស់នៅតាមខ្សែបន្ទាត់ព្រំដែន យល់ព្រមជួល ឬលក់ទៅឲ្យបរទេស?
រដ្ឋមន្ត្រីក្រសួងមហាផ្ទៃ លោក ស ខេង បានចេញបញ្ជាឲ្យ អាជ្ញាធរថ្នាក់ក្រោមជាតិ ពិសេសគឺអាជ្ញាធរថ្នាក់មូលដ្ឋាន ត្រូវត្រួតពិនិត្យ និងហាមឃាត់ រាល់ការជួលលក់ដីនៅតាមព្រំដែនឡើងវិញ ដើម្បីរក្សាស្ថិរភាព បូរណភាពយូរអង្វែងរបស់ កម្ពុជា។ ក្នុងកិច្ចប្រជុំផ្សព្វផ្សាយ អំពីបច្ចុប្បន្នភាព ការងារកំណត់បង្គោលព្រំដែនរវាង ប្រទេសកម្ពុជា និងប្រទេសវៀតណាម លោក ស ខេង បានចាត់ទុកថា ការជួលលក់ដីរបស់ប្រជាជន នៅតាមបណ្តោយព្រំដែន នឹងក្លាយជាបញ្ហាប៉ះពាល់ដល់បូរណភាពទឹកដីកម្ពុជា នាពេលអនាគត។
លោក បញ្ជាក់ដូច្នេះថា៖«បញ្ហាជួលលក់ដីតាមបណ្តោយព្រំដែននេះយូរទៅ អាចក្លាយជាបញ្ហា បូរណភាពដែនដី ដោយភាគីម្ខាងទៀតអាចអះអាងថា នេះជាដីរបស់គេកាន់កាប់យូរណាស់ មកហើយ»។ លោកបានថ្លែងបែបនេះ ទៅកាន់មន្ត្រីចូលរួមជាង ២០០នាក់ រួមមាន តំណាងក្រសួងការពារជាតិ ក្រសួងការបរទេស និងអភិបាលខេត្ត ព្រមទាំងស្នងការ នគរបាល នគរបាលការពារព្រំដែនទូទាំងប្រទេស។
ទាក់ទិននឹងការលើកឡើងនេះ អ្នកវិភាគយល់ឃើញថា រដ្ឋាភិបាលគួរតែសិក្សាឲ្យបានលម្អិត ថា ហេតុអ្វីបានជាប្រជាជនជួល ឬលក់ដីឲ្យជនបរទេសជាប់ព្រំដែនកម្ពុជា លោក កែម ឡី អះអាងថា វិធានការនេះ នឹងមិនមានប្រសិទ្ធភាពនោះទេ ប្រសិនបើរដ្ឋាភិបាល ពុំសិក្សាឲ្យបានលម្អិតជាមុន ដោយលោកលើកឡើងថា បញ្ហានេះ បាន និងកំពុងកើតឡើង តាមព្រំដែន ដោយសារប្រជាជន ខ្វះខាតប្រព័ន្ធធារាសាស្ត្រ ថវិកាទិញជីកសិកម្ម ពិសេសគឺ ប្រជាជនប្រឈមមុខនឹងបញ្ហាតម្លៃទីផ្សារ លក់កសិផលតែម្តង។ ដើម្បីទប់ស្កាត់បញ្ហានេះ លោក កែម ឡី បានប្រាប់ឲ្យអាជ្ញាធរចាប់ពិន័យអ្នកលក់-ជួល និងអ្នកពាក់ព័ន្ធផ្សេងទៀត ដាក់ពន្ធនាគារទៀតផង៕
© រក្សាសិទ្ធិដោយ thmeythmey.com