ជាតិ
លោក សុខ ប៊ុន នឹងចូលខ្លួនបំភ្លឺ ប៉ុន្តែសុំពេលព្យាបាលជំងឺស្ត្រេសសិន
× លោក សុខ ប៊ុន អះអាងថានឹងចូលខ្លួនសុខចិត្តដោះស្រាយជាមួយ កញ្ញាសាសា ចំពោះមុខតុលាការ ដើម្បីស្វែងរកការពិត និងយុត្តិធម៌ជូនភាគីពាក់ព័ន្ធ នៅពេលណា ដែលមានការបញ្ជាក់ពីលោកវេជ្ជបណ្ឌិតថាសុខភាពរបស់លោកមានភាពល្អប្រសើរឡើងវិញ ។ នេះបើតាមលិខិតទីពីររបស់លោក សុខ ប៊ុន ដែលបានផ្សាយជាសាធារណៈ កាលពីថ្ងៃទី១៤ ខែកក្កដា ម្សិលមិញ។
បើតាមលិខិតទីពីរនេះ លោក សុខ ប៊ុន បញ្ជាក់ហេតុផលថា កន្លងមក រូបលោក មិនបានចូលខ្លួនបំភ្លឺក្នុងតុលាការតាមដីកាកោះហៅ មិនមែនមានន័យថា រូបលោកគេចពីការទទួលខុសត្រូវនោះទេ តែដោយសារតែរូបលោកមានកាតព្វកិច្ចផ្ទាល់ខ្លួនដ៏ចំបាច់ដែលត្រូវតែបំពេញ និងបញ្ហាសុខភាពដែលត្រូវព្យាបាល។
ឆ្លើយតបនឹងការសុំពន្យារពេលនេះ មេធាវី របស់កញ្ញា សាសា គឺលោក ពុធ ធាវី បានទាត់ចោល និងបញ្ជាក់ថា សំណើរបស់លោក សុខ ប៊ុន ប្រាសចាកនីតិវិធីតុលាការ។ លោកបានពន្យល់ថា តាមនីតិវិធី ដើម្បីសុំពន្យារពេលបាន គឺតម្រូវឲ្យ ជនល្មើស ត្រូវសរសេរលិខិតតាមបទដ្ឋានគតិយុត្តត្រឹមត្រូវយកជូនព្រះរាជអាជ្ញា ឬតុលាការ ដោយផ្ទាល់ បន្ទាប់មកទើបខាងព្រះរាជអាជ្ញា ឬតុលាការ ធ្វើការពិនិត្យថាតើនឹងអាចអនុញ្ញាតឲ្យ ពន្យារពេល សមរម្យណាមួយ។ លោកមេធាវីរូបនេះបញ្ជាក់យ៉ាងនេះថា «ឥឡូវសំណុំរឿង កំពុងស្ថិតក្នុងដៃព្រះរាជអាជ្ញា អីចឹងប្រសិនបើជនល្មើស ចង់ពន្យារពេល ត្រូវសរសេរលិខិតជាផ្លូវជូនព្រះរាជអាជ្ញាតាមនីតិវិធី មិនមែនសរសេរ ហើយបង្ហោះជាសាធារណៈក្នុងហ្វេសប៊ុកអីចឹងទេ វាមិនអាចយកជាផ្លូវការបានឡើយ។
សូមរំឭកថា កាលពីព្រឹកថ្ងៃម្សិលមិញ លោក សុខ ប៊ុន បានចេញលិខិតលើកទីមួយប្រកាសជាសាធារណៈថា ខ្លួនសុខចិត្ដលាលែងពីតួនាទីទាំងអស់ និងងារជាឧកញ៉ា ហើយព្រមទាំងសុំទោស កញ្ញា សាសា ជាមួយនឹងសំណងចំនួន ១០ម៉ឺនដុល្លារ។ លើសពីនេះ លោក សុខ ប៊ុន ក៏ស្នើសុំតុលាការពន្យារពេលចូលបំភ្លឺតាមដីកាកោះហៅ ក្រោមហេតុផលថា ខ្លួនកំពុងតែមានជំងឺស្រេសដ៏ធ្ងន់ធ្ងរដែលត្រូវព្យាបាល។
ទោះបីជាលោក សុខ ប៊ុន បានសម្តែងការសោកស្តាយចំពោះទង្វើរបស់ខ្លួនដែលបានប្រព្រឹត្ត និងសុំទោសកញ្ញសាសា ជាមួយសំណងជំងឺចិត្តចំនួន ១០ម៉ឹនដុល្លារយ៉ាងនេះក្តី តែជាផលអវិជ្ជមាន ត្រូវបានកញ្ញាសាសាបដិសេធទាំងស្រុង។ ជនរងគ្រោះរូបនេះបញ្ជាក់យ៉ាងច្បាស់ថា៖ «ក្រៅពីដោះស្រាយតាមផ្លូវច្បាប់ អ្វីក៏ខ្ញុំមិនអាចទទួលយកបានដែរ។ បើនិយាយរឿងលុយវិញ ខាងខ្ញុំមិននិយាយតែម្តង ទោះបីជាប៉ុនណាក៏ដោយ។ អ្វីដែលខ្ញុំចង់បានធំបំផុត គឺសុំឲ្យសលោក សុខ ប៊ុន ចេញមុខដោះស្រាយចំពោះមុខតុលាការ មិនត្រូវលាក់ខ្លួនអីចឹងទេ»។
លោក សុខ ប៊ុន ដែលប្រាប់សាធារណជនថាខ្លួនសុំពេលព្យាបាលជំងឺស្រេ្ដសដ៏ធ្ងន់ធ្ងរ ត្រូវបានគេសង្ស័យថាកំពុងតែលាក់ខ្លួននៅប្រទេសសិង្ហបូរី ៕
© រក្សាសិទ្ធិដោយ thmeythmey.com